Bu gün yolum Hyundai Servisə düşmüşdü. Təsadüfən yeni Grandeuru gördüm — Möhtəşəm. Həm xarici görünüşdən — eksteryerdən, həm də daxildən — interyerdən super! Hələ də təəssürat altındayam. Yeni arzum peyda oldu. =)
Reklam çarxına da söz ola bilməz:

Qısa variant:

Mövzuya dair forumda müzakirələr ↓
Hyundai yeni Grandeur-u təqdim etdi!

Çoxdan idi avtomobil dünyasında baş verən yeniliklərlə bağlı heçnə yazmıdım. Yazmadığım dövrdə çox şey dəyişdi — Hyundai-Kia cütlüyü demək olar ki, dayanmadan bütün modellərini yenilədi (qaldı bircə SantaFe), BMW hər modeli identik eksteryerli maşınları buraxmağa davam edir, Toyota və Subaru isə söz veriblər ki, dünyanın ən eybəcər avtomobillərini istehsal etməkdə daimi birinci olacaqlar. Son model Toyota Corolla buna sübutdur — guya restaylinq etməyə çalışdılar, əksinə vurub gözünü çıxartdılar — nəticədə ucuz tuninq-fason bir şey alındı — arxa işıqları o günə qoyan dizayneri kastrasiyadan keçirmək lazımdır.
Nəsə. Son günlər avto-dünyada diqqətimi çəkən ən maraqlı xəbər Mercedes-Benz-in yeni ML-i oldu. Daimler şirkəti nə qədər çalışsa da, yeni modeli gizli saxlayıb, geniş kütləyə Frankfurt Avto-Şousunda təqdim etsin, alınmadı. ML-in şəkilləri ildırım sürətiylə netdə yayıldı.
İlk təəssüratlarım — yeni ML-in eksteryeri yeni C Class əsasında yığılıb. Ümumidə isə baxımlı avtomobil alınsa da, arxa işıqlarının heç yeri yoxdur. Yeni Porsche Cayenne üslubunda mənasız və yersiz arxa işıqları var. Salona isə söz ola bilməz.

Mövzuya dair forumda müzakirələr ↓
Yeni Mercedes-Benz ML. Gözəlçə…

Hyundai-Kia konserninin fenomenal inkişafına heyranam. Ümumiyyətlə, son 10 ildə bütün Koreya şirkətləri öz seqmentlərində inkişaf tempinə görə rəqib tanımırlar. Demək olar ki, hər səviyyədə təmsil olunmağa can atan Hyundai-Kia birliyi artıq dünyanın 4-cü ən böyük avto-nəhəngidir. Dayanmadan öz üzərilərində iş aparırlar — 10 il bundan öncə bu istehsalçının avtomobilləri “oğru dizayna” əsaslanırdısa, indi modellər öz orijinallığı ilə seçilir. Dizayn cəhətdən son dövrlər KİA məni daha çox cəlb edir. Son modelləri olan Optima 2011 elə nəyə desən dəyər.

Götürək digər Koreya təmsilçisi — Samsung-u. Aşağı büdcəyə hesablanan texnika istehsalçısı bu gün ən yaxın rəqiblərini belə gəlirlərinə görə azından 3-4 dəfə üstələyir. Bir vaxtlar SONY-nin uğurlarına hədəflənən Samsung, indi özü dünya lideridir — hətta keçmiş hədəfi belə istehsal etdiyi məhsullarında onun patentləşdirilmiş texnologiyalarından istifadə edir. Bu yaxınlarda öyrəndim ki, Daewoo şirkətinin məlum müflisməşindən sonra, Samsung ona məxsus bütün strateji sənayeni ələ keçirib. İndi Samsung dedikdə tək məişət texnikası nəzərdə tutulmur, Samsung indi avtomobildən tutmuş müxtəlif növ silahlar, hərbi gəmilərədək istehsal edir! Əhsən bunda deyiblər.
Bu fenomenal inkişafın bir neçə motivasiyası var. Birincisi bu ölkə hal-hazırda faktiki iki yerə bölünüb — Cənub kapitalizmi hər bir şeydə Şimal “sosializminə” ondan daha üstün olmasını isbat etmək istəyir. İkincisi koreya xalqı tarixi və daha uğurlu düşmənləri tərəfindən əhatə olunub — Çin və Yaponiya. Bu da öz növbəsində dayanmadan inkişaf etmək və onlardan geri qalmamaq üçün daha bir səbəbdir. Üçüncüsi isə Koreya hal-hazırda inkişaf dövrünün keçid mərhələsin keçir, tam inkişafa çatdıqda iqtisadiyyatda sərinləmə hiss olunacaq, necə bu Yaponiya iqtisadiyyatında özünü bildirməkdədir. İqtisadiyyatlarını dünya səviyyəsində pik həddə çatdıran yaponlar son bir neçə ildə sanki soyuyublar. Və ən nəhayət — qeyd olunun bu üç prinsipin də düzgün işləməsi üçün düzgün strateji siyasi və iqtisadi addımların atılmasıdır. Əsl analoqu olmayanlar bu saat koreyalılardır, qoy bizim optimistlər inciməsin. 😉
Mövzuya dair forumda müzakirələr ↓
Kia Candeza — Yeni əfsanə

Dünən Minsk metrosunda partlayış baş verdi. Özü də Lukaşenkonun düz rezidensiyasının yanında. Adət üzrə hər şeyi yıxdılar terroristlərin, qərbin üstünə. Maraqlıdır, həqiqətən bu olayda terroristlər və “onları maliyyələşdirən” qərbin əli var?! Fikrimcə yox. Dünənki olay açıq-aydın iyrənc siyasi qambit nümunəsi idi — insanlar qurban verildi, nəticədə rejim daha da bərkidi və siyasi bonus qazandı. Bu hadisə lap 11 sentyabr olaylarını xatırlatdı. O vaxt 11 sentyabr hadisəsi Corc Buşa su və hava kimi lazım idisə, bu partlayış da Avropanın son diktatoru üçün həyati məna kəsb edir.
Məqsəd — “ərəb” ssenarisindən qorxuya düşən rejim cəmiyyətə çatdırmaq istəyir ki, bəs Lukaşenko getdi — Belorus qarışacaq. Bundan əlavə bonuslar da əldə edildi — indi müxalifətçiləri terrorda günahlandırıb daha asan zindanlara atmaq olacaq və yaxud polis rejiminin daha da ifratlaşmasına bahanə var. Nəsə. Günahsız insan həyatından öz çirkin siyasi oyunları üçün istifadə edənlərə ar olsun!



Video görüntülərə görə Aslana təşəkkürlər.
Mövzuya dair forumda müzakirələr ↓
Minskdə metro partladıldı

Bütün Respublika üzrə SOCAR yanacaq doldurma stansiyaları işə düşər-düşməz avtomobil sahibləri çox sevindi. Hər kəs kimi mən də elə bildim ki, keyfiyyətli benzin standartları nəhayət ki, bizim üçün də əl çatası olacaq. Stansiyaların açılışının ilk günlərindən avtomobilə yalnız SOCAR brendi altında benzini vurmağa başladım. Dəqiq — Aİ 93. Gözəl. Maşında hiss olunacaq dərəcədə sürət artımı, rahatlıq hiss olunmağa başladı. Artıq 3-cü ay idi ki, SOCAR benzinindən istifadə edirdim. Və… Başladı. İlk öncə avtomobildə öz-özünə əsmələr peyda oldu. Daha sonra bu əsmələr daha da inkişaf edərək “parking”-də durduğum zaman da özünü bildirməyə başladı. Getdikcə əsmə problemi daha da artdı. Servisə müraciət etməli oldum. Benzinin zibil olmasını deyib, maşının “sveçalarını” dəyişdilər. Amma mən yenə də SOCAR benzininə sadiq idim. “Sveçaların” yenisi ilə dəyişilməsinə baxmayaraq, maşın yenə əsirdi. Servisdə bu dəfə benzinin “karburator”-u sıradan çıxardığını dedilər. Kömək etmədi. Səbəbini yaxın dostlardan öyrənməyə çalışdım — hər kəsin sualı bu oldu — benzini SOCAR-dan vurursan? Dedim hə, dedilər səbəb elə budur. Sən demə mən fil qulağında yatmışam — artıq hər kəs SOCAR benzinin necə “keyfiyyətli” olmasını hiss edib. Özü də maraqlısı odur ki, hər kəsdə bu simptomlar ilk olaraq maşında əsmə ilə başlayıb, “sveça” və “karbüratorun” dəyişdirilməsi ilə bitir. Daha doğrusu adət üzrə əksəriyyət “karburatorun” dəyişilməsinə kimi SOCAR-dan istifadə edir, ondan sonra isə o tip benzinə yaxın durmurlar. Dursaydılar, kim bilir “keyfiyyətli” benzin daha hansı fəsadlara gətirib çıxarardı.

Uzun sözün qısası, benzini dəyişdim. İndi hiss olunacaq qədər irəlləyiş var. Onu da qeyd edim ki, əvvəllər SOCAR yanacaq doldurma stansiyalarında maşın əlindən tərpənməli deyildisə, indi maşın sayı əllə sayılasıdır. SOCAR bir anda yerli müştərisinin ümidlərini, ona olan etimadı puç etdi. Axı niyə? Məgər əsl keyfiyyətli benzin təqdim etmək bu qədər çətindir?!
Mövzuya dair forumda müzakirələr ↓
SOCAR yoxsa AZPETROL?!

Avtomobil xəbərlərini izləyən bir insan kimi, bu günlərdə məşhur luks brendi Aston Martin-in Toyota-nın iQ modeli üzərində qurduğu avtomobilin qiyməti çox maraqlı idi. Xatırladım ki, Toyota iQ 9 min ABŞ dollarına satılır. Aston Martin isə yeni anons etdiyi Cygnet adlı balacanın qiymətinin nə az nə çox, düz 31 min (!) funt sterlinqdən başlamasını elan etdi, bu da hardasa edir 42 min dollar. Təsəvvür edirsiz, 1.3 motorlu avtomobilcığaza bu qədər pul…

Aston Martin amma ruhdan düşmür, deyir axı mənim balacımın unikal stabilizasiya sistemi (hansı ki, Toyota da var), parlaq disklər, açarsız qoşulma sistemi, elektrik şüşə-qaldıranlar (hə, bax bu texnili inqilabdı :lol:), dəri oturacaqlar, klimat-kontrol, GPS naviqasiya sistemi var. Nə qədər qəribə olsa da, 42 min dollar Mercedess C-Class-in qiymətidir. 42 min dollara 2 D Class təmsilçisi — Hyundai Sonata almaq olar, 42 min dollara bir Audi A4 + Kia Rio almaq olar, 42min dollara — ən azında bizim rəşadətli “barmaq sındıran” polislərimizin gəzdiyi BMW 3-cü seriyadan almaq olar. Amma 42 min dolları faktiki Toyotanın 9 minlik modelinin restaylinqinə vermək səfehlik deyilmi?!


Kimsə indi deyəcək ki, problemlər içində üzürük, sən gör nə haqda yazırsan… Hərdən biraz pozitivlik də lazımdır. 😉
Mövzuya dair forumda müzakirələr ↓
Avto Xəbərlər / Авто Новости

Biz Azərbaycanlılar fərqliyik. Bu fəqliyimiz bizim “analoqu olmayan” mentalitetdə, dünya görüşümüz və hadisələrə unikal baxışlarımızda öz əksini tapır. Maraqlı xüsusiyyətlərimiz çoxdur. Məsələn, bütün dünya car çəkib təhlükəsizlik kəmərindən istifadəni məsləhət gördüyü halda, Azərbaycanlı sürücülər bunu qətiyyətlə etmirlər — çünki bu “zapodlo”-dur. “Əşi, filankəs görər, sonra bəs deməz ki, o nədi 10 manat cəriməyə görə özünü bürümüsən… Ayıbdır. Adımız var, sanımız var. Kəmər bizlik deyil.”
Belə bir hadisə real həyatda da baş verib. Deyilənə görə bir qaqaşı rəşadətli yol polislərimiz saxlayıb, onun kəmər vurduğunu görəndə deyiblər — ayə yekə kişisən, 10 manat cərimə ödəyəcəksən deyə bu nədi dolamısan özünə. Bəlkə elə ona görə də bərk gedən qaqaşlar, ümumiyyətlə sürücülərin əksəriyyəti (deyərdim 99%-i) avtomobil sürərkən heç bir halda kəmər vurmurlar. Kimisi bunu kəmərə öyrəşmədiyinə görə etdiyini deyir, kimisi guya kəməri taxarkən ürəyi sıxıldığını bəhanə gətirir, amma əsl səbəb — sosial qınaqdır, kiminsə bunu söz etməsindən qorxmaqdır. Bir şey unudulur — bu təhlükəsizlik kəməri məhz TƏHLÜKƏSİZLİK kəməridir, cərimə verməmək üçün vasitə deyil. Bu ilk öncə sürücünün, sərnişinlərin həyatını gözlənilməz hadisədən qorumaq üçün nəzərdə tutulub, polislərin yanından rahat ötüb-keçmək üçün deyil. Axı həyat bizə bir dəfə verilir, onunla niyə kiminsə sözünə görə risk edək? Axı səhər bir hadisə olsa, bu sizə olacaq, kəmər taxmağı söz edən Gülməmmədə deyil…
Təhlükəsizlik kəmərindən istifadə edilməməsinin digər səbəbi də post-sovet ölkələrinə xas — ifrat pofiqizmdir. İnsanların öz həyatlarına, təhlükəsizliklərinə biganəliyi.
Təhlükəsizlik kəmərlərinizi mütləq taxın. Həyatınıza qarşı biganə olmayın.
Sonda çox təsir edici bir video çarxa baxmağa dəvət edirəm. Siz yalnız özünüz üçün yaşamırsınız, bunu unutmayın!
Allah bizi qorusun!
Çarxa mütləq səslə baxın. Onda daha təsir edici olur.

Mövzuya dair forumda müzakirələr ↓
Təhlükəsizlik kəməri sizin üçün nədir?

Qarabağ bir yana, bizim rəşadətli nəqliyyat müfəttişləri ilə sürücülər arasında qarşıdurma davam edir. Qalib tərəf daha qüdrətli müfəttişlərdir. Sürücülər isə qara milləti təmsil etdiklərindən, hələ ki, susmağı daha üstün tuturlar.

Yolumu gedib, ANS CM-ə qulaq asırdım. Birdən İsti-istinin əvəzolunmaz aparıcısı Mətanət bacı Xəzər TV-yə xas üslubda müfəttişin taksi sürücüsünü öldürməsi xəbərini anons etdi. Rəsmi açıqlamadan sonra hadisə şahidlərinə söz verildi. Hər kəs bir nəfər kimi iddia etdi ki, müfəttiş qanunsuz olaraq (bir sadə vətəndaş kimi mən də bu qanunsuzluğun dəfələrlə şahidi olmuşam) sürücün avtomobilindən dövlət nömrə nişanını açıb. Buna etiraz edən sürücü ilə (özü də yaşlı birisi olub) müfəttiş arasında xoşagəlməz mübahisə baş verib və müfəttiş eləmə tənbəllik, biçarə sürücünün sifətinə var gücü ilə yumruq ilişdirib. Aldığı zərbədən dili qatlanan yazıq qoca elə yerindəcə canını tapşırıb. Müfəttiş isə xüsusi “цинизм” göstərərək, sanki heç nə olmamış kimi can verən sürücüyə fikir vermədən maşınına oturub, nömrənidə (!) özüylə götürərək hadisə yerindən uzaqlaşıb. Bu hadisə açığı məni bir vətəndaş kimi şoka saldı. Məgər bu cılız məmur öz cəzasızlığına bu qədər əmindir ki, artıq insan həyatına belə saymamazlıqla yanaşır?!
Bu azmış kimi, Nəqliyyat Nazirliyinin hörmətli sözcüsü Namiq Həsənov aşağıdakıları bildirib: “Mərhum taksi sürücüsü xidməti maşını ilə hərəkətdə olan Nəqliyyat Departamentinin işcisini saxlatdıraraq dövlət rüsumunu necə və hara ödəmək barədə soruşub. Bizim əməkdaş da ona prosedur qaydalarını başa salaraq gedib. Departament işçisi yenidən geri qayıdaraq həmin ərazidən keçərkən taksi sürücüsünün yerə yıxıldıını görüb. Dərhal təcili yardım çağırıb, polis əməkdaşları və Nəqliyyat Nazirliyinə məlumat verib”.
Çox maraqlıdır, Azərbaycan reallığında hansı sürücü öz xoşuna gedib müfəttişə “ilişər”? Bu lap Rusiyanın məşhur Comedy Club rezidentlərinin oynadığı bir traqi-komik səhnəni xatırladır — “Skripaç”. Yazıq skripaç. Hadisələr demək olar ki, eynidir.

Mövzuya dair forumda müzakirələr ↓
Nəqliyyat müfəttişləri vs. Sürücülər

Yatmağa hazırlaşırdım ki, yeni Mercedes Benz CLS-in möhtəşəm “trailer”-i təsadüfən qarşıma çıxdı. Möhtəşəm. Sizlərlə bölüşməyə bilməzdim. 😉 Trailerdə baş rolda CLS-in yaradıcısı, əslən koreyalı olan dizayner Hubert Lee-in özü çəkilib.
Xatırladım ki, Joel Piaskowksi kimi Lee də Hyundai-ın yetirməsidir. O Kaliforniyada yerləşən “Art Center College of Design”-in məzunudur. Məhz onun üzv olduğu komandanın sayəsində Hyundai (Hyundai-KIA Motor) bir neçə il ərzində plaqiator şirkətdən özünün möhtəşəm stilistikasına malik avto-nəhəngə çevrildi. İndi isə onlar Mercedes-in görkəmini dəyişirlər. Əhsən sənə cənab Lee. Yaratdığın bu Mercedes də gözəldir!

Mövzuya dair forumda müzakirələr ↓
Elantranı yaradan Mercedesin baş dizayneri kimi!

Bir neçə gün bundan qabaq parlament seçkiləri öncəsi siyasi xəbərlər hər kəs üçün nömrə bir idisə, son iyrənc olaylar demək olar ki, hər kəsi tamamilə məyus etdi… Nəsə. Gəlin biraz istirahət edib, ən möhtəşəm (fikrimcə) və kreativ reklam çarxlarından həzz alaq.
SONY-nin yeni Bravia Monolith televizorlarına aid reklam çarxı mənim üçün nömrə birdir. Nİyə? Çünki çox sadə və eyni zamanda çox təsir edicidir. Əsl baxımlı reklam.

Nike. Əfsanəvi şirkət əfsanəvi video çarxı ilə. Möhtəşəm ssenari, möhtəşəm realizasiya, çəkiliş və fulbolçuların (əsasən də Runinin) gözəl aktyor oyununu qeyd etmək istəyirəm.

Olympus. Professional fotoaparatlar istehsalçısının möhtəşəm reklam çarxı. Gözəl ideya. Olympusdan belə kreativlik gözləmirdim. =)

Və yenə də Nike, və yenə də futbol.

Bu isə sürət və keyfiyyət rəmzi BMW-nin reklam çarxıdır.

Bu dəfə hələlik bu qədər. İnşallah davamı olacaq.