Özümüzü Vaz 2107-dəki “düşük” avtoşlardan güclə qoruyurduq ki, indi də şəhərdə el arasında “pul” maşınları kimi tanınan inkassatorlar tüğyan edir.
Necə gəldi maşın sürmək, kobudluq, boş yer var — “bas getsin” prinsipi və heç bir qaydaya məhəl qoyulmadan idarə olunan inkasator avtomobillər bir çox halda qayda pozuntularınada yol verirlər — dəfələrlə onların qırmızı işıqdan keçdiyinin, digər maşınları sıxdıqlarının, hətta onlara yol vermədikdə təhqirə yol verdiklərinin şahidi olmuşam. Adətən heç bir fərq nişanı (bank adı, məsələn) olmayan bu inkassatorların hansı banka aidiyyatı olduğunu bilmək olmur.

Mənə maraqlıdı, ümumiyyətlə qanunvericiliyə görə inkassator maşınların bu kimi qanundan kənar hərəkətlərə yol verilməsinə icazə var, yoxsa yasaqlanır?! Məsələn, bəzi hallarda dövlət əhəmiyyətli idarələrin xidməti avtomobillərinə qanunu boşa vermək icazəlidir. Bəs inkassatorlar?!  İnterneti, qanunvericiliyimizi axtarıb ələk-vələk etsəmdə, inkassatorlara dair bir şey tapmadım. Ümumilikdə əgər inkassatorlar fərdi bankalara məxsusdursa, deməli hökumətə heç bir aidiyyatı yoxdur və onların etdiyi bu kobudluq əslində qanun pozuntusudur. Bu mənim fikrimdir. Düzünü bilən varsa, buyursun.
Sual — İnkassatorların yollarda hərəkəti, onların yol qaydalarına tabeçiliyi hansı qanun və yaxud qayda ilə tənzimlənir?
Məsələ mənim üçün hələdə açıq qalır.

Qonşu yazıda qeyd etdiyim kimi, bu günlərdə cənub bölgələrimizdə oldum. Hər üç nömrəmi (Azercell, Bakcell, Nar Mobile) özümlə götürüb 3-4 gün İnternetsiz günlərimdə telefondan hər 3 operatorun təqdim etdiyi GPRS xidmətindən faydalanıb, test etmək qərarı verdim.
Başlayaq Azercell-dən. Yeni telefona nömrəmi qoşan kimi GPRS və MMS ayarları həmən aldım. İnternet bağlama ilə heç bir problem yaranmadı. Sürətlidir. Düzdü bəzən “tormozlayır”. Amma bu telefonluqda ola bilər. Fikrimcə Azercell-in təqdim etdiyi GPRS-in əsas çatışmamazlığı — traffikin baha olmasıdır.

Bakcell. Yeni telefona nömrəni qoşarkən Azercell-dən fərqli olaraq heçnə almadım. Amma ayarları sadəcə 5950 qısa nömrəsinə boş mesaj göndərməklə əldə etdim. Elə həməndə İnternetə qoşuldum. İnternet qoşulma Azercell-dəkinə nisbətdə zəifdir, amma maliyyə baxımından Bakcell-in təklif etdiyi GPRS qoşulma daha sərfəlidir.
Nar-ı test etmək vaxtı gəldi. Nar nömrəni telefona qoşdum, amma burada da avtomatik GPRS və MMS ayarlar almadım. Qərar verdim ayarları Nar Mobile sim bələdçisi vasitəsilə axtarıb tapım. Girdim bələdçiyə, oradan “Men ve Nar Mobile” menusunu seçib daxil oldum bölümlərə. Burada “Ayarlar” bölümüdə var idi… Ona tıkladım və “DATA ve MMS ayarlar”-ı seçdim. Mobil telefonumun modelini daxil etmək təklif olundu — etdim. Cavabında mesaj aldım “Telefonun modeli yanlis daxil edilib. Bu ardicilliq ile daxil edin: (istehsalci) bosluq (model), (ayarlarin novu)”. Heç bir nümunə göstərilməyən quru və faydasız mesaj. Deyilən kimi etdim. Telefon istehsalçısı və modeli göstərdikdən sonra vergül qoyub “WAP” yazdım. Axı mənə GPRS (wap) ayarlar lazım idi… Cavabında yenə eyni mesajı aldım. Digər oxşar telefon modelinin adını qeyd etdim, göndərdim — eyni mesajı yenidən aldım… Fikirləşdim, bəlkə “wap” əvəzinə “GPRS” yazım… Elədə etdim. Yenidən həmən mesaj. Fikirləşdim bəlkə kiçik hərflərlə yazmaq lazımdı. Yenə eyni mesaj. Dedim bəlkə sadəcə modeli yazım, yenə eyni cavab. Dedim bəlkə “wap” yerinə “mms” yazım, bəlkə bu işləyir… Yenə eyni mesaj. Bir sözlə 30-dan çox mesaj göndərməyimə baxmayaraq bu zəhrimar ayarları ala bilmədim.
Artıq gecə olduğundan, səhəri gözlədim. Səhər rayonda bir İnternet-klub tapıb daxil oldum narmobile.az saytına, orada qonşu mövzuda təriflədiyim İnternet bələdçisi vasitəsilə ayarları öz telefonuma göndərdim. Problemində nədə olduğunu elə o zaman anladım. Hə, sən demə problem ayarların növünün düz qeyd etməməyimdə imiş. Bəli, bəli. Sən demə ayarların növün wap, mms kimi yox, məhz “NarİnternetGPRS” kimi qeyd etməliydim. Əhsən. Bunu kimin bu qədər “izvraşat” etməsini bilmirəm, bundan öncə ayarlar sırf sadə sorğu ilə gələrdi — ya “wap”, ya “mms” — amma nümunəsi göstərilməyən bu “izvraşeniyadan” xəbəri və ekstrasensor istedadı olmayan hansısa bir abonentin mobil telefon vasitəsilə bu kimi mürəkkəb cümlə birləşməsini tapıb, doğru sorğu göndərməsi mənim üçün qaranlıq qalır. Görəsən ay ərzində bu tapmacanı neçə nəfər tapır?
Nəsə. Ayarlar artıq telefonda idi. Qaldı GPRS-dən isitifadə etmək. Türk qardaşlarımız demişkən, “nə yazıq ki” burada da məni heçdə xoş olmayan bir sürpriz gözləyirdi — istənilən sayt (səhifə) yarımçıq açılır, daha sonra İnternet (GPRS) ümumiyyətlə itir. Fikirləşdim telefondandı. 3 telefon dəyişdim. Eyni problem. Daha bir “baq” (bəlkədə) — sadə bir səhifəyə daxil olduqda (yarımçıq açır onsuzda) və sonra balansı yoxladıqda, adi yarımcan bir səhifə üçün kifayət qədər böyük bir məbləğin çıxıldığının şahidi oldum.
Nar Mobile müştəri xidmətlərinə isə çoxsaylı zənglərim fayda vermədi… Ola bilsin bu sırf mənim test etdiyim günə düşən bir problemdir. Ola bilər. Amma ümumilikdə ümüd edək ki, bu kimi xırda, amma kifayət qədər abonenti narazı sala biləcək problemləri Nar Mobile tezliklə aradan qaldıracaq. Axı qabaqdan işküzar aktivliyin pik vaxtları gəlir. Hərçənd Nar-ın bu tip problemləri həll etmək üçün həm potensialı, həm maliyyə dəstəyi var. Qalır sadəcə istək.
Nəticə

Nəticə isə bundan öncəki müqayisəmizi xatırladır:
Azercell — keyfiyyətli, amma baha İnternet qoşulma.
Bakcell — sərfəli qiymət, normal sürət.
Nar Mobile — kifayət qədər baha (müqaisə etdiyimiz hər 2 operatora nisbətdə) İnternet. Tez-tez ara kəsilmələr.

Bu günlərdə aprel-may aylarında Kür-Arazın tüğyan etdiyi bölgələrdə oldum. Hökumət ziyan çəkmiş evlərlə yanaşı, rayonlarda olan bütün kərpic tikililər (yaşayış evləri) əvəzinə qoşa daşdan pulsuz olaraq gözəl evlər tikir.
Diqqət yetirdinizsə, qeyd etdim — pulsuz! Həqiqətən FHN nəzarəti altında bu evlər qeyri şərtsiz və Azərbaycan sayağı “hörmətdən” uzaq, tam PULSUZ olaraq tikilir. Elə problemdə bundan başlayır. Kütlənin acgözlüyü işə düşür. İndi rayonlarda millət təcili olaraq kərpicdən necə gəldi evlər tikir ki, FHN gəlib yenisini daşdan tiksin. =)

Rayonlardakı bəzi “hörmətli” insanlarda bu acgözlükdən yan keçməyiblər — pulsuz evdən kim imtina edər ki?! Belə ki, rayonlardan birinin sayılan-seçilən baş həkimlərindən biri xəbəri eşidib-eşitməz təcili olaraq həyətindəki uçmuş kərpic tövləni ev formasına salıb, orada yaşamağa başlayıb, bəs gəlin baxın (FHN-ə müraciyyətdə), mənimdə evim uçub. Müfəttişlər bu hörmətli adamın sözlərinə inanıb, üçmuş tövlənin əvəzinə ona 4 otaqlı “2 daş” ev tikib, təhvil vermək istəyirlərmiş ki, Bakıdan tikililəri yoxlamaq üçün komissiya göndərilib. Gələn komissiya “hörmətli” həkimin iftirasının üstünü həmən açıb. Suala — həyətindəki ona məxsus və 2-3 il bundan öncə tikilmiş 2 mərtəbəli dəb-dəbəli evi qoyub niyə tövlədə yaşayırdız sualına, həkim tutarlı cavab tapa bilməyib. O səbəbdən həkimin hökümətdən pulsuz qoparacağı 4 otaqlı ev xülya olaraq qalıb — ev verilib ekskavatorların altına, özüdə məhkəməyə. =)
Eşitdiyimə görə 80-dən çox evi bu aqibət gözləyir.  Əhsən bizim xalq.
Mövzuya dair forumda müzakirələr ↓
Reqionlarımızda «Pulsuz ev» sindromu…

Bildi-bilmədi Hitlerə pərəstiş edənlərə bəd xəbərim var. Böyük Britaniyanın The Daily Mail xəbər dərgisinin apardığı DNK araşdırmanın nəticəsi böyük marağa səbəb olub. Məlum olub ki, dünyanın ən məşhür yəhudi “sevərin” özü yəhudi əsilli olub. =)
Araşdırma zamanı dünyanın hər yerinə səpələnmiş yaxın Hitlerin yaxın qohumlardan DNK (tüpürcək vasitəsilə) nümunələri götürülüb. DNK araşdırmanı məhəl qoymamağa çalışan Hitlerin 39 yaşlı əmi oğlusu (hal-hazırda Avstriya dağlarında fermerdi) sonda iştirakçılara qoşulub (yagin Azərbaycan sayağı hörmətdən sonra). Amma Amerikada yaşayan digər yaxın qohumu — Alexander Stewart Houston isə qəti şəkildə iştirakdan imtina edib. Lakin alimlər onun da DNK-larını əldə edə biliblər. Belə ki, işi araşdıran jurnalistlərdən biri Stüartı güdüb və onun nahar etdiyi restoranların birindən  istifadə etdiyi (və tüpürcək dolu) salfeti əldə edib — elə alimlərədə bu lazım idi.

Nəticə isə qeyd etdiyim kimi çox maraqlı olub. Alimlər iddia edir ki, Hitlerin bütün qohumlarında DNK səviyyəsində E1b1b (Y-DNK) haploqrup aşkarlanıb, bu haploqrup isə alman və ümumiyyətlə qərbi avropanın yerli sakinləri üçün yad bir qrupdur. Sözü gedən haploqrup əsasən afrikalı bərbərlər (Livan, Tunis və Əlcəzairin yerli əhalisi) və əsasən Şərqi avropada məskunlaşan və dağ yəhudiləri qrupuna adi edilən — aşkenazi yəhudilərinə məxsusdur.
Deməli artıq qen səviyyəsində də təstiqləndi — Hitler yəhudi əsillidir.
Onuda qeyd edim ki, Hitlerin yahudi əsilli olması çoxdan tarixçilər tərəfindən iddia edilir. Belə ki, tarixçilərin iddiasına görə Hitlerin atası Maria Schicklgruber adlı alman qadının və 19 yaşlı Frankenberger soyadlı bir yəhudi gəncin gizli məhəbbətinin törəməsidir. Bundan əlavə hələ birinci dünya müharibəsi zamanı Fransa məxfi sənədlərində Hitler yəhudi adı olan “Yakob” (Yaqub) ləqəbilə qeyd edilir…
Deyirəm Hitler də yəhudi çıxdısa, onda bədnam Saakisyan  100% yolunu azmış Azərbaycan türküdü. Saaka, özünə, əsilinə qayıt! =)
Mövzuya dair forumda müzakirələr ↓
Hitlerin də qenləri «yəhudi» çıxdı!

Samsung bazara iPhone-a “rəqib” buraxandan sonra, bütün vasitələrlə onun PR kampaniyasına başlayıb. Söhbət Android 2.2 platformalı Galaxy S modelindən gedir.
Fikrimcə, bu PR kampaniyanın xeyri yoxdu. Hər parametrinə görə iPhone-dan bir addım öndə olan bu telefon əslində sıravi alıcılar üçün Samsung-un “ştamp” etdiyi sıradan növbəti bir telefon olacaq. Səbəblərdə bir neçədir — birincisi, kifayət qədər baha olması — 600 AZN (rəsmi distrubutor İnteqralda qiymət — 599 manatdı), ikincisi, Android telefonların kütlə tərəfindən hələdə istiqanlı qarşılanmaması öz sözünü deyəcək.
Yeni PR kampaniya isə Samsung-un Galaxy S-lə bağlı ambisiyalı olduğunu göstərir — 27 yaşlı Böyük Britaniya sakini Melissa Thompson Galaxy S telefonunda mesaj yazmaq üzrə dünya rekordunu vurub. «the razor-toothed piranhas of the genera Serrasalmus and Pygocentrus are the most ferocious freshwater fish in the world. In reality they seldom attack a human» cümləsini 25, 94 saniyəyə yazan Melissa bundan öncəki 35, 54 saniyyə ilə rekordsmen Franklin Page-i qabaqlayıb. Samsung-da onuda qeyd etməyi unutmurlar ki, bu rekord məhz Galaxy S-də istifadə olunan Swype mətn yığma sisteminin köməkliyi ilə vurulub.
Xatırladım ki, Swype mətn yığım sistemi xüsusi lüğətə malikdir və sensor ekranlarda barmaqların hərəkətin izləyib mətnləri avtomatik yazmaqda kömək edir.
Swype sisteminin iş prinsipi aşağıdakı video-da göstərilir:

Mövzuya dair forumda müzakirələr ↓
Samsung Galaxy S. Super PR davam edir…

Xristianlığın böhranda olduğu heç kimə sir deyil. Bu yaxınlarda bütün Latviyanın arxiyepiskopu bunu təstiqləyib, özündən yeni günah ixtira etdi.
Arxiyepiskopun icadına görə indən belə seçkilərdə iştirak etməmək günahdır. =)
Delfi informasiya saytının verdiyi xəbərə görə Latviya və Litvanın böyük arxiyepiskopu Rigi Zbignev Stankevic öz çıxışlarının  birində qeyd edib ki, Latviya xalqı və bütün xristianlar (insanlar) ölkənin həyatında aktiv rol oynamalıdırlar, məhz onların fəallığı seçkilərin nəticəsini təsir edir. Deməli seçkilərdə iştirak etməmək, vətənə qarşı biganəlik, bu isə özü-özlüyündə ağır günahdır.

Bir sözlə hörmətli arxiyepiskopun fətvasına görə indən belə insanlıq seçkilərdə iştirak etməsə, günah işlədir. Əhsən.
PS. Deyirəm bizdədə seçkilər yaxınlaşır. Yagin hörmətli şeyxdəndə bir fətva gələcək.
Mövzuya dair forumda müzakirələr ↓
Latviyalı keşişin yeni günah ixtirası!

Son bir neçə ildə çox aktuallaşan bir mövzu var — İran və İsrail arasında olan konflikt. Bəs Azərbaycan bu konflikt olduğu halda kimin tərəfin saxlamalıdır?! Gəlin bütün emosiyalarımızı kənara qoyub hər şeyi bir-bir təhlil edək.
İran. Azərbaycanın yaxın və tarixi qonşusu. Din qardaşlarımız. Əslində bu konfliktdə biz alternativsiz İranın tərəfin saxlamalı idik… amma… Bu amma olmasa.
Amma isə ondan ibərtdir ki, İran bizi müstəqil olaraq görmür. İran hələdə Azərbaycanı özünün müvəqqəti ayrı düşmüş bir parçası hesab edir və buna dair mütamadi təpkilərlə çıxış edir.
İran daim Azərbaycan hava və su sərhədlərin pozur,  ölkəmizlə hədə-qorxu dilə ilə çıxış edir, konfliktdə olduğumuz ermənilərə dəstək olur… və digər İrana baş ucalığı gətirməyən insidentlər… Yadımdadı, mən tələbə olarkən İran Azərbaycanın su sərhədlərinə məhəl qoymadan hansısa yatağı ələ keçirməyə cəhd etmişdi, elə buna görədə türk Şahinləri (F-15 təyarələri ilə) Bakıda qol gücü göstərdilər, İran geri çəkildi. Hələ fars şovinizminin Cənubi Azərbaycanda türkçülüyi əzməsindən danışmıram.

İsrail. Dini və insani emosiyalardan çıxış etsək — İslamın nömrə bir düşməni, insan hüquqlarını boşuna verən bir dövlət. Daima İslamı alçaldıb, öz vəhşi siyasətlərin yeridən bir dövlət. Amma… Budada bir amma var. Dini kənara qoyub soyuqqanlı təhlilə keçsək görərik ki, İsrail birinci Qarabağ müharibəsində Azərbaycana çox böyük dəstək olub (qardaş Türkiyədəndə çox). Bu kömək istər silah-sürsatla, istərsə maliyyə vasitələri ilə edilib. Kütlənin inadla dəstəklədiyi müsəlmançılıqdan çıxış etsək isə — Fələstinin rəhmətlik başçısı Yasir Ərafatın “Qarabağ xalqının (ermənilər nəzərdə tutulur) Azərbaycanla mübarizəsi, haqq mübarizəsidir (fələstinlilərin İsraillə mübarizəsinin eynisidir)” deməsini yada salsaq, onda İsrail heçdə bizim düşmən deyil. Hərçənd heç İranın da ənənəvi İslam dövlətləri tərəfindən dəstəklənmədiyinin şahidiyik.
Bəs bütün bunları nəzərə alsaq, onda bizim dostumuz kimdi? Fikrimcə heç kim. Hər iki dövlət hansısa bir müddətdə Azərbaycana kömək edibsə, bunu öz siyasi maraqları səbəbindən edib.
Bəs münaqişə olsa? Bu münaqişənin 2 nəticəsi ola bilər:

1. İran müharibədən qalib çıxıb, nüvə silahına sahib oldu. İlk öncə sırf Azərbaycançılıq faktorundan çıxış etsək — onda Cənubi Azərbaycanın yaxın perspektivdə azadlığına bir quş. Yagin ki, İran həmən öz qalan düşmənlərini hədələməyə başlayacaq. Hesab etsək ki, İran öz düşmənlərindən biri kimi də bizi görür (cənub bölgələrimizə İranın qanunsuz yayımladığı Səhər telekanalına baxmaq yetərki, buna əmin olasız), onda Azərbaycanın vəziyyəti ürəkaçan olmayacaq. Fikrimcə, İsraili məğlub edəndən sonra dahada təkəbbürləşən şovinist İran mütləq Azərbaycana hücum edəcək, hərçənd farslar buranı (Azərbaycanı) özlərinin qanuni torpaqları hesab edir, bu qaçılmazdır. Bütün bunları nəzərə alsaq, İranın bu müharibədə qalibiyyəti bizə heç sərf etmir.
2. İsrail İranı darmadağın edib, qalib gəldi. Bu halda da bizi yaxşı perspektivlər gözləmir. Bəziləri deyəcək, niyə ki? İran dağılsa, Cənubi Azərbaycan müstəqil olacaq və ya bizimlə birləşəcək… Birincisi Sem dayı və kampaniya imkan verməz ki, regionda ikinci qüdrətli türk dövləti yaransın. Buna heç bir qərb dövləti (Rusiyadan tutmuş, karlik Andoraya kimi) razı olmaz. İkincisi, İranın dağılması Azərbaycanın lap göbəyində İraqdan da dəhşətli bir destabil ölkənin yaranması deməkdir. Üçüncüsü, İsrailin İranı məhv etməsi öz-özlüyündə böyük mənəvi qalibiyyat olacaq, onu dahada qəddarlaşdıracaq, İsrailin İslama, qardaş Türkiyəyə təpkiləri dahada sərtləşəcək. Dördüncüsü, bütün şərq (müsəlmanlar) qərbin de-fakto quluna çevriləcək… Bütün bunları da nəzərə alsaq, heç İsrailində qalibiyyəti bizə yaxın perspektivdə yaxşı heçnə vəd etmir.

Gördüyümüz kimi hər iki variant Azərbaycana sərf etmir. Ümumiyyətlə müharibə başladıqda regionda qatma-qarışıqlıq olacağı 100%-di. Bu isə onsuz müharibə şəraitində yaşayan Azərbaycan üçün istənilən halda sərf etmir.
Nə deyim, Allah köməyimiz olsun.
Mövzuya dair forumda müzakirələr ↓
Bizə kim lazımdı? İran yoxsa İsrail?! Düşüncələrim…

Azercell, Bakcell, Nar Mobile… Bu 3 mobil operatorları hər cür müqaisə ediblər… Bir abonent kimi mən də şəxsi fikirlərimlə bölüşəcəm.
Onuda qeyd edim ki, yazım sırf mənim abonentlik təcrübəmə əsaslanır və şəxsi fikirlərimdir.

Başlayaq ilk “cell” Bakcell-dən. Son illər kifayət qədər dinamik inkişafdadı.
Müsbət cəhətləri aşağıdakı kimidir:
— Ucuz danışıq qiyməti (digər operatorlarla müqaisədə);
— Ucuz GPRS;
— Dinamik olaraq inkişaf edir. Yeni real xidmət və yeniliklərlə abonentləri sevindirir;
— Yeni qurulmuş Müştəri xidmətləri əla çalışır.
Mənfi cəhətləri:
— Hələdə MMS dəstəyinin olmaması;
— GPRS qoşulma surətinin zəif olması;
— Postpaid (Klass) və Prepaid-lə (Cin) heç bir fərqin olmaması. Hər ikisidə əslində Prepaid kimi fəaliyyət göstərir, çünki Klass-da limit və sonradan danışıq haqqını ödəmə nəzərdə tutulmur. Maksimum -1 manat borclu ola bilərsən, ondan sonra şəbəkə üzünə bağlanır;
— Şəbəkədəki kiçik problemlər. Məsələn, Bakı-Şamaxı yolunun dağlıq ərazilərində Bakcell ümumiyyətlə tutmur, və ya götürək Qaxın İlısu kəndini;
— Klass tarif planında rouminqi açdırmaq üçün burokratik maşınla üzləşmə.
Azercell. Ölkənin ən böyük və sabit mobil operatoru.
Müsbət cəhətləri aşağıdakı kimidir:
— Fikrimcə Azercell-in ən böyük müsbət cəhəti onun sabit  olaraq daim inkişafda olmasıdır;
— Əla şəbəkəsi var. Müqaisə etdiyim Bakı-Şamaxı yolunda yaxşı tutur. Düzdü idealdan uzaqdı, bəzən xırda xırıltılar olur, amma digər operatorların ümumiyyətlə o ərazini dəstəkləməməsi fonunda bunada şükür;
— Mükəmməl xidmətlər və servislər;
— İdeal müştəri xidmətləri.
Mənfi cəhətləri:
— Danışıq haqqının kifayət qədər baha olması;
— Mənasız bonus və digər kampaniyaların keçirilməsi, hansı ki, operator realda heçdə bonus və ya abonentlər üçün mənfəət təklif etmir. Bu Azercell-in abonentlər arasında güvənliyini itirməyə gətirib çıxarır;
— Endirimlərin kampaniya xarakteri daşıması;
— SMS-in dəyərinin (qiymətinin) şişirdilməsi;
— Rouminqin digər operatorlara nisbətdə baha olması.
Nar Mobile. Ölkənin ən cavan, amma perspektivliyində ciddi problemlər olan operatoru.
Müsbət cəhətləri aşağıdakı kimidir:
— Ucuz qiymətlər. Demək olar ki, bütün operatorlarda ən ucuz danışıq qiymətlərini Nar Mobile təklif edir;
— Əla virtual (!) müştəri xidmətləri. Sayt vasitəsilə nömrənə dair istənilən operasiyanı aparmaq imkanı. Azercell-dədə bu funksiya var, amma fikrimcə Nar Mobile-da daha yaxşı realizə olunub;
— Ucuz rouminq tarifləri;
— 3G dəstəyi.
Mənfi cəhətləri:
— Stabil olmayan şəbəkə. Bu gün şəbəkə ideal tutduqda, səhər o ideallıqdan əsər-əlamət qalmır;
— Bu operatorda da bəzi endirimlərin kampaniya xarakteri daşıması əslində operatora baş ucalığı gətirmir;
— Azercell-də olduğu kimi SMS-in dəyərinin (qiymətinin) şişirdilməsi;
— Müştəri xidmətlərinə zəng edib, operatorla bağlanmaq özü bir qəhramanlıq tələb edir.
Azerfon-Vodafon-u ümumiyyətlə nəzərdən keçirmədim. Çünki fikrimcə ən aşağı abunə haqqı 27 manat olan bu operator kütlə üçün nəzərdə tutulmayıb. Yagin “öz kruqu” var.
Catel-i isə — bu mobil (CDMA) operator mənə məxsus nömrəni mənim xəbərim olmadan digərinə satdıqdan sonra… Nəsə, davam edək.
Nəticə:
Bakcell belə dinamik inkişaf etməkdə davam etsə, tezliklə böyük kütləni özünə cəlb edə biləcək. Çünki artıq stabil şəbəkəyə malik bu operator ucuz qiymətlərlə danışıq təklif edir. Elə kütləyədə bu lazımdı.
Azercell —  lider pozisiyasın qorumaqda davam edir. Son rebrendinqi ilə təstiq etdi ki, oda dinamik inkişafdadı, sadəcə hər bir addımını atmamışdan öncə 1-2 il ölçüb biçir. 😉 Bu isə rəqiblərinə inkişaf üçün vaxt yaratması deməkdir. Məncə Azercell daha çevik tərpənsə, liderliyini ən azından 10 ildə təmin etmiş olar.
Nar Mobile — kifayət qədər cavan olan bu operatorda inkişaf etməkdədi, amma uğursuz kampaniyalar və şəbəkənin stabil olmamasına görə abonentlərin inamını itirir. Çıxış yolunu ilk olaraq şəbəkənin mükəmməl qurulması və sonda abonentləri cəlb edəcək kampaniyaların buraxılışında görürürəm. Yoxsa, şəbəkə işlək vəziyyətdə olmadıqda sərfəli kampaniyaların buraxılması, əksinə əks təsir verir, abonentlər Nar şəbəkəsini ciddiyə almır.
Bəs sadə abonentlər nəyi etməli?
Ucuz və kifayət qədər stabil operator lazımdısa — o zaman Bakcell-i seçin.
Yox, sizə daha güvənli bir şey lazımdırsa, onda seçiminiz Azercell olmalıdı.
Yox,  əgər sizin üçün əsas kontur sayıdırsa (danışıq vaxtı), onda heç fikirləşmədən Nar Mobile-ı seçin.
Hər operatorun öz bazarı var, bizə isə hər birinə uğurlu inkifaş, biz abonentləri yeni-yeni endirimlərlə sevindirmək  arzusu qalır.
Mövzuya dair forumda müzakirələr ↓
Azercell, Bakcell və Nar Mobile…

Deyilənə görə 2 gündən sonra, Avqust ayının 21-i dünyanın resursları artıq yer kürəsi əhalisinə yetməməyəcək.
İndiyə kimi nə istifadə edilirdisə, ana təbiət onu bərpa edib, yenisini yaradırdı, amma indi insan sayının fantastik dərəcədə artmasına görə artıq bu mümkün olmayacaq. Ana təbiət sadəcə resursları bərpa etməyə macal tapmayacaq… insan yenə və yenə daha çox resurs istifadə edəcək.
Bu qorxunc statistikanı gətirən mötəbər Global Footprint Network onuda qeyd edir ki, artıq keçən ildən ana təbiət okeanlarda balıq sərfiyatını insanların sərfiyyatı ilə uzlaşdıra bilmir, balıq (dəniz məhsulları) sayı sürətlə azalmağa, insanların isə iştahı böyüməkdə davam edir. Həmçinin meşələrdə eyni aqibəti yaşayır (bariz nümunə elə Bakı”mız”). AFP isə çox maraqlı bir statistikanı gətirir — deməli insanlıq əgər indiki həcmdə təbiətin nemətlərin istifadə etməyə davam etsə, onda bizə Yer kürəsindən 2 dəfə böyük planet lazımdı. Hələ bu harasıdı… Əgər bütün dünya amerikallar kimi keyflə yaşamaq istəsə — bu alınmaz, çünki Yer kürəsindəki resurslar buna imkan vermir. Bunun mümkün olması üçün Yer kürəsi indikindən düz 4(!) dəfə böyük olmalıdı. Tak çto, inkişafda olan ölkələrin nə vaxtsa inkişaf etmiş ölkələr siyahısına qatılması qərb (və 2-3 şərq) dövlətlərinin yaratdığı mifdən başqa bir şey deyil.
Ən qorxunc statistika isə budur — yer kürəsinin 20% əhalisi planetin 80% resurslarını istifadə edir, qalan 80% əhali isə (əsasən 3-cü ölkələr, hansı ki, onların arasında bizdə varıq) 20% resursla kifayyətlənir. Yagin buna görə bizim çörəklər mal-qara üçün nəzərdə tutulan taxıldan hazırlanır. Əhsən. =)
Bütün bu statistikaya baxanda kiminsə məhsullara olan qiymətlərin ucuzlaşması haqda nəsə deməsi çox gülünc gəlir. Nə ucuzlaşma? Birazdan içməyə təmiz su tapılmayacaq, siz ucuzlaşmadan danışırsız.
İnsanlar… qlobal baxdıqda, insanlar virus kimi bir şeydi, düşüblər yazıq Yer kürəsinin canına, lap tarakanlar kimi. Sayı durmadan artır, iştahları, ambisiyaları isə yerə görə sığmır. Əslində insaları xərcəng xəstəliyinədə bənzədirlər, orqanizmə düşən kimi hər şeyi özünə tabe etməyə çalışır… Görünür xərçəng xəstəliyinə bir çarə tapımadığı kimi, insanların vəhşi iştahınada bir çarə tapılmaz. Üzü qiyamətə doğru gedirik. Ya yeni planetləri fəth edib, yeni koloniyalar qurub tarakan kimi bəşəriyyətə yayılmalıyıq, yada ki, bitməkdə olan resurslar uğrunda bizi dəhşətli müharibələr gözləyir…
İnsanların sayı artıqca da, dəlisovluq artır. Bir bu video-ya tamaşa edin:

Moskva metrosudur. Artıq insanlar həyatdan o qədər harınlayıblar ki, belə risklər edirlər, digərlərinidə riskə atırlar. Sizcə davam etməyə dəyər? Hm. Məncə Allah həqiqətəndə çox səbrlidir. O imkan yaradır ki, insan özü-özünü məhv etsin, day birdə qiyaməti yer üzünə aşırıb ölüləri narahat etməsin… Onsuzda insan özü-özünə qəbir qazır. Yaxın gələcəkdə biz olmasaqda, nəticələrimiz bunun şahidi olacaq. Statistika da bunu  təstiqləyir.
Allah köməyimiz olsun.
Mövzuya dair forumda müzakirələr ↓
Yer. İnsanlar. Deyəsən son yaxınlaşır… Düşüncələrim

İndən belə vaxtım olduqca Azərbaycan İnternetində baş verən hadisələri təhlil edib Sizlərlə bölüşməyə çalışacam.
Avqust ayının ən bəd xəbərlərindən Azərbaycan İnternet məkanının ilk Azərbaycan dilli forumlarından birinin bağlanması xəbəri oldu. Fikrini.de domeni altında fəaliyyət göstərən forum kifayət qədər Azərbaycan dilli intellektualları birləşdirirdi… Amma görünür özlərini çölə qoyanlar, səviyyəsizliyin son həddində oturub səviyyədən dəm vuranlar, ruhi xəstələr və anonim xoşnamuslar Fikrini.de forumununda sonuna çıxdılar. Yoxsa Administrator bu kimi təsirli yazı yazıb, forumu bağlamazdı:

Yazını olduğu kimi təqdim edirəm (mənbə):

Salam, fikirşünaslar. Dünən həyatımın növbəti əsas qərarlarından birini verdim. Forum açılmayacaq! Elmar serverini bərpa etdikdən sonra bəlkə imkan oldu bütün yazıların arxiv kimi qalmasına, amma “fikrini.de” fəaliyyətini bir daha bərpa etməyəcək! Domeyn satılmır və heç kimə də kirayə verilmir, mənim şəxsi mülkiyyətim olaraq qalacaq.

Bəsdir daha onun-bunun nazını çəkdiyimiz, bəsdir daha boş yerə əsəblərimizi sərf etdiyimiz. Mənə deyən lazım idi ki, öz anasına, onun dilinə hörmət etməyən yoldan keçənlərə bu qədər zaman, əsəb, pul niyə sərf edirsən ki. Odur ki, bu fasilə-serverdəki problem, sən demə, xeyrə imiş. Həm də ötən həftə təsadüfən öyrəndim ki, daşım heç təsəvvür belə etmədiyim adamların da başına düşüb. Biri vaxtımı alır, digəri əsəblərimlə oynayır, başqa birisi pulumu götürüb aradan çıxır, digəri gəmidə oturub gəmiçi ilə dalaşmaqdan zövq alır və s. s. s. Bütün bu 5 illik fəaliyyəti boyu forumun mənə vurduğu maddi və mənəvi ziyan Vətən həsrəti ilə çırpındığım və divarlarına qısılaraq təsəlli tapdığım anlardan milyon dəfə çoxdur. Odur ki, əlvida, fikrini.de və fikrini deyənlər!

Forum ailə həyatımda narazılıq mənbəyi olan yeganə obyekt idi. Ailəm mənim üçün hamıdan və hər kəsdən üstündür. Foruma sərf etdiyim enerji və vaxtımı ailəmə, işimə həsr edəcəyəm. Ən əsası, artıq Bakı səfərlərimdə görüşmək məcburiyyətim olmayacaq heç kimlə. Bir neçə gün sonra burdan və eləcə də bütün messencerlərdən forum vasitəsi ilə tanıdığım və əlaqələrimin davam etməsini arzulamadığım bütün yoldaşları da siləcəyəm. Hamınıza uğurlar!

Göründüyü kimi insanı cana yığıblar. Ümumiyyətlə qonşu yazıda da qeyd etdiyim kimi Azərbaycan internetinin bəlası — başqasının uğurlarına kütləvi eqoizm, xainlik, imkan olsa birazda “samoreklama” və “mənəm-mənəmlik”dir. Bu yazını mən ümumiyyətlə Azərbaycan İnternetinin fəryadı adlandırardım.
Xoşnamusluqdan söz düşmüşkən, bu ay ana-bacılarını çölə qoyanlar indidə yerli sayt rəhbərlərini hədəfə alıblar. Müxtəlif tanışlıq saytlarında sayt rəhbərlərinin şəkillərini, telefon nömrələrini qoyub, onları təhqir edirlər… Aldığım məlumata görə xoşqeyrətlərin hərəkətlərindən artıq onlarla sayt rəhbərləri ziyan çəkib. Ziyan deyəndə — pərdə altında gizlənib, anonim olaraq onun bunun şəkilindən istifadə özü-özlüyündə acizlik və yazıqlıq əlamətidir. Belələrinə axı küçə söyüşündən başqa nə deyəsən?!… Heçnə… Odur ki, onların fəaliyyətini hüquq mühafizə orqanlarına tapşırıb, biz müşahidələrimizə davam edək.
Müşahidələrimi isə xüsusi olaraq Müqəddəs Ramazan ayı üçün hazırlanmış kiçik, amma faydalı bir proqramla davam edirəm. Kataloq.net saytın hazırladığı kiçik bu proqram (vidget) əslində böyük bir iş görür — namaz vaxtı göstərilir, özüdə müəyyən şəhərlər üzrə (əfsuslar olsun bütün rayonlar qeyd olunmayıb, yagin yeni versiyada buda həllini tapar). Mənim bu vidgetdə ən xoşuma gələn isə iftara nə qədər vaxtın qalmasını göstərməsidir. Bəyənilsin.
Vidgeti buradan yükləyə bilərsiniz.
Deyirlər “Sosial Yeniliklər Düşərgəsi” gəlir. Saytlarına daxil olub, bunun nə olduğu ilə maraqlandım. Amma bu sosial yeniliklərin nə olduğunu, mən bu işin içində olan adam anlamadım, təsəvvür edirəm sadə istifadəçilər nələr çəkir. =) Yagin “Barama” tipində bir şey olacaq, bu dəfə “İrəli”-dən. Hər halda yenilikdirsə, xeyirli olsun. Yeniliklər İnternet məkanımıza lazımdır.
Saytları bu ünvandadı, bəlkə Sizdə nəsə alındı. =)
Yeniliklər demişkən, bu gün mənə maraqlı bir link göndərdilər, elektron jurnaldı. İnternet istifadəçilərin maraqlandıran ən aktual suallar və onlara cavablar bu jurnalda təqdim olunur. Maraqlı başlanğıcdı. Xoşuma gəldi, əsasəndə “copyright” hissəsi — e-Hacı. Çox kreativ seçimdi. Elektron Hacılar erası başlayır, dəstəkləyirəm.
Jurnalı sizdə buradan yükləyə bilərsiniz.
Və sonda… vBulletin 4-ün bizə verdiyi əzablara baxmayaraq, Fox.AZ saytının forumuna tam yeni tərtibatda  start verdik. Xatırladım ki, Fox.AZ Forumu Azərbaycanda ilk ana dilində fəaliyyət göstərən forum olmaqda davam edir. Forumda bir çox məsələlərə dair müzakirələr aparılır… İndi qaldı Fox.AZ-ın ümumi səhifələrinə əl gəzdirmək. İrəli gedib onuda qeyd edim ki, Fox.AZ portalının yeni inkişaf strategiyasına əsasən tezliklə hal-hazırki və şəxsən mənimdə bəyənmədiyim bloq-versiyanın fəaliyyətinə xitam veriləcək, əvəzində isə tam yeniləmiş və gənclər üçün nəzərdə tutulan informasiya-əyləncə portalı fəaliyyətə başlayacaq. Artıq bu yönümdə işlərə başlanıb.
Forumda müzakirələrə qoşulmaq üçün bura tıklayın.
İstilərə və Avqust ayının passiv olmasına rəğmən, Azərbaycan İnternet məkanı üçün 3-4 gün ərzində kifayət qədər tutarlı xəbərlər var. Görək başımıza nə gəlir.
Allah köməyimiz olsun!