Bir neçə müddətdir ki, Elmlər Akademiyası tərəfdə yerləşən Romantik-in yanından ötüb keçirəm, amma bu reklam “əsərini” görməmişdim. Əsəri bu günlərdə görüb, şoka düşmüşəm. Əsl Azərbaycan sayağı reklam. Ayə, nə qədər Romantik yazıblar. 😆


Mövzuya dair forumda müzakirələr ↓
Gündəm. Görüb, eşitdiklərimiz

Dostlar, bu gündən bloqun formatında dəyişikliklər edəcəm. Daha tez-tez fikirlərimlə bölüşəcəm. Dizaynda da müvafiq dəyişikliklər edildi.
Xeyirlisi, İnşallah.

Yeni 2011-ci il gəlməyə macal tapmamış, məşhur Las-Veqasda Consumer Electronics Show 2011 fəaliyyətə başladı. Texnologiya bayramı olan bu tədbirdə bütün texnoloji nəhənglər öz yeniliklərini təqdim edirlər. Xoşuma gələn ən maraqlı təqdimatlarla bölüşürəm.

Samsung Apple əfsanəsi MacBook Air üçün rəqib yaratdı. Samsung 9 adlandırılan bu noutbuk görkəminə görə heç də Apple əsərindən geri qalmır.
Parametrləri:
Prosessor — Core i5 2537M
Yaddaş 4 GB RAM
HDD (SDD) — 128 GB
USB, HDMI
Qiyməti isə 1600 USD-dən çox olmayacaq. Bizdə ən azı 1800 AZN olacaq, çox güman.

***************************************************************************************

SonyEricsson gözəllikdə bəlkədə indiyə kimi buraxılan bütün telefonları kölgədə qoyacaq yeni XPERIA ARC modelini təqdim etdi. Android 2.3 platformasında işləyəcək bu smartfon SONY-nin məhşur BRAVIA televizorlarında istifadə olunan texnologiyaları özündə birləşdirir.

***************************************************************************************

Və fikrimcə sərginin ən maraqlı təqdimatı Android 3 (!) platformasında çalışacaq Motorola-dan fantastik planşetdir. Motorola XOOM. Bu da Apple iPad-ın sonu. Cavab olaraq Apple-dan iPad-ın 2-ci versiyasını gözləyirik.
Parametrləri:
Prosessor — NVIDIA Tegra 2 1GHZ (!)
Yaddaş 1 GB RAM
HDD (SDD) — 32 GB
FullHD, microSD
5 meqa pikselli kamera.
Qiyməti hələ məlum deyil. Məlum olsa da, biz bu qadjeti yalnız eBay-dan sifariş edə biləciyik. Çünki Motorola-nın Azərbaycandakı rəsmi distrubutoru NLT hələ də eləbilir ki, Motorola yalnız Razr telefonlardan ibarətdir…

Mövzuya dair forumda müzakirələr ↓
Texnoloji yeniliklər

Heç kimə sirr deyil ki, imperiya eşqi ilə yaşayan Rusiyanın hal-hazırki siyasi durumu heç də ürək açan deyil. Rus siyasəti demək olar ki, bütün sferalarda uduzmaqdadır. Hətta iş o yerə çatıb ki, yeganə ümüd yerləri olan silahları da əllərindən çıxır — onları da çinlilər nüsxələməyə başlayıblar. Belə ki, bu yaxınlarda məlum olub ki, 5-ci nəsil qırıcıları ruslar özləri testdən keçirməyə macal tapmamış, onun prototipini artıq çinlilər oğurlayıb, hazırlayıblar. Hətta bir neçə aya istehsala da verəcəklər. Əhsən.
Allah Putinin canın sağ eləsin, deyəsən Rusiyanı yıxa bilsə, elə o yıxacaq. Məhz onun “gözəl” siyasəti nəticəsində ölkə kriminal avtoritetlərin dayanacağına, nasizm, şovinizm, hətta faşizm belə adi kütlənin gündəlik həyatının ayrılmaz tərkib hissəsinə çevrilib. Bütün post-sovet ölkələrinin bəlaları — özbaşnalıq, anarxiya, oliqarxlar, korrupsiya isə dövlət səviyyəsində dəstəklənir, çiçəklənir. Artıq Putinin gözə girmək üçün “qəhramanlıq” tryukları da kömək olmur — xalq mənasız ov görüntülərindən, əvvəlcədən səhnələşdirilmiş “xalqla görüşlərdən” cana gəlib. İndi Putin hakimiyyəti xalq üçün yeni əyləncə tapıb — əcnəbi ölkələrdə yaşayan rus fahişərini casus kimi qələmə verib, jurnallarda soyundurub, təbliğ edirlər. Məsələn, artıq Rusiyanın yeni seks simvoluna çevrilmiş “casus” Anna Çapmanı qeyd etmək istəyirəm. KİV reallıq kimi qələmə vermək istədikləri əfsanəyə görə bu insan həyatı boyu onun bunun postelinə girib Rusiya üçün informasiya yığırmış. Xüsusi orqanların fahişələrin xidmətindən istifadə etməsi (onlardan informasiya yığımında istifadə nəzərdə tutulur) yeni xəbər deyil. Amma ifşa edilən fahişənin milli qəhraman kimi qarşılanması, onun şöhrət ordeni ilə təltif edilməsi yalnız siyasi ideologiyanın tükənməsindən xəbər verir.

Yəqin növbəti Rusiya qəhramanı “Mama Rozalar” olacaq. 😆
Mövzuya dair forumda müzakirələr ↓
Anna Çapman və ya Rusiya siyasətinin iflası

Havalar soyumaq bilmir ki, bilmir. Bir gün yağış yağdı, yığılan mənfi enerjimizdən azad olmağa çalışırdıq ki, yenə də bu vaxt üçün anormal  Günəş çıxdı. Özü də fikir vermişəm, fəsil dəyişikliyinin baş verməməsi insanlara çox böyük mənfi təsir göstərir — hər kəs birə-beş aqressivləşib, pessimistləşib. Hələ dili qurumuş sinoptiklərimiz Yanvar ayının “analoqu olmayan” tərzdə isti keçəcəyini proqnozlaşdırırlar.
Nəsə. Hava cəhənnəm, amma məhsulların qiymətləri deyəsən qaynamağa başlayıb — qiymətlər “sakitcə” 20% qaldırılıb. Fakt — digər məhsulları deyə bilmərəm (evə bazarlığı mən etmədiyimdən), amma ev üçün gündəlik aldığım yeganə məhsul — Yessentuki-17-nin qiyməti növbəti dəfə qaldırıldı. Özü də bütün marketlərə baxmışam. Lider AS-dan tutmuş Neptuna kimi. Neptunda Yessentuki-17 (Vim-bil-dam istehsalı olan) 1 manat 10 qəpik, Lider AS-də isə 1 manat 20 qəpiyədir. Keçən il bu vaxtı sözü gedən məhsul cəmi 70-80 qəpik idi. 70 qəpik hara, 1 manat 20 qəpik hara. Bu 70% bahalaşma deməkdir. Dünya birliyi isə hələ də susur. 😆
Digər tərəfdən bu ola bilər sırf Yessentuki-nin Azərbaycandakı rəsmi distributorunun görməmişliyinin nəticəsidir. Hər şey ola bilər. Gündəlik təlabat mallarını alıb, bazarlıq edən şəxslər bunu daha yaşı bilər — digər məhsullarda da artım müşahidə olunur?!

“Dünya birliyi” susmayıb, neynəyəcək axı. Xəzər Xəbər kimi “səviyyəli” bir verlişi olan ölkə üçün 70% inflyasiya hələ azdır. Bu gün təsadüf nəticəsində bu “xəbərlər” verlişinə baxdım. Çox aktual bir xəbəri verirdilər — marşrut avtobusunun siqnalı xarab olmuşdu, dayanmadan duuuuuuldayırdı. Buna görə milləti sorğu sual edirdilər, qara millət də “televizora düşmək” üçün əldən ayaqdan gedirdi. İndən belə maşının təkəri buraxanda, mütləq gərək Xəzər Xəbər əməkdaşlarını çağıram, bundan da aktual xəbər?!
Yazımın əvvəlin də hava ilə başladım, sonunu da onunla bitirirəm. Biz istidən qrilə döndüyümüz bir vaxtda Rusiyada şiddətli qar yağmaqda davam edir. Yolları isə Rusiya (deyərdim bütün post-sovet ölkələri) sayağı təmizləyirlər. Aşağıdakı bir video-çarxa baxın. Deməli iki traktoru birləşdiriblər ki, yanacaq sərf edilsin, gedib desinlər ki, guya yolu təmizlədilər. Əhsən. Belə şeyləri görəndə bir daha əmin olursan ki, bütün bu korrupsiya və özbaşnalığın mənbəyi zəhrimar kommunist təfəkkürüdür, virus kimi yeriyib hər birimizin canına.

Nəsə. Allah köməyimiz olsun.
Mövzuya dair forumda müzakirələr ↓
Son olaylar. Nələr baş verir?!

2010 bitdi. Hamı bu il haqda öz subyekt fikirləri ilə bölüşdü. Kimisi 2010-u söydü, kimisi təriflədi. Mənə görə 2010 ümumidə tanıtım ili oldu, insanları daha da yaxşı tanıdım, öyrəndim. İstirahət günləridir. Bu günlərdə yazmaq istəmirdim, amma Maşallah bloqun daimi oxucuları artıq zəng edib, SMS təbriklərində belə bloqu atmamağımı arzu edirlər. Bloq isə böyüyür. Gün ərzində istifadəçi sayı artıq 350 unikal İP-ni keçib. Bu hardasa 400-420 istifadəçi deməkdir. Oxucuların 96% Azərbaycandan girir. Azərbaycan reallıqlarını nəzərə alsaq, sırf bir insanın fikirlərindən ibarət və cəmi 5 ay fəaliyyət göstərən bir sayt üçün gözəl göstəricidir. Maşallah olsun. Nəsə. Bəsdi təriflədim, tərifləmək onsuz da mənə düşmür, odur ki, gəlin istirahət edək. 2010-cu ilin ən gözəl Youtube çarxlarını birgə seyr edək.
Birinci yeri bir Conter-Strike həvəskarı kimi əlbətki aşağıdakı çarxa verirəm. Super.

*****************************************
Bəs su damlasının bir neçə saniyəlik həyatının necə keçməsinin şahidi olmaq istəyirsiniz? Onda bu çarxa baxın:

*****************************************
Vizit kartları Ninja sayağı atmaq üzrə “analoqu olmayan” qaqaş. Əla.

*****************************************
Dünya pikseldə. Gözəl 3D işi.

*****************************************
Bu isə yuxarıdakı videonun daha real variantı. Uruqvaylı 3D mütəxəssisin yaradıcılığı.

*****************************************
Lego və kinomatoqrafiyanın ən qanlı filmi. 😆

*****************************************
2010-cu ilin ən kreativ klipi:

*****************************************
Doğrudan da analoqu olmayan avtomobil yarışları:

*****************************************
Uşaqlığımızın ayrılmaz hissəsi — roqatka. Müasir roqatkalar necə olur? Gəlin baxaq. Mırt video. =)

*****************************************
Və sonda… İnsan hər şeyə qadirdir (yaxşı mənada). Gəlin enerjimizi xeyirli və faydalı işlərə sərf edək, onun-bunun qeybətini qırıb, ayağının altını qazıb, işlərinə ziyan vurmayaq. Axı həyat gözəldir.

Mövzuya dair forumda müzakirələr ↓
Youtube

Dostlar, bloqun fəaliyyət göstərdiyi bu kiçik bir müddətdə Sizlərlə fikir mübadiləsi aparmaq mənim üçün böyük zövq verdi. Hər birinizə ayrı-ayrılıqda gözəl diskusiyalara görə təşəkkür edirəm. İnşallah gələn il aktual mövzularda görüşənədək! Allah bizi qorusun!

Son günlər ofis işlərimizin həddən artıq çox olması səbəbindən (Maşallah), bloqda aktiv ola bilmirəm. İlin son günləridi deyə, hər kəs sifarişləri tələm-tələsik istəyir. İnşallah işləri bitirib yenidən aktivliyimi qaytaracam. Keçək mətləbə. Həftə ərzində baxdığım filmlərə dair fikirlərimlə bölüşürəm — Ниже холма 60 (Beneath Hill 60), Мальчики-налетчики (Takers), Вы не знаете Джека (You Don’t Know Jack), Скайлайн (Skyline), Дьявол (Devil), Казино Джек (Casino Jack), Социальная сеть (The Social Network), Монстры (Monsters), Курьер (Coursier).
Ниже холма 60 (Beneath Hill 60)
Film real hadisələr əsasında çəkilib. Triller, dram janrındadır. Filmdə hadisələr 1-ci dünya müharibəsi vaxtı baş verir. O vaxtlar sadə əsgərlərlə yanaşı şaxtaçılar da bir-birləri ilə müharibə aparırdılar. Düşmən postlarının altından yeraltı keçidlər qazıb, onları partlatmaq filmin baş qəhramanın əsas vəzifəsidir. Çoxsaylı itkilərdən sonra o daha məsuliyyətli bir seçim etməlidir — ya düşmən postunu partlatmalı, ya da ki yaxın doslarına çevrilmiş əsgərləri qurban verməlidir.
Yaxşı filmdir. Təsir edicidir. 10 ballıq şkala ilə 8 bal.

******************************
Мальчики-налетчики (Takers)
2010-cu ilin son filmlərindəndir. “Ouşenin dostları” seriyasından növbəti bir filmdir. Filmin fərqli cəhəti — Ouşenin ölməz komandasından fərqli olaraq bu filmdə baş qəhramanlar heç də ölməz deyillər. Ssenarida böyük boşluqlar olsa da, aktyorların gözəl oyunu filmi baxımlı edir.
Ssenari standartdır. Baş qəhramanlar — dostlar oğurluqla həyatlarını qurub, zəngin insanlara çevrilirlər. Amma birdən O gəlir. O — onların biridir və tezliklə hər şey dəyişir. Bir şey xoşuma gəldi — baş qəhramanlardan biri — polismen — bu tip filmlərə xas sonda ölməz və qalib deyil, məğlub kimi filmi bitirir.
Baxmağa dəyər. 10 ballıq şkala ilə 8 bal.

******************************
Вы не знаете Джека (You Don’t Know Jack)
Filmə dair İnternetdə çoxlu maraqlı resenziyalar oxumuşdum. Demək olar ki, hər kəs tərifləyirdi. Özü də baş rolda Al Paçino çəkilib. Baxmaq qərarı verdim. Amma filmin ilk 10 dəqiqələrində anladım ki, film erməni əsilli və “ölüm həkimi” adlandırılan Jack Kevorkian haqda çəkilib. Filmə baxmaqda biraz tərəddüd etdim, amma Al Paçinonun gözəl oyunu məni baxmağa davam etməyə məcbur etdi. Filmin ssenarisi real hadisələr əsasında çəkilib. Ölümcül xəstələrin həyatlarına “ölüm həkimi” bir-bir eftanaziya vasitəsilə son qoyur. Əslində ilk olaraq bunu onların özləri istəyirlər, amma sonradan həkimdə bu hadislər sanki bir oyun həvəsi, bir azart yaradır və öldürülmüş pasientlərin sayı yüzü keçir .
Onuda qeyd edim ki, çox ağır filmdir (mənəvi cəhətcə). Ürəyi zəif olanlar qəti şəkildə bu filmə baxmasınlar. Sonra 2-3 həftə filmin ağırlığı altında gülümsəyə bilməzlər.
Filmdə hər şey gözəl çəkilib, əsasən metr Al Paçinonun oyunu insanı valeh edir. Amma bir məyus edici şey var, o da ki qondarma “erməni soyqırımını” filmdə qeyd edirlər, guya Kevorkianın ailəsi soyqırım qurbanlarıdır, ABŞ-a qaçıblar… Nəsə.
10 ballıq şkala ilə 8 bal. Qiymətini kəsməyimə səbəb — birincisi qeyd etdiyim kimi filmin həddən artıq ağırlığı, ikincisi isə filmi az da olsa siyasətə (soyqırım məsələsi) qarışdırdılar.

******************************
Скайлайн (Skyline)
Nəhayət ki, bu filmə də vaxt edib baxa bildim. Film fantastika janrında çəkilib. Ssenari mənasız olsa da, action effektlər filmə baxarkən darıxmağa qoymur. Aktyorların həddən artıq süni oynunu qeyd etmək istəyirəm.
Ssenari qısa olaraq — deməli Yer kürəsinə yad planetlərdən əcaib məxluqlar daxil olur, insanların beyinlərini oğurlayırlar. Niyəsinə film aydınlıq gətirmədi, çünki film boyu baş qəhramanların işi-gücü ancaq canlarını xilas etməkdən ibarət idi. Bu hardasa Monstro filminə bənzəyir (ən sevimli filmlərimdən biri), amma ssenaridəki çoxsaylı boşluqlar bu “xilas etmə əməliyyatını” mənasızlaşdırır. Sonra baş qəhramanın özü yad planetliyə çevrilir və film bitir. Demək olar ki, filmin nə mənası, nə də sonu aydın olmur.
Yuxarıdakılar nəzərə alaraq bu filmə 10 ballıq şkala ilə qiymətim cəmi 7 bal olacaq.

******************************
Дьявол (Devil)
Növbəti haqq-şər qarşıdırması. Film fantastika janrında çəkilib və özündə dini çağırış daşıyır — əgər İblis varsa, deməli Tanrı da var. Maraqlı filmdir. Amma ssenaridə olan boşluqlar mənim xoşuma gəlmədi. Boşluqlar haqqda biraz sonra, hələlik isə ssenarini qısaca danışım.
Deməli bir göydələndə lift xarab olur və liftin içərisində qalan insanlarla əcaib hadisələr baş verir. Məlum olur ki, onların hər biri bir günah sahibidirlər və İblis şəxsən özü onları bir araya toplayıb, günahlarına görə cəzalandırır. İnsanlar liftdə bir-bir ölməyə başlayırlar və qalanlar bu ölümlərdə bir-birlərini günahlandırırlar. Maraqlıdı.
Amma qayıdaq ssenaridəki boşluqlara. Boşluqlar çoxdur, bir neçəsin xatırladım: məsələn, məni çox maraqlandırır — Filmdə İblis öz üzərinə Allahın işini niyə götürüb?! Bəyəm İblis günahkarları cəzalandırandır? Axı bizim bildiyimiz dini qaydalara görə İblis əksinə günah sahiblərini xoşlayır, onları daha da çox günah etməyə sövq edir. Daha sonra anormal sonluq xoşuma gəlmədi. İblis sən demə oğru bir qoca qadın obrazında liftə daxil olub. Filmin kulminasiya nöqtəsində qoca qarının (İblisin) günahkarla dialoqu tupizmin pik həddidir.
Ümumidə götürdükdə isə yuxarıda da qeyd etdiyim kimi, özündə dini çağırış daşıyır. Ateizmdən əziyyət çəkənlərə bu filmə baxmağı məsləhət bilirəm. Özüdə bu filmə tək, qaranlıq otaqda baxmaq lazımdı, daha təsir edici olur.
Qiymətim — 10 ballıq şkala ilə 8 bal.

******************************
Казино Джек (Casino Jack)
Film real hadisələr əsasında çəkilib və məhşur lobbist Jack Abramovich-in həyatından bəhs edir. Bu filmi son vaxtlar baxdığım həyati filmlər arasında ən möhtəşəmi hesab edirəm. Film ABŞ “demokratiyasını” bütün çılpaqlığında bizə açıb göstərir.
Ssenari — Cek Abramoviç ABŞ-ın ən uğurlu və nüfuzlu lobbistidir. Cek istənilən qanun layihəsini Senat və Konqresdə asanlıqla keçirir. O istənilən konqresmeni, senatoru, siyasətçini pulla ələ alır. Hətta filmdə iddia edilir ki, Corc Buşun prezident olmasında onun əvəzedilməz rolu olub. Cek həyatını 4 prinsip üzərində qurulub — Tanrı, İnam, Vətən və onlardan heçdə az lazım olmayan Nüfuz. Cek həm də öz ailəsinə çox bağlı insandır. Amma ifrat pullar onu qanunsuz layihələrə əl qoymağa sövq edir və nəticədə belə gözəl bir filmə ssenari ola biləcək hadisələr baş verir.
Kevin Spacey-nin möhtəşəm ifasını qeyd edə bilmərəm. Super!
10 ballıq şkala ilə qiymətim 10 bal.

******************************
Социальная сеть (The Social Network)
Növbəti real (deyilənə görə) hadisələr əsasında çəkilmiş bir film. Açığı mən bu filmə sırf Facebook kimi böyük layihələrin necə ərsiyəyə gəlməsinin şahidi olmaq üçün baxdım və bir daha əmin oldum ki, Azərbaycan reallığında bu kimi böyük layihələr heç vaxt baş tutan deyil. Səbəblərini qonşu mövzuda açıqlamışam, ona görə keçək ssenariyə. Ssenari bir proqramistin həyat və yaradıcılığından, onun böyük pullara doğru necə addımlamasından ibarətdir. Film xoşuma gəldi.
10 ballıq şkala ilə qiymətim 10 bal. Deyə bilərsiz niyə məhz 10?! Çünki film bu sahədə çalışanlar üçün müxtəlif vacib sayıla biləcək xəbərdarlıqlar da edir.

******************************
Монстры (Monsters)
Filmdən ən azı “Mostro” səviyyəsində bir ssenari gözləyirdim, nəticədə isə üçüncü səviyyəli bir filmə baxmalı oldum. Mənasızlıq.
Ssenarini qısaca danışım — Guya Meksika ərazisində (yazıq meksikallılar) yad planetli məxluqlar peyda olur, özləri üçün yaşayırlar. ABŞ isə (həmişə olduğu kimi) inkişafdadır və öz “mərhəmətli” əlini Meksikaya uzadır, onun torpaqlarını kimyəvi bombardımana məruz qoyur. Axı meksikalılara kim demişdi, ayından kömək istə? =) Nəsə. Filmdə ABŞ yüksək texnoloji bir ölkə, Meksika isə Mozambik səviyyəsindəndə aşağı bir yer kimi təsvir edilib.
Baş qəhraman — bir fotoqraf öz bossunun nişanlı (başqasına, fotoqrafa yox) qızını Meksikadan ABŞ-a gətirməlidir. Film qızın Meksikada nə axtardığından və onu niyə məhz fotoqrafın xilas etməli olduğundan söz belə açmır. Fotoqraf qızı ABŞ-a çatdırmalıdı. Meksika da, dediyim kimi rəhmətlik ekstrasens “osminoq” Paulun qohumları ilə doludur (filmdə osminoqlar yad planetli kimi qələmə verilir). Sonda nişanlı qız fotoqrafa aşiq olur… Bir sözlə, əvvəlcədən hər şeyin məlum olduğu bir film.
Boş yerə itirdiyim vaxtıma çox heyfim gəlir. Bu filmin adı — “Paul və onun qohumları” və ya “Nişanlı qız necə başqasına aşiq oldu” olmalı idi, amma heç bir halda “Monsters” olmalı deyildi.
Aktyorların (əsasən də xanım baş qəhramanın) süni oyunlarına görə məncə ilin anti-oskarını vermək lazımdır.
10 ballıq şkala ilə qiymətim 2 bal.

******************************
Курьер (Coursier)
Tipik fransız komediyasıdır. Mənasız və ironik. Aktyorların oyunu orta-babatdır. Çəkiliş isə deyərdim əla, amma filmdə eləbil nəsə çatışmır. Bu da ola bilsin ssenarinin biraz primitiv olmasından irəli gəlir.
Ssenari demişkən — guya bir kuryer təsadüfən mafiyanın oyunlarının iştirakçısı olur. Nəticədə məlum olur ki, bu kuryer sən demə supermendir. =)
10 ballıq şkala ilə qiymətim 6 bal.

Mövzuya dair forumda müzakirələr ↓
Ən son izlədiyiniz film

Ətrafımızı anormallıq bürüyür… Hava — anormal istilər lap bezdirdi. Bu gün məcbur olub maşında kondisioneri yandırmışam. Mən bu yaşa çatmışam, amma belə anormal hava görməmişdim. Yəqin elə məhz bu anormallıq insanlara pis təsir edib, onlar da anormal olublar.
Belə olmasaydı “Azərsu” ASC-nin işçiləri 2010-cu il üçün su pulunu ilin əvvəlində ödədiyimizə baxmayaraq, gəlib özləri yazdıqları çekləri saxta elan edib, bütün binadan yenidən su pulunu yığmazdı. Belə olmasaydı, kimsə ona həvalə olunan işi özününki bilib, hər yerdə bunu özünün işi kimi qələmə verib, sinəsinə döyməzdi. Belə olmasaydı, ifrat biqeyrətlikdən əziyyət çəkənlər qeyrət davasına çıxmazdı. Belə olmasaydı, son 2-3 ayda böyük şirkətlər onlara göstərilən xidmətlərə görə ödəməli olduqları pulları səbəbsiz olaraq aylarla gecikdirməzdi. Belə olmasaydı keyfiyyətsiz insanlar hörmətli insanların bağına daş atıb, özlərinə ad qazanmağa çalışmazdı. Belə olmasaydı, günün-günorta çağı yanımızdakı 21 mərtəbəli “novostroyka”-nın üstündən bir qızcığaz özünü atmazdı. Belə olmasaydı, universitetlərdə müəllimlər harınlayıb bilikli uşaqları belə kəsib rüşvət tələb etməzdi. Belə olmasaydı, digərlərin uğuruna paxıllıq edənlərin sayı birə-beş artmazdı. Belə olmasaydı, axşam saat 2-dən sonra Bakı küçələri Amsterdamı xatırlatmazdı. Belə olmasaydı, onun-bunun evini yıxıb varlananlar indi mənəviyyatdan notasiyalar oxumazdı. Belə olmasaydı, yatmadığı adam qalmayan insanlar efirə çıxıb namus söhbəti aparmazdı. Belə olmasaydı, oğru həyasızlığına salıb, şüvənlə özünü ağa çıxarmazdı.  Belə olmasaydı 2010-cu ili bir göz qırpımında yola verməzdik… Belə olmasaydı… anormallıq həyat tərzimizə çevrilməzdi…

Bu dünya onsuz da düzələn deyil. Heç olmaya biz çalışıb özümüzü saf saxlamalıyıq. Dünya onsuz da 5 günlükdir. Onu da kişi kimi yaşamaq hər oğulun işi deyil.
Cəmiyyətin faciəsi isə bu anormallıqları norma kimi qəbul etməsindədir. Biz artıq bunun astanasındayıq… Avropalaşırıq. Amma nədənsə, bu xaraba Avropadan yalnız pis şeyləri götürürük. Allah köməyimiz olsun.
Mövzuya dair forumda müzakirələr ↓
Anormallıq

Bu günlərdə “Sosial Şəbəkə” filminə baxdım. Film Facebook şəbəkəsinin yaradıcısı Mark Zuckerberg-in həyatından (yarı düz, yarı gerçək), onun uğura doğru necə addımlamasından bəhs edir. Film özü-özlüyündə xoşuma gəldi, amma məni daha çox düşündürən başqa məsələ oldu — axı niyə bizdə böyük İnternet layihələrin buraxılması mümkünsüzdir?!
Əslində mən problemləri ötən yazılarımın birində sadalamışdım, amma bu film yaralarımızı təzələdi.
1. Fikrimcə, təhsil — böyük uğurların təməli, başlanğıcıdır. Filmə baxdıqda tələbələrin necə gözəl bir mühitdə oxuyub yaratdıqlarının şahidi olursan. Adam lap qibtə edir. Hər kəs nəsə bir layihə həyata keçirib, əməliylə öndə olmaq istəyir. Gözəl işgüzar mühit var. Rəqabət hökm sürür. İndi gəlin bizim reallıqlara nəzər yetirək — çürümüş təhsil sistemi. Rüşvətxor müəllimlərimizin sayəsində Universitetlərdə artıq oxuyan uşaqlar da oxumamağa məcbur edilir. Bizdə hər şeyi nəsə reallaşdırmaq deyil, papa uşaqlarının pulu həll edir. “Bilikli” müəllimlərin bilikləri isə 70-ci illərin səviyyəsindən artıq deyil. Bizim Universitetlərdə əməllə deyil, əmiylə seçilirlər. Hərf fərqi çox olmasa da, nəticəsi göz qabağındadır.
2. İnternet layihələrə investroların böyük maliyə yatırımları — bizdə isə İnternet layihəyə on mindən artıq pul qoymaq səfehlik sayılır, İnternet layihələr uşaq oynundan başqa bir şey hesab edilmir. Məsələn, Mark Azərbaycanda yaşasaydı, onun 18 minlik layihəsi istifadəçi sayı yüz mini keçdikdən sonra puç olardı. Niyə? Çünki istifadəçi sayı artıqda, saytın xərcləri də artır. Azərbaycanda isə İnternet layihələrə yatırımlar maksimum reklam bannerləri vasitəsilə edilir, belə olan halda da gərək Facebook Day.AZ-ın əvvəlki görkəmindən də (reklamla dolu olduğu vaxtlar) betər bir vəziyyətdə olaydı — daha çox banner asmağa məcbur idi, amma bu da xərclərin heç 10% demək deyil.
3. Faktiki olaraq 2004-ci ildən fəaliyyətə başlayan Facebook, yalnız 2009-cu ilin son aylarında gəlir gətirməyə başlayıb. Deməli 5 il bu layihə ziyana işləyib, amma böyük investorların milyonlarla sərmayələri sayəsində ayaq üstə qalıb. Mark 18 min ABŞ dollarını layihəyə yatırım edərkən, artıq bilirdi ki, onun layihəsinə yiyə çıxan olacaq və milyonlarla yatırımlar edəcək.
Bu sərmayələr bir növ sabun köpüyünə bənzəyir. Layihələrin birjaya çıxışını təmin etmək üçün dəyərlərini 100-1000 dəfə şişirdirlər, şişirdirlər və şişirdirlər… Ümumiyyətlə bütün Amerika iqtisadiyyatı bu prinsiplə qurulub — orada demək olar ki, istənilən layihəni beləcə şişirdib, məhşurlaşdırırlar. Bəs bizdə birja deyilən şey var? =) Var, amma neftdən başqa çətin orada bir şey satıla.
4. Əgər kimsə hesab edirsə, Mark bu imperiyanı tək başına yaradıb, yanılır. Görünmür, amma layihənin populyarlaşmasında dövlətin də böyük rolu var. Facebook faktiki ABŞ administrasiyasının maraqlarına xidmət edən bir layihədir. Artıq xüsusi orqanlar əziyyət çəkib insanların dosyelərini axtarmır, indi insanların özü hər şeyi Facebook-da yerləşdirir, şəkilləri, dostları, fikirləri ilə bölüşürlər (məsələn, terroristlər növbəti terrorları haqda və s.) və bütün bunlar 100% izlənilir. Rus demişkən, bolee togo Facebook-da profilin ləvğ edilməsi mümkün deyil — siz sadəcə hesabınızı deaktiv edə bilərsiniz, poza bilmərsiniz. Bu da Facebook-un istifadəçi bazasının digər məqsədlərlə istifadə olunduğuna daha bir sübutdur. Bura üstə gəl ölkənin birinci şəxsləri səviyyəsində saytın təbliği — alınır uğurlu və dövlət strategiyasına xidmət edən layihə.
Deməli İnternet layihələr üçün digər stimul verici faktor — dövlətin özəl şirkətlər vasitəsilə müxtəlif “ümüd verici” layihələrə pul yatırımları etməsidir. Bizdə bildiyim qədər bir Yumru layihəsinə sərmayə yatırılıb, o da (layihə) ki, axıda fake çıxdı.

Gördüyümüz kimi nə qədər ki, Universitetlərdə sağlam mühit yaradılmayacaq, nə qədər ki, böyük şirkətlərimiz İnternet layihələrə sərmayə qoymağa can atmayacaqlar, nə qədər ki, iqtisadiyyatımız neft və kənd təsərrüfatı, yeyinti məhsullarından ibarət olacaq, o qədər də biz böyük layihələr görməyəcik. Yəni heç vaxt. Təki yanılım.
Mövzuya dair forumda müzakirələr ↓
Azərbaycan İnternet məkanı (Anti-inkişaf faktorları) →