Pərvin Şükürzadənin bloqu
Barselonada keçirilən texnologiya bayramı — MWC 2011 də belə getdi. Çox saylı yeniliklərin şahidi olduq — Nokia ilə Microsoft evləndi, PlayStation-ın telefonlara keçidinin şahidi olduq, Samsung Galaxy, HTC isə Desire layihərərinin təkamülü olan yeni telefon və planşetləri təqdim etdi və daha nələr. Bu xəbərlər barəsində o qədər fikirlər bildirilib ki, təkrarçılığa yol verməyib bu yenilikləri tanıtım çarxları ilə bölüşürəm.
Sony Ericsson XPERIA Play
Ən maraqlı yeniliklərdən olan XPERIA Play, Sony PlayStation-ın mobil telefonlara adaptasiya edilmiş formasıdır. Kiçik çarx vasitəsilə bu qadjetin gözəlliyi tam anlatılır. Əla çarxdır.
********************************************************
LG Optimus Pad
Apple iPad-ın uğuru heç kimə sakit oturmağa imkan vermir. Motorola və Samsung-la yanaşı bu yarışmaya LG də qoşuldu. LG-nin təqdim etdiyi Optimus Pad adlı planşet də Samsung və Motorola planşetləri kimi Android platformasında işləyir. Amma rəqiblərindən yeganə üstünlüyü onun 3D rejimində çəkiliş apara bilməsindədir. Çarx hardasa SONY-nin məhşur Bravia Monolith televizorlarını təbliğ edən çarxı təkrarlayır.
********************************************************
Samsung Galaxy Ace, Fit, Gio və Mini
Samsung isə dayanmadan Android platformalı smartfonları ştampovkalamaqda davam edir. Galaxy seriyasından olan yeniliklərə həsr olunmuş çarx.
********************************************************
HTC ChaCha
Facebook üçün ayrıca telefon?! HTC bunu etdi. ChaCha adlanan bu telefon həm xarici görünüşcə, həm də funksianıllığına görə unikaldır (daha doğrusu mırtdır).
********************************************************
HTC Incredible S
HTC-nin Flaqman telefonu. Açıqlanan üstünlükləri — 4 düymluq Super-Amoled tipli displey və idarə etmə düymələrinin telefonun səmtindən asılı olaraq dəyişməsidir. Digər üstünlüklər hələ açıqlanmır.
********************************************************
HTC Flyer
Və sonda… HTC-nin iPad arzusu — Flayer. Burada da texniki göstəricilər tam açıqlanmır. Sadəcə o məlumdur ki, qadjetin displeyi 7 düym, işlək pressesoru isə 1.5 GHZ (!)-dir.
Mövzuya dair forumda müzakirələr ↓
Texnoloji yeniliklər
Çoxdandır ki, vaxt azlığından filmlərə baxa bilmirəm. Amma son 10 gündə imkan edib bir neçə filmə baxdım, onlara dair fikirlərimlə bölüşürəm. Filmlər — Путешествия Гулливера (Gulliver’s Travels), Вверх (Up), Санктум (Sanctum), Гадкий я (Despicable Me).
Путешествия Гулливера (Gulliver’s Travels)
Bu filmə bir ay öncə baxsam da, filmə dair resenziya ilə bu gün bölüşürəm. Özü kimi primitiv filmi hələ fikirləşmək lazımdır. Dəhşət. İtirdiyim vaxtıma çox heyfim gəldi.
Demək olar ki, bütün aktyorlar “anloqu olmayan” tərzdə rolları süni ifa edirlər. Bircə Jack Black nəsə etməyə çalışır, amma tək əldən səs çıxmaz. Nəticədə mənasız və axırı ilk saniyələrdən bilinən bir film alınıb. Belə filmlər 90-cı illərdə dəbdə idi, amma indi 2011-ci ildir. Ssenarini danışmayacam, bircə deyə bilərəm ki, mənasızlığın son həddidir.
Filmə baxmağı heç bir halda məsləhət bilmirəm. Vaxtınızı daha faydalı şeylərə sərf edə bilərsiz, bu film isə vaxt itkisindən başqa bir şey deyil. 10 ballıq şkala ilə qiymətim 0 bal.
PS. Bu filmdə 3D də həddən artıq keyfiyyətsiz təşkil edilib.
**************************
Вверх (Up)
Coxdandır ki, bu filmə baxmağa tərəddüd edirdim, treylerindən mənə nəsə bir uşaq filmi kimi gəlirdi. Amma bir məsləhətdən sonra baxmaq qərarı verdim. Çizgi filmi olsa da özündə böyük məna daşıyan bu film dərhal mənim ən sevimli filmlərdən birinə çevrildi. Filmdə həm qəm, həm də xoşbəxtlik yan-yanadır.
Mükəmməl ssenarini qısaca danışım — film bir balaca oğlancığazın həyatından bəhs edir. O kiçik yaşlarında olarkən öz yarını tapır — onları bir əlçatmaz arzu birləşdirir — uzaq sahillərdə yerləşən bir şəlalənin yanında ev tikib, birgə yaşamaq. Böyüdükdən sonra cütlük evlənir. Amma xoşbəxtlik çox çəkmir, cavan ailənin uşağı olmur. Həyat isə öz axarında davam edir. Cütlük qocalır. Artıq qoca birisinə çevrilən, amma daxilən hələ də cavan baş qəhramanımız həyatda tək qalır — yarı vəfat edir. Kədərinə qapanmağa başladığı vaxtda balaca bir uşaq peyda olur və yeni macəralar başlayır.
Bu filmə 10 baldan 10+ bal verirəm. Həddən artıq gözəl bir filmdir. Mütləq baxın. Məsləhətdir.
**************************
Санктум (Sanctum)
Kemeronun bu işi haqda çoxlu rəylər bildirilib. Kimisi pisləyir, kimisi tərifləyir. Açığı film ilk yarım saat ərzində təmamilə xoşuma gəlmədi — aktyorların olduqca süni rolu, ssenarinin həddən artıq zəif olması özünü bildirirdi. Amma filmdə hadisələr cərəyan etdikcə, bir-birinin dalınca insan faciələrin şahidi olduqca, filmə maraq artdı. Görünür Kemeron zəif ssenarini filmdəki faciəvi səhnələrin bolluğu ilə kompensasiya etmək istəyib. Bu hardasa onda alınıb.
Adət üzrə ssenarini qısaca danışım — Mağaraları öyrənən bir elmi tədqiqat qrupu “analoqu olmayan” bir mağara sisteminə rast gəlir və bütünlüklə özünü onun öyrənilməsinə sərf edir. Amma çox keçmir ki, cansız daş parçası öz sərt üzünü göstərir — insanlar bir-bir müxtəlif vəziyyətlərdə faciəvi şəkildə ölməyə başlayırlar. Bir tərəfdən də tufan qopur — mağaralar su ilə dolmağa başlayır. Ssenaridə baş verəcək hər dramatik olayı 10-20 dəqiqə öncədən tapırdım — bu da ssenarinin standart olmasından irəli gəlir. Digər maraqlı bir cəhət — filmdə kim pessimistləşməyə başlayır — deməli növbəti qurban o olacaq. =)
Filmə qiymətim 10 baldan 8 bal. Niyəsini əmmaların olmasındadır. Birinci əmma — görünür Kemeronun yaşı artdıqca, onda Tarantino sayağı sadizm çoxalmağa başlayır — filmdə yeri gəldi-gəlmədi meyitləri göstərilməsi, sadizm səhnələrini qeyd etmək istəyirəm. Anlayıram, film real hadisələr əsasında çəkilib və reallığı əks etdirmək üçün bu kimi səhnələr vacibdir, amma day bu qədər də yox də. İkincisi yuxarıda qeyd etdiyim kimi, ilk yarım saatda aktyorların həddən artıq süni oyunu.
Onu da qeyd edim ki, qoca Kemeron filmi super effektlərlə tərtib edib, hər şey çox real görünür, 3D də səviyyəsiz “Qulliver” filmindəkindən ən azından 100000000000000 dəfə keyfiyyətlidir.
**************************
Гадкий я (Despicable Me)
Megamind-ı təkrarlayan, daha doğrisu Megamind-ın təkrarladığı bir film. Ssenarilər demək olar ki, eynidir — eyni mərdimazar qəhraman, eyni olaylar, sadəcə Megamind-da baş qəhramanı mərdimazarlıqdan uzaq edən qadın gözəlliyidirsə, bu filmdə səbəb 3 yetim uşaqdır. Ssenarini danışmayacam, bunun üçün Megamind üçün yazdığım resenziya ilə tanış ola bilərsiz.
Onu da qeyd edim ki, film ilk əvvəl çox əla və maraqlı başlamışdı, amma filmin ikinci yarısı standart ssenari üzrə inkişaf edir, bu da onu tam mənasızlaşdırır. O səbəbdən filmə qiymətim 10 baldan 7 bal.
PS. Megamind-dan bu film daha effektli və maraqlı alınıb.
Mövzuya dair forumda müzakirələr ↓
Ən son izlədiyiniz film
Dünyanın, proqressiv insanlığın başı Misirə qatışdığı bir vaxtda, Qazaxıstanda traqikomik hadisələr baş verir. Görünür, köhnə qurd Nursultan Nazarbayev xalqıyla manipulyasiya üçün gözəl vaxt seçib. Əsl tamaşa qurub. Guya qocanı Qazax xalqı 20-ci ilə kimi prezident görmək istəyir, bu da var gücü ilə buna “qarşı” çıxır. Əhsən. “Əsl” demokrat. Görəsən bu komediyaya Nazarbayevin özündən başqa Qazaxıstanda inanan var?! Çətin.
Xatırladım ki, 14 Yanvar tarixində Qazaxıstan parlamenti Nursultan Nazarbayevin 2020-ci ilə kimi heç bir seçkisiz prezident olmasını təmin etmək üçün Konstitusiyada dəyişiklik edib. “Əsl demokrat” Nursultan bəy isə guya buna etiraz olaraq bu qərara veto qoyub. Parlament isə Nursultanın vetosunu ləvğ etmə hüququndan istifadə edib (!). Qazaxıstan kimi avtoritar bir dövlətdə parlamentin prezidentə qarşı çıxması olayı absurd olması kimi traqikomikdir. Day bu qədər də yox də… Xalqla məzələnmə prosesi bununla bitməyib. Nursultan eləmə tənbəllik Konstitusiya məhkəməsinə müraciət edir və “müstəqil” məhkəmə parlamentin qərarını ləvğ edir. Burada adamın lap ağlamağı gəlir. Ay yazıq… Hüsnü Mübarəkin həyat yolu sənə dərs olmadı? Yəqin ki, olmayıb. Belə olmasaydı, “demokrat” qoca yeni prezident seçkilərinin keçirilməsini (mütləq öz iştirakı ilə) istəyib, buna nail olmazdı…
Nəsə. Allah sənə o kreslonu çox görsün, ay Nursultan…
Mövzuya dair forumda müzakirələr ↓
Qazaxıstan. Qoca aktyorun teatrı…
Havalar soyumaq bilmir ki, bilmir. Bir gün yağış yağdı, yığılan mənfi enerjimizdən azad olmağa çalışırdıq ki, yenə də bu vaxt üçün anormal Günəş çıxdı. Özü də fikir vermişəm, fəsil dəyişikliyinin baş verməməsi insanlara çox böyük mənfi təsir göstərir — hər kəs birə-beş aqressivləşib, pessimistləşib. Hələ dili qurumuş sinoptiklərimiz Yanvar ayının “analoqu olmayan” tərzdə isti keçəcəyini proqnozlaşdırırlar.
Nəsə. Hava cəhənnəm, amma məhsulların qiymətləri deyəsən qaynamağa başlayıb — qiymətlər “sakitcə” 20% qaldırılıb. Fakt — digər məhsulları deyə bilmərəm (evə bazarlığı mən etmədiyimdən), amma ev üçün gündəlik aldığım yeganə məhsul — Yessentuki-17-nin qiyməti növbəti dəfə qaldırıldı. Özü də bütün marketlərə baxmışam. Lider AS-dan tutmuş Neptuna kimi. Neptunda Yessentuki-17 (Vim-bil-dam istehsalı olan) 1 manat 10 qəpik, Lider AS-də isə 1 manat 20 qəpiyədir. Keçən il bu vaxtı sözü gedən məhsul cəmi 70-80 qəpik idi. 70 qəpik hara, 1 manat 20 qəpik hara. Bu 70% bahalaşma deməkdir. Dünya birliyi isə hələ də susur. 😆
Digər tərəfdən bu ola bilər sırf Yessentuki-nin Azərbaycandakı rəsmi distributorunun görməmişliyinin nəticəsidir. Hər şey ola bilər. Gündəlik təlabat mallarını alıb, bazarlıq edən şəxslər bunu daha yaşı bilər — digər məhsullarda da artım müşahidə olunur?!
“Dünya birliyi” susmayıb, neynəyəcək axı. Xəzər Xəbər kimi “səviyyəli” bir verlişi olan ölkə üçün 70% inflyasiya hələ azdır. Bu gün təsadüf nəticəsində bu “xəbərlər” verlişinə baxdım. Çox aktual bir xəbəri verirdilər — marşrut avtobusunun siqnalı xarab olmuşdu, dayanmadan duuuuuuldayırdı. Buna görə milləti sorğu sual edirdilər, qara millət də “televizora düşmək” üçün əldən ayaqdan gedirdi. İndən belə maşının təkəri buraxanda, mütləq gərək Xəzər Xəbər əməkdaşlarını çağıram, bundan da aktual xəbər?!
Yazımın əvvəlin də hava ilə başladım, sonunu da onunla bitirirəm. Biz istidən qrilə döndüyümüz bir vaxtda Rusiyada şiddətli qar yağmaqda davam edir. Yolları isə Rusiya (deyərdim bütün post-sovet ölkələri) sayağı təmizləyirlər. Aşağıdakı bir video-çarxa baxın. Deməli iki traktoru birləşdiriblər ki, yanacaq sərf edilsin, gedib desinlər ki, guya yolu təmizlədilər. Əhsən. Belə şeyləri görəndə bir daha əmin olursan ki, bütün bu korrupsiya və özbaşnalığın mənbəyi zəhrimar kommunist təfəkkürüdür, virus kimi yeriyib hər birimizin canına.
Nəsə. Allah köməyimiz olsun.
Mövzuya dair forumda müzakirələr ↓
Son olaylar. Nələr baş verir?!
Son günlər ofis işlərimizin həddən artıq çox olması səbəbindən (Maşallah), bloqda aktiv ola bilmirəm. İlin son günləridi deyə, hər kəs sifarişləri tələm-tələsik istəyir. İnşallah işləri bitirib yenidən aktivliyimi qaytaracam. Keçək mətləbə. Həftə ərzində baxdığım filmlərə dair fikirlərimlə bölüşürəm — Ниже холма 60 (Beneath Hill 60), Мальчики-налетчики (Takers), Вы не знаете Джека (You Don’t Know Jack), Скайлайн (Skyline), Дьявол (Devil), Казино Джек (Casino Jack), Социальная сеть (The Social Network), Монстры (Monsters), Курьер (Coursier).
Ниже холма 60 (Beneath Hill 60)
Film real hadisələr əsasında çəkilib. Triller, dram janrındadır. Filmdə hadisələr 1-ci dünya müharibəsi vaxtı baş verir. O vaxtlar sadə əsgərlərlə yanaşı şaxtaçılar da bir-birləri ilə müharibə aparırdılar. Düşmən postlarının altından yeraltı keçidlər qazıb, onları partlatmaq filmin baş qəhramanın əsas vəzifəsidir. Çoxsaylı itkilərdən sonra o daha məsuliyyətli bir seçim etməlidir — ya düşmən postunu partlatmalı, ya da ki yaxın doslarına çevrilmiş əsgərləri qurban verməlidir.
Yaxşı filmdir. Təsir edicidir. 10 ballıq şkala ilə 8 bal.
******************************
Мальчики-налетчики (Takers)
2010-cu ilin son filmlərindəndir. “Ouşenin dostları” seriyasından növbəti bir filmdir. Filmin fərqli cəhəti — Ouşenin ölməz komandasından fərqli olaraq bu filmdə baş qəhramanlar heç də ölməz deyillər. Ssenarida böyük boşluqlar olsa da, aktyorların gözəl oyunu filmi baxımlı edir.
Ssenari standartdır. Baş qəhramanlar — dostlar oğurluqla həyatlarını qurub, zəngin insanlara çevrilirlər. Amma birdən O gəlir. O — onların biridir və tezliklə hər şey dəyişir. Bir şey xoşuma gəldi — baş qəhramanlardan biri — polismen — bu tip filmlərə xas sonda ölməz və qalib deyil, məğlub kimi filmi bitirir.
Baxmağa dəyər. 10 ballıq şkala ilə 8 bal.
******************************
Вы не знаете Джека (You Don’t Know Jack)
Filmə dair İnternetdə çoxlu maraqlı resenziyalar oxumuşdum. Demək olar ki, hər kəs tərifləyirdi. Özü də baş rolda Al Paçino çəkilib. Baxmaq qərarı verdim. Amma filmin ilk 10 dəqiqələrində anladım ki, film erməni əsilli və “ölüm həkimi” adlandırılan Jack Kevorkian haqda çəkilib. Filmə baxmaqda biraz tərəddüd etdim, amma Al Paçinonun gözəl oyunu məni baxmağa davam etməyə məcbur etdi. Filmin ssenarisi real hadisələr əsasında çəkilib. Ölümcül xəstələrin həyatlarına “ölüm həkimi” bir-bir eftanaziya vasitəsilə son qoyur. Əslində ilk olaraq bunu onların özləri istəyirlər, amma sonradan həkimdə bu hadislər sanki bir oyun həvəsi, bir azart yaradır və öldürülmüş pasientlərin sayı yüzü keçir .
Onuda qeyd edim ki, çox ağır filmdir (mənəvi cəhətcə). Ürəyi zəif olanlar qəti şəkildə bu filmə baxmasınlar. Sonra 2-3 həftə filmin ağırlığı altında gülümsəyə bilməzlər.
Filmdə hər şey gözəl çəkilib, əsasən metr Al Paçinonun oyunu insanı valeh edir. Amma bir məyus edici şey var, o da ki qondarma “erməni soyqırımını” filmdə qeyd edirlər, guya Kevorkianın ailəsi soyqırım qurbanlarıdır, ABŞ-a qaçıblar… Nəsə.
10 ballıq şkala ilə 8 bal. Qiymətini kəsməyimə səbəb — birincisi qeyd etdiyim kimi filmin həddən artıq ağırlığı, ikincisi isə filmi az da olsa siyasətə (soyqırım məsələsi) qarışdırdılar.
******************************
Скайлайн (Skyline)
Nəhayət ki, bu filmə də vaxt edib baxa bildim. Film fantastika janrında çəkilib. Ssenari mənasız olsa da, action effektlər filmə baxarkən darıxmağa qoymur. Aktyorların həddən artıq süni oynunu qeyd etmək istəyirəm.
Ssenari qısa olaraq — deməli Yer kürəsinə yad planetlərdən əcaib məxluqlar daxil olur, insanların beyinlərini oğurlayırlar. Niyəsinə film aydınlıq gətirmədi, çünki film boyu baş qəhramanların işi-gücü ancaq canlarını xilas etməkdən ibarət idi. Bu hardasa Monstro filminə bənzəyir (ən sevimli filmlərimdən biri), amma ssenaridəki çoxsaylı boşluqlar bu “xilas etmə əməliyyatını” mənasızlaşdırır. Sonra baş qəhramanın özü yad planetliyə çevrilir və film bitir. Demək olar ki, filmin nə mənası, nə də sonu aydın olmur.
Yuxarıdakılar nəzərə alaraq bu filmə 10 ballıq şkala ilə qiymətim cəmi 7 bal olacaq.
******************************
Дьявол (Devil)
Növbəti haqq-şər qarşıdırması. Film fantastika janrında çəkilib və özündə dini çağırış daşıyır — əgər İblis varsa, deməli Tanrı da var. Maraqlı filmdir. Amma ssenaridə olan boşluqlar mənim xoşuma gəlmədi. Boşluqlar haqqda biraz sonra, hələlik isə ssenarini qısaca danışım.
Deməli bir göydələndə lift xarab olur və liftin içərisində qalan insanlarla əcaib hadisələr baş verir. Məlum olur ki, onların hər biri bir günah sahibidirlər və İblis şəxsən özü onları bir araya toplayıb, günahlarına görə cəzalandırır. İnsanlar liftdə bir-bir ölməyə başlayırlar və qalanlar bu ölümlərdə bir-birlərini günahlandırırlar. Maraqlıdı.
Amma qayıdaq ssenaridəki boşluqlara. Boşluqlar çoxdur, bir neçəsin xatırladım: məsələn, məni çox maraqlandırır — Filmdə İblis öz üzərinə Allahın işini niyə götürüb?! Bəyəm İblis günahkarları cəzalandırandır? Axı bizim bildiyimiz dini qaydalara görə İblis əksinə günah sahiblərini xoşlayır, onları daha da çox günah etməyə sövq edir. Daha sonra anormal sonluq xoşuma gəlmədi. İblis sən demə oğru bir qoca qadın obrazında liftə daxil olub. Filmin kulminasiya nöqtəsində qoca qarının (İblisin) günahkarla dialoqu tupizmin pik həddidir.
Ümumidə götürdükdə isə yuxarıda da qeyd etdiyim kimi, özündə dini çağırış daşıyır. Ateizmdən əziyyət çəkənlərə bu filmə baxmağı məsləhət bilirəm. Özüdə bu filmə tək, qaranlıq otaqda baxmaq lazımdı, daha təsir edici olur.
Qiymətim — 10 ballıq şkala ilə 8 bal.
******************************
Казино Джек (Casino Jack)
Film real hadisələr əsasında çəkilib və məhşur lobbist Jack Abramovich-in həyatından bəhs edir. Bu filmi son vaxtlar baxdığım həyati filmlər arasında ən möhtəşəmi hesab edirəm. Film ABŞ “demokratiyasını” bütün çılpaqlığında bizə açıb göstərir.
Ssenari — Cek Abramoviç ABŞ-ın ən uğurlu və nüfuzlu lobbistidir. Cek istənilən qanun layihəsini Senat və Konqresdə asanlıqla keçirir. O istənilən konqresmeni, senatoru, siyasətçini pulla ələ alır. Hətta filmdə iddia edilir ki, Corc Buşun prezident olmasında onun əvəzedilməz rolu olub. Cek həyatını 4 prinsip üzərində qurulub — Tanrı, İnam, Vətən və onlardan heçdə az lazım olmayan Nüfuz. Cek həm də öz ailəsinə çox bağlı insandır. Amma ifrat pullar onu qanunsuz layihələrə əl qoymağa sövq edir və nəticədə belə gözəl bir filmə ssenari ola biləcək hadisələr baş verir.
Kevin Spacey-nin möhtəşəm ifasını qeyd edə bilmərəm. Super!
10 ballıq şkala ilə qiymətim 10 bal.
******************************
Социальная сеть (The Social Network)
Növbəti real (deyilənə görə) hadisələr əsasında çəkilmiş bir film. Açığı mən bu filmə sırf Facebook kimi böyük layihələrin necə ərsiyəyə gəlməsinin şahidi olmaq üçün baxdım və bir daha əmin oldum ki, Azərbaycan reallığında bu kimi böyük layihələr heç vaxt baş tutan deyil. Səbəblərini qonşu mövzuda açıqlamışam, ona görə keçək ssenariyə. Ssenari bir proqramistin həyat və yaradıcılığından, onun böyük pullara doğru necə addımlamasından ibarətdir. Film xoşuma gəldi.
10 ballıq şkala ilə qiymətim 10 bal. Deyə bilərsiz niyə məhz 10?! Çünki film bu sahədə çalışanlar üçün müxtəlif vacib sayıla biləcək xəbərdarlıqlar da edir.
******************************
Монстры (Monsters)
Filmdən ən azı “Mostro” səviyyəsində bir ssenari gözləyirdim, nəticədə isə üçüncü səviyyəli bir filmə baxmalı oldum. Mənasızlıq.
Ssenarini qısaca danışım — Guya Meksika ərazisində (yazıq meksikallılar) yad planetli məxluqlar peyda olur, özləri üçün yaşayırlar. ABŞ isə (həmişə olduğu kimi) inkişafdadır və öz “mərhəmətli” əlini Meksikaya uzadır, onun torpaqlarını kimyəvi bombardımana məruz qoyur. Axı meksikalılara kim demişdi, ayından kömək istə? =) Nəsə. Filmdə ABŞ yüksək texnoloji bir ölkə, Meksika isə Mozambik səviyyəsindəndə aşağı bir yer kimi təsvir edilib.
Baş qəhraman — bir fotoqraf öz bossunun nişanlı (başqasına, fotoqrafa yox) qızını Meksikadan ABŞ-a gətirməlidir. Film qızın Meksikada nə axtardığından və onu niyə məhz fotoqrafın xilas etməli olduğundan söz belə açmır. Fotoqraf qızı ABŞ-a çatdırmalıdı. Meksika da, dediyim kimi rəhmətlik ekstrasens “osminoq” Paulun qohumları ilə doludur (filmdə osminoqlar yad planetli kimi qələmə verilir). Sonda nişanlı qız fotoqrafa aşiq olur… Bir sözlə, əvvəlcədən hər şeyin məlum olduğu bir film.
Boş yerə itirdiyim vaxtıma çox heyfim gəlir. Bu filmin adı — “Paul və onun qohumları” və ya “Nişanlı qız necə başqasına aşiq oldu” olmalı idi, amma heç bir halda “Monsters” olmalı deyildi.
Aktyorların (əsasən də xanım baş qəhramanın) süni oyunlarına görə məncə ilin anti-oskarını vermək lazımdır.
10 ballıq şkala ilə qiymətim 2 bal.
******************************
Курьер (Coursier)
Tipik fransız komediyasıdır. Mənasız və ironik. Aktyorların oyunu orta-babatdır. Çəkiliş isə deyərdim əla, amma filmdə eləbil nəsə çatışmır. Bu da ola bilsin ssenarinin biraz primitiv olmasından irəli gəlir.
Ssenari demişkən — guya bir kuryer təsadüfən mafiyanın oyunlarının iştirakçısı olur. Nəticədə məlum olur ki, bu kuryer sən demə supermendir. =)
10 ballıq şkala ilə qiymətim 6 bal.
Mövzuya dair forumda müzakirələr ↓
Ən son izlədiyiniz film
Biz Azərbaycanlılar fərqliyik. Bu fəqliyimiz bizim “analoqu olmayan” mentalitetdə, dünya görüşümüz və hadisələrə unikal baxışlarımızda öz əksini tapır. Maraqlı xüsusiyyətlərimiz çoxdur. Məsələn, bütün dünya car çəkib təhlükəsizlik kəmərindən istifadəni məsləhət gördüyü halda, Azərbaycanlı sürücülər bunu qətiyyətlə etmirlər — çünki bu “zapodlo”-dur. “Əşi, filankəs görər, sonra bəs deməz ki, o nədi 10 manat cəriməyə görə özünü bürümüsən… Ayıbdır. Adımız var, sanımız var. Kəmər bizlik deyil.”
Belə bir hadisə real həyatda da baş verib. Deyilənə görə bir qaqaşı rəşadətli yol polislərimiz saxlayıb, onun kəmər vurduğunu görəndə deyiblər — ayə yekə kişisən, 10 manat cərimə ödəyəcəksən deyə bu nədi dolamısan özünə. Bəlkə elə ona görə də bərk gedən qaqaşlar, ümumiyyətlə sürücülərin əksəriyyəti (deyərdim 99%-i) avtomobil sürərkən heç bir halda kəmər vurmurlar. Kimisi bunu kəmərə öyrəşmədiyinə görə etdiyini deyir, kimisi guya kəməri taxarkən ürəyi sıxıldığını bəhanə gətirir, amma əsl səbəb — sosial qınaqdır, kiminsə bunu söz etməsindən qorxmaqdır. Bir şey unudulur — bu təhlükəsizlik kəməri məhz TƏHLÜKƏSİZLİK kəməridir, cərimə verməmək üçün vasitə deyil. Bu ilk öncə sürücünün, sərnişinlərin həyatını gözlənilməz hadisədən qorumaq üçün nəzərdə tutulub, polislərin yanından rahat ötüb-keçmək üçün deyil. Axı həyat bizə bir dəfə verilir, onunla niyə kiminsə sözünə görə risk edək? Axı səhər bir hadisə olsa, bu sizə olacaq, kəmər taxmağı söz edən Gülməmmədə deyil…
Təhlükəsizlik kəmərindən istifadə edilməməsinin digər səbəbi də post-sovet ölkələrinə xas — ifrat pofiqizmdir. İnsanların öz həyatlarına, təhlükəsizliklərinə biganəliyi.
Təhlükəsizlik kəmərlərinizi mütləq taxın. Həyatınıza qarşı biganə olmayın.
Sonda çox təsir edici bir video çarxa baxmağa dəvət edirəm. Siz yalnız özünüz üçün yaşamırsınız, bunu unutmayın!
Allah bizi qorusun!
Çarxa mütləq səslə baxın. Onda daha təsir edici olur.
Mövzuya dair forumda müzakirələr ↓
Təhlükəsizlik kəməri sizin üçün nədir?
Artıq uzaq görünən 2007-2008-ci ildə ilişib qalan Nokia, özü kimi populyarlığını günbəgün itirən Röyaya əcaib sözləri (HDMI, USB, Carl Zeiss və sair) deməyə məcbur etdirdiyi bir vaxtda, Nokia-nın rəqibləri daha əməli işlərlə məşğuldur. Nokia vaxtı ilə Motorola və Ericsson-un keçdiyi uğursuz yolu təkrarların. Ericsson demişkən, son 2 ildə SONY şirkəti də əməlli başlı rəqabətdən geri çəkilib, öz pozisiyaların rəqiblərinə verməkdədir.
Sony-nin subbrendi Sony Ericsson bazarı itirməkdə davam edir. Onsuzda böyük olmayan satışları 1/5 azalıb. Nokia SE-na baxıb təsəlli tapa bilər, amma digər rəqiblərinə — əsla yox. Son illər Samsung, Apple, RIM (Blackberry), LG və HTC yeni texnologiyaların uğurlu tətbiqi ilə məşğuldular. İndi aktiv oyunçular Nokia-nın tədricən çəkildiyi bazarı mənimsəyib, satışlarını artırırlar — götürək HTC-ni. HTC 2010-cu ildə ümumi smartfon satışını 2 dəfə artırıb. 2011-ci ildə isə bu rəqəmi 300% (!) çatdırmağı planlaşdırır. Kimin hesabına? Əlbətdə ki, Nokia-nın hesabına. Hələ gəlirlərinə görə Nokia-nı dəfələrlə üstələyən Apple, Samsung-u, RIM-i demirəm. Nokia smartfon bazarını demək olar ki, tamamilə əldən buraxıb. Niyə? Səbəbini inkişaf etmək istəyinin olmamasında görürəm — Nokia hesab edirdi ki, ən yeni texnologiyaları o özü təyin etdiyi vaxtda kütləyə buraxacaq, hər şeyi kontrol edəcək və lider qalacaq — beləcə o tədricən passivləşdi. Texnologiya aləmində isə passivləşmək qaçılmaz ölüm deməkdir. Digər tərəfdən Nokia-nın axrına Symbian çıxdı, 2003-cü ildən bəri demək olar ki, cüzi şəkildə dəyişilən bu platformadan Nokia hələ də istifadə etməkdədir. Axı nə qədər olar?! Digər ümüd etdiyi platforma MeGoo — anadan olmamış iflasa uğrayıb — MeGoo platformalı N900 telefonlarının satışı barmaqla sayılasıdır…
Bizim millətin bəyənmədiyi LG-də Nokia-nın yiyəsiz qalmış müştəriləri uğrunda mübarizəyə qoşulanlardandır — bu günlərdə LG dünyada ilk dəfə Android platforması üzərində işləyən iki nüvəli prosessorlu smartfonu təqdim etdi. LG Optimus 2X özündə çox saylı texnoloji yenilikləri cəmləşdirdiyi kimi gözəl görünüşə də malikdir.
Hə. Qayıdaq Nokia-yaya. Ola bilsin bizim xalqın konservatorluğu Nokia-nın Azərbaycanda satışlarını bir neçə müddət yüksək səviyyədə qalmasına imkan verəcək. Bəlkədə. Amma fakt fakt olaraq qalır. Bir vaxtlar keyfiyyət və prestij markası olan Nokia artıq keyfiyyətsiz və geridə qalmış telefonlar istehsal edən şirkət kimi qəbul edilir. Kütlə isə belə şeyləri sevmir… Kütlə daha baha və adlı-sanlı markalara can atır. Deməli Azərbaycanda da Nokia-nın ömrünə çox qalmayıb.
Mövzuya dair forumda müzakirələr ↓
Genanın qara PRı və Nokiananın qəzəbi -) (N8 vs E7)
Hə… Liza Simpson da Azərbaycan haqqında danışdı. Özü də danışmağı dərd yarı, sən demə o bizi BMT-də təmsil edirmiş, bizim heç xəbərimiz də yoxdur.
Məşhur Simpsonlar çizgi serialının qəhramanlarından olan balaca Liza növbəti filmlərin birində Azərbaycanı təmsil edir. Cəsur Liza xanımın düyünün rüsumlarını qaldıracağı ilə bağlı Azərbaycan adından BMT üzvlərinə hətta hədə-qorxu gəlmək planları var. Ay səni, Liza… Neft olsaydı, yenə başa düşmək olardı, amma Azərbaycanın düyü ixracı… Deyəsən amerikallılar bizi induslarla səhv salıblar, Vallah. :hm: Ümumiyyətlə, axır vaxtlar Amerika üçün Azərbaycan faktoru yaman aktuallaşıb. Allah axırını xeyir eləsin.
Ölmədik, bu günü də gördük — Günəşi rəsmi olaraq özəlləşdirdilər. Milliardlarla il azad ömür sürdükdən sonra indi Günəşin də yiyəsi var — bu İspaniyanın Galicia bölgəsinin sakini 49 yaşlı Angeles Duran adlı bir xanımdır.
Bu “fərasətli” qadın əməlinə belə açıqlama verib — “Mən bütün hüquqi məsələri gözəl bilirəm, elə ona görə də rəsmi orqanlara müraciət etdim və mənim sorğum təmin edildi. Ağılsız deyiləm ki, Günəşi kiməsə verim… ” Hə, “çox ağıllı” xanımın Günəşə dair Notariusda təsdiq edilmiş sənədi də var. İspaniyanın dövlət Notarius təsdiq edir ki, Angeles Duran həqiqətən G2 tipli spektral ulduz olan və Günəş sisteminin mərkəzində yerləşən Günəş adlı ulduzun qanuni sahibidir.
Günəşə dair gələcək planlarını açıqlayan fırıldaqçı qadın günəşi parça-parça satmağı planlaşdırdığını deyib. Əhsən.
Günəş demişkən. WikiLeaks saytının “günəşi” də bu saat ən parlaq anını yaşayır. Ötən yazımda qeyd etdiyim kimi, ABŞ-ın xarici siyasətinin yeni vuran “dubinkası” olan bu sayt dövlət departamentinə arxalanıb ABŞ-dan başqa demək olar ki, bütün dövlətlərin başçılarına, ölkələrin apardığı xarici və daxili siyasətə “ilişir”. Düzdür, hərdən lap ağ olmasın deyə, Amerikayada bir iki söz atır, amma yazılarının böyük əksəriyyəti digər ölkələri əhatə edir. Ən maraqlısı odur ki, bu dərgi indi də başlayıb ölkələrin birinci xanımlarına dair kompromatlar dərc etməyə. Məsələn, bu dəfə WikiLeaks Rusiyanın birinci xanımı Svetlana Medvedevaya dair “məxvi” sənədləri üzə çıxarıb, amma nədənsə özünü “müstəqil” adlandıran bu dərgi Amerikanın ilk qara dərili prezidentinin kameralar qarşısında aktyorluq edən və ağ evi xiyar-pomidor-balqabaq bostanına çevirən həyat yoldaşı haqqında bircə kəlmə də olsa söz açmır. Ucuz tamaşa. Amerika nə gündəsən?! 😀
Mövzuya dair forumda müzakirələr ↓
Son olaylar. Nələr baş verir?!
Bu həftə Maşallah o qədər iş olub ki, vaxt edib barmaqla sayılası filmlərə baxa bilmişəm. Bu dəfəki qurbanlarım — Аджами (Ajami), Скотт Пилигрим против всех (Scott Pilgrim vs. the World), Побег из Вегаса (Get Him to the Greek), 500 дней лета ((500) Days of Summer), Конец света (End of Days) və Перси Джексон и похититель молний (Percy Jackson & the Olympians: The Lightning Thief).
Bir bir sadalayaq.
Аджами (Ajami)
Bu filmə baxmağa yaxın qardaşların biri məsləhət etdi. Film triller, psixoloji dram janrına çəkilib. İsrail filmidir. Filmin belə möhtəşəm ssenariyə malik olmasını heç gözləməzdim. Aktyorların gözəl oyununu da qeyd etmək istəyirəm.
Ssenari hardasa Hindistanın “Zibillik Milyonçusu” filminə bənzəyir. Amma orada sonluq real həyata xas olmayan “happy-end”-lə bitirsə, burada sonluq kövrəldicidir… Filmdə söhbət fələstinli bir dinc ailədən gedir. Əsas qəhramanlar 2 azyaşlı gəncdir. Ssenarini qısaca danışım — bu gənclərin əmisi oğlu kafesinə hücum edən bir bir dələduzu güllələyir. Bu dələduz da sən demə fələstinin nüfuzlu kriminal ailələrinə mənsub olur və ailələr arasında qan müharibəsi başlayır. Daha doğrusu dələduzlar dinc ailənin bütün üzvlərini güllələməkdə qərarlıdırlar. Bir neçə nəfər qurban gedəndən sonra, növbə 2 azyaşlı gəncə çatır. Qohum-qonşu bu azyaşlıları xilas etmək üçün ailələr arasında barışıq elan edirlər, amma bir şərtlə — bu iki gənc sağ qalmaları üçün dələduzlara külli miqdarda pul verilməlidirlər… Bununla da gənclərin onsuzda asan olmayan həyatları daha da mürəkkəbləşir, onlar kriminal işlərə əl atmalı olurlar… Qalanına özünüz baxsanız yaxşıdı. Gözəl filmdir. Film məşhur “Pulp Fiction” stilində çəkilib, yəni bir neçə səhnəcikdən ibarətdir.
Filmdən bir sitat çox xoşuma gəldi — o yerdə ki, məyusçuluq və kasıblıq hökm sürür, mafiya idarəçilik edir, o yerdə barmaqlar tapançadan güllə atmağa can atır, əl isə öldürmək üçün asanlıqla bıcaqı götürür…
Məsləhət görürəm. 10 ballıq şkala ilə 10 bal.
******************************
Скотт Пилигрим против всех (Scott Pilgrim vs. the World)
Film industriyasında inqlab edəcək yeni ideyalı bir film. Bu filmə sırf filmdə demək olmaz. Oyun, komik və bədii filmin miksindən yaradılıb. Məzəli çəkilib, mənim çox xoşuma gəldi. Film bir anda baxılır, sanki hansısa maraqlı bir oyunun şahidisən. Onu da qeyd edim ki, eyni adlı oyun da çox populyardı.
Filmin ssenarisi də maraqlıdı — deməli adəti üzrə bir cavan oğlan (qəhraman — Scott) bir qıza vurulur. Amma o qız sirli birisidir və Scott onunla əlaqəyə girən kimi oyun sayağı antiqəhramanlarla vuruşmağa məcbur olur. Hər qalib gələndədə o xallar (bonuslar) qazanır. Son anti-qəhramanı öldürdükdən sonra, o xallarını maksimum edir və yeni bir can qazanmış olur. Növbə çatır super finala. Super finalda o məğlub olur, ölür. Amma axı o can qazanmışdı! 😆 Scot bonus candan istifadə edib yenidən həyata qayıdır və bu dəfə qalib olur. Deyərdim cox mırt kinodur. Əgər keyfiniz yoxdursa, adi filmlərdən bezmisinizsə, nəsə qeyri-adi bir filmə baxmaq istəyirsinizsə, onda bu film sizin seçimdir.
Filmin adın mən belə qoyardım — Botanın (botanik) sərgüzəştləri.
Qiymətim 10 ballıq şkala ilə 10 bal. Ən sevimli filmlərimin sırasına yazdım.
******************************
Побег из Вегаса (Get Him to the Greek)
Bu filmi 2010-cu ilin ən yaxşı komediyalarından saymaq olar. Film çeynənilmiş mənasız və şit zarafatlardan uzaqdır. Amma başdan-ayağa böyük bir məzədir (hardasa məna da kəsb edən).
Ssenarini adi saymaq olar — deməli böyük bir səsyazma studiyasında çalışan baş qəhramana tapşırılır ki, keçmişin ən populyar ulduzunu yeni konsert vermək üçün yola gətirsin. Beləliklə, zahirən Lider-in əməkdaşı Murad Arifi xatırladan baş qəhraman yola düşür Londona və… keçmiş ulduzun gündəlik keyf həyatının bir hissəsinə çevrilir. Amma gündəlik keyfin özü də bezdiricidir. Bizim qəhraman da bezir və keçmiş ulduzun həyatında dəyişikliklər etməyə çalışır.
Aktyorların gözəl oyununu qeyd etmək istəyirəm.
10 ballıq şkala ilə qiymətim 9 bal.. Baxmaq məsləhətdi
******************************
500 дней лета ((500) Days of Summer)
Anlamaq olmur, bu film drama janrında çəkilib, yoxsa “vse-taki” traqi-komediyadır. Bir sözlə növbəti qeyri-adi film. Əvvala qeyd edim ki, aktyorlar onlara həvalə etmiş rolların öhdəsindən məharətlə gəlirlər.
Ssenari isə — baş qəhraman təbrik açıqcaları istehsal edən bir şirkətdə çalışır. Maraqsız həyat sürür. Hər gün ev-iş, iş-ev. Bir gün ofisdə yeni işçi — Summer (Yay) adlı bir qız peyda olur və bununla da onun həyatı tam dəyişir. Hadisələr bir anda inkişaf edir və baş qəhramanla qız görüşməyə başlayırlar. Amma çox keçmir ki, Summerin hissləri qəhramanımıza qarşı soyurur. Qızı dəlicəsinə sevən oğlan isə az qalır başını itirsin. Məlum olur ki, Summer nişanlıdır.
Filmin başlığı ümumiyyətlə super idi. Deməli ilk olaraq yazılır — Bu filmdə cərayan edən hadisələr həqiqətə uyğun deyil və hadisələrin real insanların həyatı ilə üst-üstə düşməsi sırf təsadüfdür. Əsas da sənin həyatınla Jenny Beckman. Qancıq (Suka). 
Filmin özü gözəl və maraqlı olsa da, sonda mənası məni açmadı. Ona görə 10 ballıq şkala ilə 8 bal verirəm.
******************************
Конец света (End of Days)
Fantastik trillerdir. Yenə də dünyanın sonudur. Yenə də dünyaya antixrist gəlir. Yenə də hər şeyi qaynadıb-qarışdıran İblisdir. Yenə də dünyanın xilaskarı ölməz Şvartsdır (düzdür, axırda ölür). Hə, bu filmdə baş qəhraman uşaqlığımızın məşhur aktyoru Arnold Schwarzenegger-dir.
Film uzaq 1999-cu ildə çəkilsə də, mənim üçün tapıntı oldu. Gəzəl çəkilib, əsasəndə İblis rolunu oynayan Gabriel Byrne-nın məharətlə yaratdığı obrazı qeyd etmək istəyirəm. İblis rolunu heç metr Al Paçinonun özü belə oynamayıb. Filmi biraz maraqsız edən Şvartsın zəhlə tökən ölməməzliyidir. Amma onu da etiraf etmək lazımdır ki, bu filmdə Şvartsın oyunu bəlkədə karyerası boyu oynadığı ən yaxşı aktyor oyunu idi.
10 ballıq şkala ilə qiymətim 7 bal.
******************************
Перси Джексон и похититель молний (Percy Jackson & the Olympians: The Lightning Thief)
Yunan mifologiyasını uşaqlıqdan sevdiyim üçün bu filmə baxmaya bilməzdim. Amma gözlədiyimi almadım. Yenə “Битва Титанов” filmində olduğu kimi burada da mifologiyaya aid olmayan Hollywood sayağı müasir Zevs, Poseydon və Aidlərin arasında dava düşür. Lakin burada pis “dayday” rolunu Poseydon yox, Zevsin özü oynayır. Effekt sarıdan film gözəl tərtib olunub, amma ssenari sarıdan zəifdir.
Ssenari — Poseydonun zinədən olan oğlu Persi Zevsin qəzəbinə tuş gəlir. Qəzəbin səbəbi Zevsin ildırımlarının itməsidir. Qüdrətli Zevs elə bilir ki, ildırımlar Persidədir, amma yanılır… Heç qüdrətli Tanrı-da yanılar? Nəsə. Aktyorlarında zəif oyunu filmi lap mənasızlaşdırır. Filmə baxdıqdan sonra itirilmiş vaxtıma heyifim gəldi.
10 ballıq şkala ilə qiymətim 3 bal. Çox yox, o da ki effektlərə görə.
Mövzuya dair forumda müzakirələr ↓
Ən son izlədiyiniz film
WikiLeaks. Son vaxtlar xəbərlərdə adı ən çox çəkilən sayt. Bəs bu WikiLeaks nədir və ümumiyyətlə nəyə xidmət edir? Gəlin birlikdə bunu aydınlaşdıraq.
WikiLeaks-ın yaradıcısı Julian Paul Assange adlı bir Avstraliya vətəndaşıdır. Uşaqlığı çox ağır keçən Julian cavanlıq dövründə bir çox kiber-cinayətlərdə şübhəli bilinib. Hətta vaxtıyla CityBank-dan 500.000 ABŞ dolları oğurladığına görə onun barəsində cinayət işi də açılıb. Texnologiya aləmiylə yaxından tanış olan hər bir şəxs gözəl bilir ki, bu tip savadlı xakerlər bir müddətdən sonra xüsusi xidmət orqanlarına işləməyə məcbur edilir. Yəni başqa bir variant ola bilməz — əsas prinsip — “istedadlı xakerlərlə mübarizə aparmaqdansa, onları mənən məhv edib özünə tabe etmək daha sərfəlidir” burada öz rolunu oynayır. Görünür elə bu səbəbdən də tezliklə Julian-ın üzərindən bütün ittihamlar götürülür və o fəaliyyətini davam etdirir.
Beləliklə, 2006-cı ildə Julian-ın növbəti layihəsi WikiLeaks işıq üzü görür. Bu layihə vasitəsi ilə guya anonim istifadəçilər gizli və məxfi sənədləri sayta yükləyib, İnternetdə bölüşürlər.
Gizli və məxfi sənədlərin yayımını başqa bir saytda da təmin etmək olardı, bəs niyə məhz WikiLeaks?! Axı yüzlərlə bu kimi saytlar var… Niyə? Çünki bu sayt birbaşa ABŞ Administrasiyası tərəfindən idarə olunur. Bunun təsdiqi kimi:
WikiLeaks sadəcə ABŞ kəşfiyyatının bir alətidir. Demokratiya carçısının saman-altı oyunu üçün yeni bir layihə.
Yuxarıdakılar mənim subyektiv fikrim idi. Əgər etirazınız varsa, faktlarla təsdiq edin.
Mövzuya dair forumda müzakirələr ↓
WikiLeaks əfsanəsi. ABŞ-ın yeni şantaj aləti?
Rubrika: Düşmənlər
Rubrika: Sözsüz
Rubrika: Tarixi sual