Dekabr ayı yaman sürətlə başladı. Bir tərəfdən millət Məhərrəm ayının gəlişinə görə tələm-tələsik toy-bayram etdi, digər tərəfdən ABŞ-ın yeni şantaj aləti Wikiliaks min hoqqadan çıxdı, ara qarışdırdı. Bezdik. Nəsə yeni bir şey lazımdır. Yeniliklər də texnoloji aləmdə Maşallah nə qədər istəsən.
Gözümüz aydın, Microsoft Windows Phone 7 əməliyyat sistemində copy-paste funksiyasını təqdim etdi. Sevinməyə tələsməyin (kimin Win Phone 7 telefonu varsa), bu funksiya hələlik hər kəs üçün nəzərdə tutulmur, yalnız xüsusi testerlər sınaqdan keçirə bilərlər. Microsoft rəsmiləri isə söz verirlər —  bu “inqilabi” funksiyasını 2011-ci ilin ilk günlərindən bütün Windows Phone 7 telefonları dəstəkləyəcək. 😆


Sony Ericsson isə bazarı itirməkdə davam edir. Amma deyəsən bu onların heç vecinə də deyil. Son 1 ildə bazara tutarlı məhsul buraxa bilməyən Sony Ericsson Motorolla-nın uğursuz yolunu davam etməkdə təkrarlayır. Belə olmasaydı, yeni model telefonlar əvəzinə dayanmadan lazımsız “bezdeluşkalar” buraxmazdı. Yeni Sony Ericsson M430 portativ dinamikli qadjet şirkətin “bezdeluşkalar” seriyasının davamıdır. Bezdeluşka olsa da, maraqlı qadjetdi.

Sony Ericsson “fintifluşkalarla” məşğul olduğu bir vaxtda Apple vaxt itirmir. Onun üçün lazımlı qadjetlər yaradılmaqda davam edir. Maraqlı qadjetlərin bəlkə də ən aktualı — Bluetoothla işləyən Looxcie LX1 portativ video kamerasıdır. Görünüşcə adi bluetooth qulaqlığa bənzəyən bu video kamera qulağa taxılır və aktiv edilməsi üçün qulaqlıqdakı düyməyə toxunmanız yetər. Qadjet videoları çəkməklə kifayyətlənmir, o həmçinin çəkdiyi videoları canlı olaraq Youtube-a yerləşdirə bilir, hətta əvvəlcədən müəyyən edilmiş elektron ünvana da göndərir. Əsl casus aləti. Qiyməti də baha deyil, cəmi 160 manat.
Qadjet hal-hazırda digər platformalı telefonlar üçün də test edilir. Ola bilsin artıq sizin telefonu da dəstəkləyir. Dəstəklədiyi bütün telefonların siyahısı burada — www.looxcie.com/looxcie-app.html



Bu dəfəlik bəsdir. 😉
Mövzuya dair forumda müzakirələr ↓
Texnoloji yeniliklər

Son günlər başım biraz qarışıq idi. Nəhayət kompüterə əlim çatdı. Təki başımız İnşallah xeyir işlərə qarışsın. Söz verdiyim kimi, ATƏT-in son sammiti və Qarabağ problemi ilə bağlı fikirlərimlə qısa olaraq bölüşürəm.
Artıq bir çoxlarımızın xəbər tutduğu kimi, ATƏT-in bu günlərdə Qazaxıstan paytaxtı Astanada növbəti sammiti keçirildi. Bu sammitə böyük ümidlər olsa da, Rusiyanın potronajı altında hərəkət edən Ermənistanın və yekun bəyannamə zamanı elə Rusiyanın özünün də cığallıq etməsi bütün bu ümidləri puç etdi. Rusiya bir daha təsdiq etdi ki, o bizə sərf edən istənilən addımın atılmasına heç vaxt imkan verməyəcək. Bununla Rusiyanın xarici siyasətində korektələr edilməsinə dair səslənən fikir və mülahizələr havaya sovruldu. Biz bir daha Rusiyanın əsl simasını gördük.

Bəs belə olan halda nə etməliyik? Öz subyektiv fikirlərimlə bölüşəcəm:
Fikrimcə, ilk öncə proseslər ölkənin daxilindən başlamalıdır. Bütün post-sovet ölkələrinin bəlası — korrupsiya ilə mübarizə yeni, aktual fazaya keçməlidir. Bir sıra orqanların fəaliyyəti xalq üçün şəffaflaşdırılmalıdır, hakimiyyət və xalq arasında bağlılıq daha da gücləndirilməlidir. Müxalif yönümlü söz sahiblərinə də yer verilməlidir ki, onlar da öz sözlərini deyə bilsinlər. Çünki onlara söz vermədikdə, arzuolunmaz aqressiya yaranır və bu da kütləyə təsirsiz ötüşmür. Qanunun aliliyini təmin etmək üçün, əlbət ki, müharibə dövrünü yaşayan bir ölkə üçün mütləq diktatın da olması labüddür.
Daha sonra türk silahlı qüvvələrinin Azərbaycana keçidini təmin etməliyik. Ən azından 3 alay. Bəli, bizim ordumuz kifayyət qədər qüdrətlidir, amma müharibə olduğu halda, şimal və cənub bölgələrimizdəki aktivləşəcək bir neçə separatist fikir daşıyıcılarının neytrallaşdırmasını, həmçinin fürsətdən istifadə edən Rusiya və İranın Azərbaycana soxulmasının qarşısını yalnız Türk ordusunn “xofu” ala bilər. Bütün bunları nəzərə alaraq bu alayların birini cənub bölgələrimizdə, birini şimal zonada, digərini isə birbaşa ermənilərlə təmas xəttində yerləşdirmək olar. Türk ordusu bizə yalnız aqressor və separatçıları saxlamaq üçün lazımdır. Öz ordumuz isə asanlıqla Qarabağı ermənilərdən təmizləyə bilər. Lap Zəngəzuru və Ermənistanın indiki bölgələrinin bir neçəsini də ələ keçirmək olar — bufer zonası yaradıb, indiki erməni siyasətini elə özlərinə qarşı tətbiq etmək mümkündür.
Bütün bunları reallaşdırmağa bizim cəmi 5-7 ilimiz var. Çünki 2016-cı və 2018-ci illərdə Rusiyada müvafiq olaraq Beynəlxalq Olimpiya oyunları və Futbol üzrə Dünya Çempionatı keçiriləcək. Belə olan halda Rusiya Ermənistana görə milliardlarla sərmayəni boşuna verib müharibəyə qoşulmağa risk etməz. Yəqin o vaxta kimi İran problemi də həll olunar. Düzünü zaman göstərəcək.
Bu qədər. Bu mənim subyektiv fikirlərim idi. Razı deyilsinizsə, xahiş edirəm əsaslandırın. Yoxsa yazı yazmaq xatirinə yazılan rəylər pozulacaq.
Mövzuya dair forumda müzakirələr ↓
Qarabağ. Dalan yoxsa həll yolu?!

2018 və 2022-ci illərdə keçiriləcək futbol üzrə “Dünya Çempionatı”-nın keçiriləcəyi yerlər artıq məlumdur. Bunlar Rusiya və Qatardır. Onlarla daha layiqli namizədlərin olduğu halda FİFA-nın tədbirə heç də ciddi yanaşmayan Rusiyanı qalib kimi seçməsi mənim üçün müammalı olaraq qaldı. Axı ruslar digərlərindən fərqli olaraq heç bir qeyri-adi təkliflə çıxış etmədilər… Yəqin bu ABŞ-ın Rusiyaya “perezaqruzka” məsələsinə görə hədiyyəsidir. Ya da rüşvətin canı sağ olsun (onsuz FIFA rüşvətxor orqan kimi çoxdan ad çıxarıb). Hər şey ola bilər.
Rusiya bu qalibiyyətə layiq deyil! ATƏT-in son sammitində baş verən hadisələr də bunun sübutudur. Sammit demişkən, sabah İnşallah buna dair fikirlərimlə bölüşəcəm.
Nəsə. Gəlin qaliblərin video-prezentasiyalarını izləyək.
Rusiya 2018.

Qatar 2022.
Rusiyadan fərqli olaraq Qatar bu işə ciddi və məsuliyyətlə yanaşıb. Stadionları standart şablon yox, çox kreativ tərtib olunacaq.

Mövzuya dair forumda müzakirələr ↓
Futbol üzrə dünya çempionatı 2018/2022. Qaliblər

WikiLeaks-in şərləmə kampaniyasından bezdiniz? O zaman gəlin istirahət edək. Möhtəşəm reklam çarxlarına tamaşa edib ən yaxşısını birgə seçək. Daha sonra seçdiyimiz ən yaxşıları (10 çarx) bir-birləri ilə də yarışdırarıq. Azərbaycan reklamçılarının çəkdiyi rolikləri də burada yarışmamızda görmək istəyirsinizsə, onları Youtube-a yükləyib, mənə parwin@shukurzade.com ünvanına göndərin.
Bismillah. Başlayaq.
Video çarx 1
Nokia Pocket Dance. Əla kreativ reklam. Nokia-dan açığı heç gözləməzdim. =)

****************************
Video çarx 2
Samsung Galaxy S Armani. Bomba oğlanlar silsiləsindən — “modnu” Android qaqaş.

****************************
Video çarx 3
xBox 360 Kinect. Microsoftun inqilabi oyun konsolunun növbəti reklam çarxı.

****************************
Video çarx 4
Bəlkə də ilin ən kreativ reklamı. Mobil operator T-Mobile-dan. Çarxda səslənən bütün musiqiləri insanlar ifa edir. Flashmoberlər belə olar e. 😉

****************************
Video çarx 5
Qeyri-adi reklam. OK Go – Last Leaf. Samsung NX100 iFn kamerası ilə.

****************************
Video çarx 6
Quilmes Beer. Pivə ad gününü qeyd edir. =)

****************************
Video çarx 7
Maarud. Çipsilərin özünə məxsus reklamı.

****************************
Video çarx 8
Stimorol Infinity. Ləzzətin hədsizliyi… Lap fantastik filmi xatırlatdı (Временная петля (Los cronocrímenes))

****************************
Video çarx 9
Telefonica O2. Texnikasız həyat.

****************************
Video çarx 10
Məşhur Evian mineral sularının möhtəşəm reklam çarxı. Canlaşdırıcı su. =)

****************************
Baxdın? İndi səs ver. Ən yaxşı çarxı seç (forumdakı müvafiq mövzu vasitəsilə).
Mövzuya dair forumda müzakirələr ↓
İstirahət edək. Ən möhtəşəm reklam çarxları (№3) ↓ (Səs ver!)

Hə… Liza Simpson da Azərbaycan haqqında danışdı. Özü də danışmağı dərd yarı, sən demə o bizi BMT-də təmsil edirmiş, bizim heç xəbərimiz də yoxdur.

Məşhur Simpsonlar çizgi serialının qəhramanlarından olan balaca Liza növbəti filmlərin birində Azərbaycanı təmsil edir. Cəsur Liza xanımın düyünün rüsumlarını qaldıracağı ilə bağlı Azərbaycan adından BMT üzvlərinə hətta hədə-qorxu gəlmək planları var. Ay səni, Liza… Neft olsaydı, yenə başa düşmək olardı, amma Azərbaycanın düyü ixracı… Deyəsən amerikallılar bizi induslarla səhv salıblar, Vallah. :hm:  Ümumiyyətlə, axır vaxtlar Amerika üçün Azərbaycan faktoru yaman aktuallaşıb. Allah axırını xeyir eləsin.

Ölmədik, bu günü də gördük — Günəşi rəsmi olaraq özəlləşdirdilər. Milliardlarla il azad ömür sürdükdən sonra indi Günəşin də yiyəsi var — bu İspaniyanın Galicia bölgəsinin sakini 49 yaşlı Angeles Duran adlı bir xanımdır.
Bu “fərasətli” qadın əməlinə belə açıqlama verib — “Mən bütün hüquqi məsələri gözəl bilirəm, elə ona görə də rəsmi orqanlara müraciət etdim və mənim sorğum təmin edildi. Ağılsız deyiləm ki, Günəşi kiməsə verim… ” Hə, “çox ağıllı” xanımın Günəşə dair Notariusda təsdiq edilmiş sənədi də var. İspaniyanın dövlət Notarius təsdiq edir ki, Angeles Duran həqiqətən G2 tipli spektral ulduz olan və Günəş sisteminin mərkəzində yerləşən Günəş adlı ulduzun qanuni sahibidir.
Günəşə dair gələcək planlarını açıqlayan fırıldaqçı qadın günəşi parça-parça satmağı planlaşdırdığını deyib. Əhsən.
Günəş demişkən. WikiLeaks saytının “günəşi” də bu saat ən parlaq anını yaşayır. Ötən yazımda qeyd etdiyim kimi, ABŞ-ın xarici siyasətinin yeni vuran “dubinkası” olan bu sayt dövlət departamentinə arxalanıb ABŞ-dan başqa demək olar ki, bütün dövlətlərin başçılarına, ölkələrin apardığı xarici və daxili siyasətə “ilişir”. Düzdür, hərdən lap ağ olmasın deyə, Amerikayada bir iki söz atır, amma yazılarının böyük əksəriyyəti digər ölkələri əhatə edir. Ən maraqlısı odur ki, bu dərgi indi də başlayıb ölkələrin birinci xanımlarına dair kompromatlar dərc etməyə. Məsələn, bu dəfə WikiLeaks Rusiyanın birinci xanımı Svetlana Medvedevaya dair “məxvi” sənədləri üzə çıxarıb, amma nədənsə özünü “müstəqil” adlandıran bu dərgi Amerikanın ilk qara dərili prezidentinin kameralar qarşısında aktyorluq edən və ağ evi xiyar-pomidor-balqabaq bostanına çevirən həyat yoldaşı haqqında bircə kəlmə də olsa söz açmır. Ucuz tamaşa. Amerika nə gündəsən?! 😀
Mövzuya dair forumda müzakirələr ↓
Son olaylar. Nələr baş verir?!

Bu həftə Maşallah o qədər iş olub ki, vaxt edib barmaqla sayılası filmlərə baxa bilmişəm. Bu dəfəki qurbanlarım — Аджами (Ajami), Скотт Пилигрим против всех (Scott Pilgrim vs. the World), Побег из Вегаса (Get Him to the Greek), 500 дней лета ((500) Days of Summer), Конец света (End of Days) və Перси Джексон и похититель молний (Percy Jackson & the Olympians: The Lightning Thief).
Bir bir sadalayaq.
Аджами (Ajami)
Bu filmə baxmağa yaxın qardaşların biri məsləhət etdi. Film triller, psixoloji dram janrına çəkilib. İsrail filmidir. Filmin belə möhtəşəm ssenariyə malik olmasını heç gözləməzdim. Aktyorların gözəl oyununu da qeyd etmək istəyirəm.
Ssenari hardasa Hindistanın “Zibillik Milyonçusu” filminə bənzəyir. Amma orada sonluq real həyata xas olmayan “happy-end”-lə bitirsə, burada sonluq kövrəldicidir… Filmdə söhbət fələstinli bir dinc ailədən gedir. Əsas qəhramanlar 2 azyaşlı gəncdir. Ssenarini qısaca danışım — bu gənclərin əmisi oğlu kafesinə hücum edən bir bir dələduzu güllələyir. Bu dələduz da sən demə fələstinin nüfuzlu kriminal ailələrinə mənsub olur və ailələr arasında qan müharibəsi başlayır. Daha doğrusu dələduzlar dinc ailənin bütün üzvlərini güllələməkdə qərarlıdırlar. Bir neçə nəfər qurban gedəndən sonra, növbə 2 azyaşlı gəncə çatır. Qohum-qonşu bu azyaşlıları xilas etmək üçün ailələr arasında barışıq elan edirlər, amma bir şərtlə — bu iki gənc sağ qalmaları üçün dələduzlara külli miqdarda pul verilməlidirlər… Bununla da gənclərin onsuzda asan olmayan həyatları daha da mürəkkəbləşir, onlar kriminal işlərə əl atmalı olurlar… Qalanına özünüz baxsanız yaxşıdı. Gözəl filmdir. Film məşhur “Pulp Fiction” stilində çəkilib, yəni bir neçə səhnəcikdən ibarətdir.
Filmdən bir sitat çox xoşuma gəldi — o yerdə ki, məyusçuluq və kasıblıq hökm sürür, mafiya idarəçilik edir, o yerdə barmaqlar tapançadan güllə atmağa can atır, əl isə öldürmək üçün asanlıqla bıcaqı götürür…
Məsləhət görürəm. 10 ballıq şkala ilə 10 bal.

******************************
Скотт Пилигрим против всех (Scott Pilgrim vs. the World)
Film industriyasında inqlab edəcək yeni ideyalı bir film. Bu filmə sırf filmdə demək olmaz. Oyun, komik və bədii filmin miksindən yaradılıb. Məzəli çəkilib, mənim çox xoşuma gəldi. Film bir anda baxılır, sanki hansısa maraqlı bir oyunun şahidisən. Onu da qeyd edim ki, eyni adlı oyun da çox populyardı.
Filmin ssenarisi də maraqlıdı — deməli adəti üzrə bir cavan oğlan (qəhraman — Scott) bir qıza vurulur. Amma o qız sirli birisidir və Scott onunla əlaqəyə girən kimi oyun sayağı antiqəhramanlarla vuruşmağa məcbur olur. Hər qalib gələndədə o xallar (bonuslar) qazanır. Son anti-qəhramanı öldürdükdən sonra, o xallarını maksimum edir və yeni bir can qazanmış olur. Növbə çatır super finala. Super finalda o məğlub olur, ölür. Amma axı o can qazanmışdı! 😆  Scot bonus candan istifadə edib yenidən həyata qayıdır və bu dəfə qalib olur. Deyərdim cox mırt kinodur. Əgər keyfiniz yoxdursa, adi filmlərdən bezmisinizsə, nəsə qeyri-adi bir filmə baxmaq istəyirsinizsə, onda bu film sizin seçimdir.
Filmin adın mən belə qoyardım — Botanın (botanik) sərgüzəştləri.
Qiymətim 10 ballıq şkala ilə 10 bal. Ən sevimli filmlərimin sırasına yazdım.

******************************
Побег из Вегаса (Get Him to the Greek)
Bu filmi 2010-cu ilin ən yaxşı komediyalarından saymaq olar. Film çeynənilmiş mənasız və şit zarafatlardan uzaqdır. Amma başdan-ayağa böyük bir məzədir (hardasa məna da kəsb edən).
Ssenarini adi saymaq olar — deməli böyük bir səsyazma studiyasında çalışan baş qəhramana tapşırılır ki, keçmişin ən populyar ulduzunu yeni konsert vermək üçün yola gətirsin. Beləliklə, zahirən Lider-in əməkdaşı Murad Arifi xatırladan baş qəhraman yola düşür Londona və… keçmiş ulduzun gündəlik keyf həyatının bir hissəsinə çevrilir. Amma gündəlik keyfin özü də bezdiricidir. Bizim qəhraman da bezir və keçmiş ulduzun həyatında dəyişikliklər etməyə çalışır.
Aktyorların gözəl oyununu qeyd etmək istəyirəm.
10 ballıq şkala ilə qiymətim 9 bal.. Baxmaq məsləhətdi

******************************
500 дней лета ((500) Days of Summer)
Anlamaq olmur, bu film drama janrında çəkilib, yoxsa “vse-taki” traqi-komediyadır. Bir sözlə növbəti qeyri-adi film. Əvvala qeyd edim ki, aktyorlar onlara həvalə etmiş rolların öhdəsindən məharətlə gəlirlər.
Ssenari isə — baş qəhraman təbrik açıqcaları istehsal edən bir şirkətdə çalışır. Maraqsız həyat sürür. Hər gün ev-iş, iş-ev. Bir gün ofisdə yeni işçi — Summer (Yay) adlı bir qız peyda olur və bununla da onun həyatı tam dəyişir. Hadisələr bir anda inkişaf edir və baş qəhramanla qız görüşməyə başlayırlar. Amma çox keçmir ki, Summerin hissləri qəhramanımıza qarşı soyurur. Qızı dəlicəsinə sevən oğlan isə az qalır başını itirsin. Məlum olur ki, Summer nişanlıdır.
Filmin başlığı ümumiyyətlə super idi. Deməli ilk olaraq yazılır — Bu filmdə cərayan edən hadisələr həqiqətə uyğun deyil və hadisələrin real insanların həyatı ilə üst-üstə düşməsi sırf təsadüfdür. Əsas da sənin həyatınla Jenny Beckman. Qancıq (Suka). 
Filmin özü gözəl və maraqlı olsa da, sonda mənası məni açmadı. Ona görə 10 ballıq şkala ilə 8 bal verirəm.

******************************
Конец света (End of Days)
Fantastik trillerdir. Yenə də dünyanın sonudur. Yenə də dünyaya antixrist gəlir. Yenə də hər şeyi qaynadıb-qarışdıran İblisdir. Yenə də dünyanın xilaskarı ölməz Şvartsdır (düzdür, axırda ölür). Hə, bu filmdə baş qəhraman uşaqlığımızın məşhur aktyoru Arnold Schwarzenegger-dir.
Film uzaq 1999-cu ildə çəkilsə də, mənim üçün tapıntı oldu. Gəzəl çəkilib, əsasəndə İblis rolunu oynayan Gabriel Byrne-nın məharətlə yaratdığı obrazı qeyd etmək istəyirəm. İblis rolunu heç metr Al Paçinonun özü belə oynamayıb. Filmi biraz maraqsız edən Şvartsın zəhlə tökən ölməməzliyidir. Amma onu da etiraf etmək lazımdır ki, bu filmdə Şvartsın oyunu bəlkədə karyerası boyu oynadığı ən yaxşı aktyor oyunu idi.
10 ballıq şkala ilə qiymətim 7 bal.

******************************
Перси Джексон и похититель молний (Percy Jackson & the Olympians: The Lightning Thief)
Yunan mifologiyasını uşaqlıqdan sevdiyim üçün bu filmə baxmaya bilməzdim. Amma gözlədiyimi almadım. Yenə “Битва Титанов” filmində olduğu kimi burada da mifologiyaya aid olmayan Hollywood sayağı müasir Zevs, Poseydon və Aidlərin arasında dava düşür. Lakin burada pis “dayday” rolunu Poseydon yox, Zevsin özü oynayır. Effekt sarıdan film gözəl tərtib olunub, amma ssenari sarıdan zəifdir.
Ssenari — Poseydonun zinədən olan oğlu Persi Zevsin qəzəbinə tuş gəlir. Qəzəbin səbəbi Zevsin ildırımlarının itməsidir. Qüdrətli Zevs elə bilir ki, ildırımlar Persidədir, amma yanılır… Heç qüdrətli Tanrı-da yanılar? Nəsə. Aktyorlarında zəif oyunu filmi lap mənasızlaşdırır. Filmə baxdıqdan sonra itirilmiş vaxtıma heyifim gəldi.
10 ballıq şkala ilə qiymətim 3 bal. Çox yox, o da ki effektlərə görə.

Mövzuya dair forumda müzakirələr ↓
Ən son izlədiyiniz film

WikiLeaks. Son vaxtlar xəbərlərdə adı ən çox çəkilən sayt. Bəs bu WikiLeaks nədir və ümumiyyətlə nəyə xidmət edir? Gəlin birlikdə bunu aydınlaşdıraq.
WikiLeaks-ın yaradıcısı Julian Paul Assange adlı bir Avstraliya vətəndaşıdır. Uşaqlığı çox ağır keçən Julian cavanlıq dövründə bir çox kiber-cinayətlərdə şübhəli bilinib. Hətta vaxtıyla CityBank-dan 500.000 ABŞ dolları oğurladığına görə onun barəsində cinayət işi də açılıb. Texnologiya aləmiylə yaxından tanış olan hər bir şəxs gözəl bilir ki, bu tip savadlı xakerlər bir müddətdən sonra xüsusi xidmət orqanlarına işləməyə məcbur edilir. Yəni başqa bir variant ola bilməz — əsas prinsip — “istedadlı xakerlərlə mübarizə aparmaqdansa, onları mənən məhv edib özünə tabe etmək daha sərfəlidir” burada öz rolunu oynayır. Görünür elə bu səbəbdən də tezliklə Julian-ın üzərindən bütün ittihamlar götürülür və o fəaliyyətini davam etdirir.

Beləliklə, 2006-cı ildə Julian-ın növbəti layihəsi WikiLeaks işıq üzü görür. Bu layihə vasitəsi ilə guya anonim istifadəçilər gizli və məxfi sənədləri sayta yükləyib, İnternetdə bölüşürlər.
Gizli və məxfi sənədlərin yayımını başqa bir saytda da təmin etmək olardı, bəs niyə məhz WikiLeaks?! Axı yüzlərlə bu kimi saytlar var… Niyə? Çünki bu sayt birbaşa ABŞ Administrasiyası tərəfindən idarə olunur. Bunun təsdiqi kimi:

1. WikiLeaks-ın əsas ideologiyası (saytlarında da qeyd olunur) — siyasi azadlıqların təbliği, əsas hədəfi isə Çin və Rusiyadır. ABŞ Administrasiyasının Rusiya və Çinlə münasibətlərini birbaşa korlamamaq üçün gözəl vasitə — kompromatı burax İnternetə, sonra da bu kimi “məxfi” sənədlərə istinad edib bu ölkələrə təzyiq et.
2. Tamaşaya biraz da təbiilik qatmaq üçün ABŞ Administrasiyası səviyyəsində sayta reaksiya olunur. Guya “pis” WikiLeaks bunların “sirlərini” açıb-tökür. Bu isə əslində onun bütün dünyada tanınmasına, təbliğinə xidmət edir.
3. Guya İnterpol Julian-ı axtarışa verib, amma o görünməz olub. Bu da absurd bir şeydir. Hər-halda sayta girib, yeniləyirsə, onun IP-ləri həmən ICANN-da və ya provayderdə (hosterdə) qeydiyyata düşür. IP ilə isə insanı asanlıqla tapmaq olar. Deyə bilərsiz bəs birdən proxy-dən istifadə edirsə?! Bu da boş şeydir. Hələ bizdə proxy-ləri yararsız edən proqram və skriptlər var, təsəvvür edin bunun üçün xüsusi kəşfiyyat orqanlarının nə kimi alətləri var…
4. Əgər həqiqətən də WikiLeaks ABŞ-ın nüfuzuna zərbə vurursa, onda elə adı çəkilən ICANN (dünyanın bütün domen adlarına nəzarət edir) heç bir səs-səmir olmadan WikiLeaks.org saytını bağlaya bilər.
5. Guya WikiLeaks anti-ABŞ təbliğatı aparır. Növbəti sayıqlama. Əslində saytda yayımlanan bütün sənədlər ABŞ-ın mənafeyinə xidmət edir. Məsələn, “məxfi” sənədlərdə qeyd olunur ki, İraqlı əsgərlər (məhz iraqlı (!)) əsirlərə işgəncə verib, onların barmaqlarını kəsib, gözlərini çıxarırlarmış. ABŞ hakimiyyətinin günahı isə — buna göz yummaqla bitir. Deməli İraq oldu vəhşi-barmaq kəsən… İraqa təzyiq üçün növbəti bəhanə. Budur ABŞ-a ziyan?
6. Bu klassik ovçuluq strategiyasıdır. Bir misal çəkim. Ovçular ilk olaraq 3-4 ördəyi tuturlar, qanadlarını şikəst edirlər ki, uçmasınlar. Onları bir müddət qaranlıq yerdə saxladıqdan sonra, ümumiyyətlə uçmağa can atmırlar, insanlardan qorxmurlar. İşləri yalnız başlarını aşağa salıb sakitcə üzmək olur. Ovçular ova gedərkən onları mütləq özləriylə götürürlər, buraxırlar suya. Göydə uçan azad quşlar onların rahatça üzdüyünü görüb, onlara qoşulmağa can atırlar, qonurlar onlarla üzməyə — elə bu vaxt ördək soyqırımı başlayır. Azad və uçan quşları bir-bir vurub güllələyirlər. Zəlilləri isə yenidən qəfəsə qoyub, gələn dəfə üçün saxlayırlar. İndi WikiLeaks də o zəlil ördəklərdən biridir. Birisi məxfi sənədi ötürdü — onu həmən ayırd etmək üçün əla vasitə.

WikiLeaks sadəcə ABŞ kəşfiyyatının bir alətidir. Demokratiya carçısının saman-altı oyunu üçün yeni bir layihə.
Yuxarıdakılar mənim subyektiv fikrim idi. Əgər etirazınız varsa, faktlarla təsdiq edin.
Mövzuya dair forumda müzakirələr ↓
WikiLeaks əfsanəsi. ABŞ-ın yeni şantaj aləti?

Son olaylarla bağlı fikirlərimlə bölüşürəm. ABU. Daha doğrusu Azərbaycan Beynəlxalq Universiteti. Universitet bağlandı, dərd yarı. Sən demə ABU-ya məxsus klinikaların birində insan orqanlarının transplantasiyası və satışı təşkil olunurmuş.
Məlumat artıq rəsmi şəkildə təsdiqini tapıb. Klinikaya əməliyyat üçün insan qəssabları əsasən Ukraynadan dəvət olunurmuşlar. Deyilənə görə 10-dan çox bu kimi cinayətin üstü açılıb. Görünür ABU-nun rektoruna da qarşı cinayyət işi açılacaq. Hərçənd Yeni Müsavat dərgisinin xəbərinə görə klinikanın rəsmiləri bu xəbəri böhtan və iftira adlandırırlar, amma… Düzünü zaman göstərəcək.
Zaman demişkən. Bu balacaboy taciklər imkan vermədilər ki, bizim analoqu olmayan ən uca dirəkli 3 rəngli bayrağımız heç olmaya bir müddən analoqu olmayan kimi rahat dalğalansın. Belə ki, bu gün gəzən şayələrə görə əhalisinin yarıdan çoxu Rusiyada küçə süpürgəçiliyi ilə məşğul olan və dünyanın ən kasıb ölkələrindən olan Tacikistanın dövlət başçısı İmaməli Raxmon özünün “ən uca bayraq” sevdasını gerçəkləşdirmək qərarı verib. Tacikistanın analoqu olmayan bayrağının dirəyi paytaxtları Düşənbədəki Millətlər Sarayının qarşısında ucaldılacaq. Bundan əlavə dirəyin önündə dövlət qerbi üçün nəhəng postament də yerləşdiriləcək. Bayraq dirəyi isə 165 metr hündürlükdə olacaq. Xatırladım ki, bizim bayrağın dirəyi 162 metr təşkil edir.
Azərbaycanı anladıq — biz neftimizlə öyünürük, belə layihələri gerçəkləşdiririk, bəs yaxşı bu Tacikistanın nəyi var axı?! Paxıllıqdan başqa heç nəyi. :pis: Lazımsız pafos və ambisiyalardan başqa bir şey deyil.
Bayraqdan söz düşmüşkən. Seçkilərdən sonra Hafiz Hacıyevi tanımaq olmur. Arzusunda olduğu Milli Məclisə düşə bilmədikdən sonra “balıq” ləqəbli Hafiz bəy bayrağını dəyişmək qərarı verib. Bir vaxtlar “Müsavat” Partiyasını dağıtmaq üçün yaratdığı separatist “Müasir Müsavat” Partiyasını indi elə həmin “Müsavat”-ın müttəfiqi elan edib. Əhsən. Görəsən bu deputat kreslosu niyə belə şirindir?! Qismət olar, bilərik. 😆
Hə, bu gün də məlum olur ki, “Müasir Müsavat” Partiyasının aktivistləri yığışıb “flexible” Hafiz bəyin istefasını tələb ediblər. İndi Hafiz bəy çətin vəziyyətdə qalıb. Nə müxalifət onu qəbul edir, nə də ki iqtidar. Bir tərəfdən də öz partiyası. Atalar bunda deyib e — yeyə bilməyəcəyin şeyi çəngəlləmə.

Allah köməyimiz olsun.
Mövzuya dair forumda müzakirələr ↓
Son olaylar. Nələr baş verir?!

Bu gün növbəti BakuTel sərgisinin təntənəli açılışı oldu. Düzdür açılış gecikmə ilə oldu, amma möhtəşəm Baku Expo Center-də (Sərgi mərkəzi) vaxt keçirmək özü böyük zövq verir. Bir sevindirici halı da qeyd edim — bu il şirkətlər sərgiyə kifayət qədər ciddi hazırlıq görmüşdülər.
İlk olaraq yaxınlaşdığımız stenddə Sinam şirktətinin təqdim etdyi interaktiv xəritənin nümayişi gedirdi. Xəritə Google Maps-ın Azərbaycan ərzisi üçün lokalizasiyasını xatırladır, amma xarici görünüşcə (dizayn) Google məhsulundan geri qalır. Xüsusi planşet vasitəsilə idarə olunan bu xəritə əslində istifadəçi üçün gözəl imkanlar açır — istənilən küçəni, obyekti və s. həmən tapmaq olur, hətta binaların nömrəsini belə göstərir. Özü də bu imkan Azərbaycanın istənilən bölgəsini (!) əhatə edir. İstənilən. Təqdimat edən bəyə sual verdim — istənilən? Təkrar etdi ki, bəs hə, istənilən. Mən də eləmə tənbəllik, dedim — İmişlinin filan küçəsini mənə göstərin, zəhmət olmasa. Təqdimatçı bəy hay əlləşdi, hay vuruşdu, bir şey tapa bilmədi. =)
Şəkillərə böyük həcmdə baxmaq üçün mousla üstünə tıklayın.

Keçid aldıq digər stendlərə. Növbəti qurbanımız Caspian Navtel şirkəti idi. GPS xidmətlərini təqdim edirlər. Xoşuma gəldi. Yaxın bir qardaşı gördüm (Azercell-də bir yerdə çalışmışıq), məsləhət almaq istədim. Deyirəm — a qardaş səncə bu GPS aparatları almağa dəyər? Mən rayonlara səfərlərə çıxanda Google Maps-dan istifadə edirəm, bu nə ilə fərqlənir. Deyir, Google Maps bunun yanında heç nədir, bunlar daha mürəkkəb xüsusiyyətlərə, funksiyalara malik bir xəritədir və sair, və daha nələr. Sonra da məlum oldu ki, qardaşın özü Navtel-də işləyir. Haha. 😆



Yolumuzu davam edirik. Digər GPS təqdim edən şirkət Google Maps + Google Latitude funksiyalarını pulla “sırımaq” istəyir. Yenə davam edirik.  Bakcell. Nar Mobile. Azerfon. Heç bir yenilik görmədim, amma Bakcellin stendi maraqlı idi. Yolumuza davam. Azercell. Sərginin ən gözəl stendi Azərbaycanın ən böyük mobil operatoruna məxsusdur. Zövqlü tərtibat, əsl səviyyə. Azercell 4G texnologiyasını, mobil GPS xidmətini və digər yeni xidmətləri aktiv anons edirdi. Azeronline stendinə yaxınlaşırıq. Hərçənd bu stendin yaradılmasında bizim studiyanın böyük əməyi var. Gözəl alınıb Maşallah.















Yolumuza davam edirik. Windows 7 stendi. İlk olaraq maraqlıdır, amma yeni bir şey yoxdur. Windows-du da. 😀 Yaxınlaşırıq Çinin texnologiya nəhəngi Huawei-in stendinə. Çinli biri gülümsəyərək bizi qarşılayır. Telefonlar təqdim edirlər. Çox sərfəli qiymətə. QWERTY klaviaturalı, Android 2.1 platformalı mobil telefon cəmi 96 dollar (76 (!) manat). Özü də touch screenli və gözəl görünüşlü. Almaq istədim, deyir satılmır, biz bura distrubutor axtarışı üçün gəlmişik. :hm:  Bu sözü deyəndən sonra, məyus olub telefonda bir baq tapdım — Blackberry stilində olan joystick normal işləmir. Əsl çin malı.









Hələlik bu qədər. Gündəlik yazılarımı izləyin, davamı olacaq. 😉
Mövzuya dair forumda müzakirələr ↓
BakuTel 2010

Parlament seçkiləri Mirşahinin gözü ilə — Dövləti seçim. Deyirəm, Yasamal seçki dairəsindən qalib deputat, “Sitatın sonu” layihəsinin əvəzolunmaz aparıcısı Etibar Hüseynov bunun yanında yalan oldu.
Çox yazmaqda məna görmürəm. Birdəfəlik baxmaq daha yaxşıdır.
Seçkilər Mirşahin bəyin prizmasından… :s:


Video-ları sevərək RİP etdiyi üçün Müntəzirə minnətdarlığımızı bildirməyi unutmuruq.
Mövzuya dair forumda müzakirələr ↓
ANS vs. Eynulla Fətullayev