Çoxdandır ki, anons edilən Windows Phone 7-i nəhayət ki, bu gün rəsmi olaraq anons edildi. Mobil telefon istehsalçıları da həmən öz modellərini göstərdilər.
İlk olaraq səs LG-dən gəldi. LG Optimus 7 adlı yeni qadjet “touch-screen” ekranlı (resolution 800×480 px), 5 megapikselli HD çəkilişi aparmağı bacaran kameraya malik, 16GB daxili yaddaşlı və Wi-Fi dəstəkli bir mobil telefondur.

Daha sonra xəbər LG-nin yerlisi Samsungdan çıxdı — Samsung Omnia 7 (GT-I8700). Çox gözəl xarici görünüşü var.
Samsung-un özüdə Super AMOLED tipli ekranı olacaq. Amma ekranda LG-dən güclü olsa da, yaddaş sarıdan uduzur — 8 GB. Digər xüsusiyyətləri LG ilə demək olar ki, eynidir.

Ən sonda isə HTC söz aldı. Microsoft-un HTC-nin səhmlərinin bir qisminin sahibi olması özünü göstərdi — Samsung və LG hərəyə bir telefon təqdim etdilərsə, HTC düz 5 telefon təqdim etdi. Özü də yeni seriya altında. Telefonların xarakteristikaları rəqiblərə oxşardır — bütün telefonlar 5 meqa-piksellik kamera (Bircə HTC 7 Mozart modeli 8 meqa-piksellik kamera ilə) və 1 GHz-lik Qualcomm prosessoru ilə təchiz olunur.

Hər model bir seqment üçün nəzərdə tutulub.
HTC 7 Trophy — ən sadə model. Standart funksiyalar ilə.

HTC 7 Mozart — əsas üstünlüyü kameradır. Özü də ksenon işıqla.

HTC 7 Surround — slayder tipli bu telefon gözəl akustik xüsusiyyətlərə malikdir.

HTC HD 7 — əsasən video-ya baxmaq üçün nəzərdə tutulur. Hələ açılan ayaqcıqları da var — olur kiçik televizor. =)

HTC 7 Pro — QWERTY klaviaturalı telefondur. İş adamları üçün nəzərdə tutulur. Mini laptop.

Mövzuya dair forumda müzakirələr ↓
Gələcək Microsoft-la gələcək?! Windows Phone 7

Ənənəvi rubrikanı davam edirəm. Zövqlər fərqlidir və hansı filmə baxmağa dəyər və ya dəyməz, hər kəs özü qərar versin. Qalan yazılar mənim öz şəxsi fikrilərimdir.

Без улик (Sans laisser de traces)
Fransuz filmidi. Psixoloji triller janrında çəkilib. Ssenari biraz çiy olsa da, aktyorların gözəl və təbii oyunu öz sözünü deyir. Filmdən ayrılmaq olmur, bir anda baxılır.
Filmin baş qəhramanı bir vaxtlar başqasının uğurlu formulunu oğurlayıb özünü zəngin birinə çevilən perspektivli bir biznesmendir. Özü də 3 həftədən sonra o böyük bir trans-milli şirkətin direktoru olacaq. Amma… onu vicdan əzabı boğur və dostunun təkidi ilə uğurlu formulun əsl yiyəsi ilə görüşüb ürəyini açır, yeni işinə görə xeyir dua almaq istəyir. Hər şey gözlənilən kimi alınmır — bir vaxt aldadılan insan onları çox aqressiv qarşılayır və nəticədə cinayət törədilir.
Bütün filmi danışmayacam. Özünüz baxsanız daha məsləhətdir. Gözəl filmdi.
Qiymətim 10 ballıq şkala ilə 9 bal olacaq. 1 xalı kəsməyimin səbəbi sonluğun biraz qarışıq, anlaşılan olmaması idi. Eləbil nəsə çatmır — bu da ssenaridəki boşluqlardan irəli gəlir.

Рыцарь дня (Knight and Day)

Komediya janrında çəkilmiş filmdir. Triller elementləri də var. Həmişəki kimi Tom “supermen” rolundadı. Qarşısına çıxanı məhv edir. Ssenari adi və bezdirici olsa da, aktyorların gözəl oyunu sayəsində film baxımlı və rəngarəng alınıb.
Filmin qısa ssenarisi — guya “super batareyka” yaradılıb. Kiçik və tükənməyən bir batareyka bütün şəhəri enerji ilə təchiz edə bilər. Pis daydaylar da Tomdan o batareykanı almaq istəyirlər, amma nə faydası — Tom qabağına çıxan oğul gəzir. =) Deyirəm bu Tomdan 5-6-ı bizdə də olsaydı, göndərərdik Qarabağa, yarım saata torpaqlarımızı geri alıb gələrdi.
Filmə qiymətim 10 ballıq şkala ilə 6 bal.

Луна 2112 (Moon)
Fantastika janrında çəkilmiş bir filmdir. Deyərdim janrın klassikasıdır. Fantastikanı sevən birisi kimi, mənim həddən artıq xoşuma gəldi.
Filmdə demək olar ki, yalnız bir aktyor çəkilib və bütün film onun qısa həyatından bəhs edir. Qısaca danışım — Deməli 2112-ci ildi. Ayda yeni enerji mənbəyi tapılıb. Bu enerjini tapıb yerə göndərmək üçün bütün Ay boyunca xüsusi bir nəfərlik stansiyalar qurulub. Stansiyalarda insanlar tək-tək işləyirlər, 3 illik kontraktla. Bizim qəhraman da yerə qayıdacağı günü sayır, elə o an yaxınlaşanda bədbəxt bir hadisə baş verir — qəhramanımız qalır Ayın çöllüyündə. Amma sonradan məlum olur ki, bazada hər şey qaydasındadı və Sem (qəhramanın adıdır) iş başındadı… Nəsə, çox başınızı ağrıtmayım, məlum olur ki, yeni Sem köhnə Semin klonudur, amma köhnə Semin özü də daha köhnə Semin klonudur. Hələ Ayın şaxtasında anabioz yuxusuna getmiş minlərlə Semlər var. “Onları” evdə gözləyən arvad-uşaq da çoxdan ölüblər.
Çox maraqlı, mənalı və düşündürən bir filmdir. Məsləhətdi. 10 ballıq şkala ilə qiymətim 10+.

PS. Fantastika janrını sevməyənlər baxmasınlar, film adi gələ bilər.

Робин Гуд (Robin Hood)

Qladiator filminin rejissoru Ridley Scott-dan, bu filmdə də baş qəhraman rolunu oynayan Russell Crowe-dan çox şey gözləyirdim. Ən azından “Qladiator” səviyyəsində bir şey. Filmə baxdım. Heç nə. Tanıdığımız Robin Qudun balladasına aid olmayan hansısa bir qəhraman əfsanəsi. Əfsanəni özü də tarixi bir olay kimi qələmə verməyə çalışırlar. Robin Qud bu filmdə meşə quldurundan çevrilib olur cəsarətli və əsilzadə bir rıttsar (Azərbaycanca tərcüməsin əfsuslar olsun bilmirəm, yəqin ki, zadəgan). Filmə baxarkən bəzən elə gəlir ki, Robin Qud insan deyil — ya Supermenin əmisi oğludur, ya da ki, Batmanın ulu babası, bir sözlə bu Robin ölməzdir.
Hm… Ən hörmət etdiyim aktyorlardan biri Rasl Krou deyəsən qocalıb, onda “Qladiator”-dakı mükəmməl oyunu bu dəfə görmədim.
Bu filmdə də “Qladiator”-da olduğu kimi zəif xasiyyətli Kral var — İoan. Amma “Qladiator”-da imperator rolunu istedadlı Joaquin Phoenix oynayırdısa, burada bu rolu 2-ci səviyyəli bir aktyora tapşırıblar. Nəticədə aktyor rolu tamamilə batırır. Hələ onun gülünc qılınc oynatmasını demirəm. Ümumiyyətlə, filmdə çoxsaylı səhvlər gözdən yayınmır. Məsələn, fransızlar gəmilərdən sahilə enərkən, Kral onlara hücum edir — qılıncını insanlara vurmamış onlar yıxılırlar, birinin də guya belinə vurur — qan çıxmır, eləbil plasmas toxunur belinə. Çox gülünc görünür. =) Bu səviyyədə olan film üçün belə “nedoçetlar” yaraşmaz.
Tarixi filmlərdə day gözümüzü “mazol” edən Cate Blanchett də burdadır. Yaxşı oynayır, söz yox, amma tək Keytin oyunu ilə filmi xilas etmək olmaz.
Poni atları çapan uşaqları isə hansı “izvraşenets” fikirləşib, bilmirəm. Heç yeri yox idi. Nəsə. Qoca Ridli istəyirdi ən azından “Qladiator” səviyyəsində bir tarixi sənət əsəri yaratsın, amma rusların gözəl sözü var — Хотели как лучше, а получилось как всегда. Filmi bəyənmədim. Səviyyə baxımından bayaqdan sitat gətirdiyim “Qladiator”-un yaxınana belə düşmür. “Qladiator”, “Troy” kimi filmlər kinomotoqrafiyada inqilab edənlərdi, amma “Robin Hood” filmi sadəcə sıradan bir film olacaq.
10 ballıq şkala ilə qiymətim 4. Vaxtımı boş yerə sərf elədim. Tfu.

Остров проклятых (Shutter Island)
Əvvəlcə baxmağa tərəddüd edirdim. Filmin başlanğıcı maraqlı olmasa da, Leonardo Dikaprio-nun gözəl oyununu görəndə axıra kimi baxmağa qərarı verdim. Film psixoloji triller janrında çəkilib. Ürəyi zəif, hər şeyi özünə dərd edənlər baxmasınlar.
Filmdə söhbət 20-30-cu illərdən gedir. Dənizlə əhatə olunan adada yerləşən və ruhi xəstə canilər üçün nəzərdə tutulan bir türmədə bir cani yoxa çıxır. Cani sanki buxarlanıb — əl izləri belə yoxdur. İşi araşdırmaq üçün kontinentdən bir marşal (detektiv) dəvət edilir. Yanında da köməkçisi… Hadisələr bir göz qırpımında inkişaf edir. Nəticədə məlum olur ki, sözü gedən bu marşalın özü türmənin ən qorxulu canisidir… Gözəl filmdir. Aktyorların gözəl oyununu bir daha qeyd etmək istəyirəm.
10 ballıq şkala ilə qiymətim 10 bal.

22 пули: Бессмертный (L’immortel)
Kriminal dram janrında çəkilmiş bir filmdir. Özü də Jan Reno baş qəhraman kimi. Film heç xoşuma gəlmədi. Bu iki səbəbdən ola bilər — ya filmdə “Xaç Atası” trilogiyasına uğursuz plaqiat cəhdi var idi, ya da ki, film başdan-ayağa Renonun anormal ölməzliyi, onun tükənməyən gücü kimi boş-boş kadrlarla dolu idi. Mənasız triller sevənlər üçün bu film tapıntı olacaq.
10 ballıq şkala ilə qiymətim 4 bal. Mənə görə vaxt itkisi.
Mövzuya dair forumda müzakirələr ↓
Ən son izlədiyiniz film

Bu günlərdə məşhur brauzer istehsalçısı Mozilla mobil telefonlar bazarına gəlmək istəyini bildirdi. Bu əslində gözlənilən idi. Mozilla sırf Google-un Microsoft-a qarşı getdiyi yolla gedir — Firefox-u artıq bir neçə mobil platformaya adaptasiya edib, qalır artıq bunu öz aparatında da reallaşdırmaq. Yəqin gələcəkdə hələ özlərinin bir əməliyyat sistemləri də olacaq.

Amma hələlik təqdim edilən və yeni ideyaları özündə əks etdirən mobil telefon konsepti Google Android platforması əsasında işləyir. Bu konseptin ən maraqlı və qeyri-adi cəhətləri — bluetooth qarniturun elə bir başa telefonun arxa hissəsinə birləşməsi, fantastik 2 (!) pikto-proyektor — hansı ki, telefonu kompüterə çevirir — biri virtual klaviatura yaradır, biri isə displey. Mozilladakıların iddialarına görə bu telefon radioqəbuledici (wireless) vasitəsi ilə enerji yığacaq.  Çox maraqlı bir texnoloji irəlləyişdir. Bir də telefonda 8 megapiksellik kamera olacaq, amma bununla indiki zamanda heç kimi təəcübləndirmək olmaz.
Konseptlə bağlı artıq video-çarx da buraxılıb:

Digər bir konsept də pikto-proyektorla bağlıdır. Deyəsən gələcəkdə bizi bu texnologiyanın inqlabı gözləyir, necə ki, sensorlu displeylər bunu adi ekranlara qarşı etdi. Bu konsept Aplle şirkətindəndir. Apple-ın xarizmasını nəzərə alsaq, çox güman ki, bu texnologiya da uğurlu alınacaq. “iPhone G” adlandırılan bu konsept adi saat şəklindədir. Amma lazım olduğu anda virtual telefona çevrilir.

“Salam, məndən jurnal alarsınız? “OK” jurnalıdı. Alın da, xahiş edirəm. Çoxlu maraqlı yazılar var. Peşman olmazsınız. Verim? İstəyirsiniz baxın. Qiyməti də ucuzdur. Alın da…” Yəqin Siz də yanacaq doldurma məntəqələrimizdə bu tip müasir dilənçilik növünün şahidi olmusunuz.
Əlində 10-15 jurnal tutub, yanacaq doldurmaq üçün məntəqəyə gələn maşınların üstünə şığıyan bu yazıq qızları anlayıram — çox güman ki, onlar hər satdıqları jurnaldan müəyyən faiz alırlar. Jurnala söz yox, xarici görünüşü gözəl tərtib olunur, ola bilsin içində hələ maraqlı məqalələr, yazılar da olsun, lakin satışa bu cür yanaşma şəxsən məndə bu jurnala həmən antipatiya yaradır — “yəqin bu bir səviyyəsiz şeydir ki, zorla satmaq, camaata sırımaq istəyirlər”.

Onu da qeyd edim ki, jurnalın redaksiyası bu işə hiss olunacaq qədər professionalcasına yanaşır — qırmızı geyimli (insanı cəlb etmək üçün) gülərüz qızlar maşınlara yaxınlaşır və kişi psixikasına təsir edə biləcək qədər “yalvarmağa” başlayırlar. Buna deyirlər hipnozun, insanın öz şəxsi istəyinə rəğmən ələ almağın, təsir etmənin bir növü. Tələlərinə düşən də olur, sadəcə uzaqlara göndərən də. Amma ümumi götürdükdə — dünya şöhrətli “OK” jurnalına bu yolla satış artırmaq baş ucalığı gətirmir.

Fikrimcə “OK Azərbaycan”-ı bu tip satışa əl atmağa “yerli şou-biznes” xəbərlərini özündə əks etdirən dərclərin çoxluğu vadar edir. O zaman sual olunur — məgər rəqabət zorla jurnal sırımaq satmaq deməkdir?!
Mövzuya dair forumda müzakirələr ↓
«OK» jurnalı. Mədəni dilənçilik?!

Oktyabr ayının texniki yenilikləri ilə tanış olaq. Apple-ın iPad planşetinin uğuru HP-nin boğazında qalıb. =) Belə olmasaydı o da tələm tələsik öz yeni məhsulunu anons etməzdi. HP Slate 500 adlı planşetin artıq bütün göstəriciləri məlumdur.
– Prosessor: Intel Atom Z540 1,86 GHz;
– Displey: sensorlu, eni 8,9 düym, “multitouch” dəstəyi;
– GPU: Intel GMA 500
– SSD: 64 Gb;
– Yaddaşı: DDR2, 2 Gb;
– Şəbəkə: Bluetooth, Wi-Fi 802.11b/g/n;
– Kameralar: 2 ədəd. Biri ön, biri arxa tərəfdə;
– Əməliyyat sistemi: Windows 7 Home Premium.

Xarakteristikalarından göründüyü kimi iPad-ı ən azından 5-6 dəfə üstələyir. Amma iPad kimi uğurlu məhsul olacağı sual altındadı. Samsung Galaxy Tab kimi atalarının qiymətini qoysalar, onda uğursuzdu, yox əgər normal bir qiymətə təklif etsələr (400-500 AZN), onda məncə uğurlu bir şey olmalıdı.
Gözünüz aydın, texnoloji nəhəng Panasonic nakam getdiyi mobil telefonlar bazarına yenidən qayıdır. Bu dəfə yaxşıca hazırlaşaraq. Belə ki, Yaponiyada keçirilən CEATEC texnologiya sərgisində Panasonic yeni mobil telefonunu təqdim edib.
Yeni telefon texnoloji nəhəngin uğurlu subbrendi — Lumix (keyfiyyətli fotoaparatlar markasıdı) adı altında buraxılacaq. Daha doğrusu Lumix Phone. Bu sadəcə telefon deyil, slayder tipli kamerafondur. Telefon 12 piksellik keyfiyyətli optika ilə təchiz olunacaq. Hələlik ətraflı heç bir məlumat verilmir.


Çoxdandır ki, səsi sorağı gəlməyən Gateway şirkəti də yavaş-yavaş ayılır. Şirkətin təqdim etdiyi yeni monitorlar çox maraqlı xarici görünüşə malikdirlər. Ən maraqlısı isə qiymətidir — 24 düym ekranlı monitorların qiyməti cəmi 250 USD (200 AZN) olacaq. Özü də texniki göstəricilərinə görə rəqiblərlərindən heç də geri qalmır: LED texnologiyası ilə işıqlandırma,  dinamik kontrastlığın 12,000,000-nin 1-ə nisbəti və parlaq 250 kd/m2.

Gateway adi monitorlar bazarını fəth etmək fikrindədirsə, TDK artıq gələcək barəsində düşünür. Şirkətin təqdim etdiyi elastik ekranlar şəxsən mənim bir fantastik filmdəki (Назад в будущее) televizoru yadıma saldı — televizor adi jalüz formasındadır və lazım olmayanda sanki bir jalüz kimi qatlanıb yox olur. TDK-nın təqdim etdiyi bu yenilik özü də 50% şəffafdır. Ekranın eni isə lap fantastik bir rəqəmdi — cəmi 3 mm!

Yeniliklər olduqca, bölüşəcəm.
Mövzuya dair forumda müzakirələr ↓
Texnoloji yeniliklər

Bu günlərdə nələr baş verir? Heç bilmirəm. Dünya olub böyük bir dəlixana. Lujkovun nəhayət ki, arxasından dəydilər. Yazıq bu hadisəni ya Medvedevin Putinə qarşı addımları ilə yozdu, ya şayə buraxdı ki, Medvedevi verir məhkəməyə… Ortada olan isə nəticədir. Nəticə isə — Lujkov artıq mer deyil…
Fikrimcə, bu hadisə Rusiya siyasətində səhnə arxası mürəkkəb oyunların getməsindən xəbər verir. Lujkov da sadəcə bir qurbanlıq qoyun idi. Çox güman ki, Putin 2012-ci il prezident seçkilərindən kənarda qalacaq. Çünki Medvedev artıq püxtələşir, əl qol atır. Kreslo yaman şirindir deyəsən. Dostluq, söz və dürüstlük yaddan çıxdı. Niyə də yox?! Məgər Putin özü belə siyasi səhnəyə gəlməyib? Rusiyada nə qədər siyasi debatlar qızışsa, ara-qarışsa bir o qədər bizə, kiçik dövlətlərə yaxşıdı.
Gözümüz aydın, deputat Fazil Mustafa partiya sədrlərinin “xüsusi adlarla” təltif edilməsini təklif etdi. Əməkdar partiya sədri. Görünür Fazil bəyin çox gözəl yumor hissi var, Allah özü axrını xeyirli eləsin.

Bu UFO-lar Çindən nə istəyir, heç bilmirəm. Yəqin harda aş, orda da baş “kitayski mallar” artıq başqa planetlərə də gedib çıxıb. Belə ki, Çinin aeroportlarından biri növbəti dəfə UFO təhlükəsinə görə bağlanıb. UFO göydə dayanıb gəlib-gedən təyyarələrə maneəçilik törədirmiş. Hələ bir çinli eləmə tənbəllik UFO-nu videoya da çəkib. Siz də tamaşa edin, açığı mən bir şey anlamadım.

Cənab qızıl şlyager, F.A və digər hərflərlə adını bəzəyən 100% müğənni Faiq Ağayev ona sui-qəsd edildiyini iddia etdi. Ola bilər. Bu iş olduqca qarışıq bir məsələyə bənzəyir. Şəxsən mən bəzi kanalların onu bıçaqlayan şəxsə haqq qazandırmaq cəhtlərini görəndə əsəbləşirəm. Deyilənə görə (telekanallar bunu təstiqləyir) Faiqin “canisi” bundan öncə də türmədə yatıb. Özü də adam öldürmə ittihamı ilə. Amma 2 ildən sonra müammalı şəraitdə “çölə” çıxır və nəticədə yeni cinayət törədir. Lap Holliwood filmlərindəki kimi. Bu konkret sifarişə bənzəyir.
Bizi “demokratiyaya” öyrədənlər, özləri onun azlığından (bəlkə də ifrat çoxluğundan) əziyyət çəkirlər. Belə olmasaydı, inkişaf etmiş demokratik ölkələrdən sayılan Avstraliyada polislər günahsız yerli əhali təmsilçisilə (yəni gəlmə yox, aboriqen) elektroşoker vasitəsi ilə “mırt” tutmazdılar. Araşdırmalar zamanı məlum olub ki, saxlanılan şəxs ruhi xəstə imiş və yolunu azıb. Polis məntəqəsinə gətirilən xəstəyə kömək əvəzinə nə etdiklərinin Siz də şahidi olun.

Mən də velosiped əyləcinin qəfil nasazlığı ucbatından həm velosipedimi bərbad vəziyyətə qoydum, həm də özümü yaxşıca əzmişəm. Allah köməyimiz olsun.
Mövzuya dair forumda müzakirələr ↓
Son olaylar. Nələr baş verir?!

Yeni rubrikaya başlayıram. Euronews-dan onsuz da hər kəs “No Comment” söhbətini plaqiat edib, mənimsəyir. Biz kimdən əskikik?! 😉
Yağışlı Bakı küçələri. No Comment və ya Sözsüz.

Şəkillərə böyük həcmdə baxmaq üçün üzərində tıklayın.

Sentyabr ayı Maşallah texnoloji yeniliklərlə çox oldu. Onlardan ən maraqlıları ilə (fikrimcə) sizlərlə bölüşürəm. Mənə görə bu dəfə ən dəyərli yenilik Plantronics şirkətindən gəldi. DYP-nin gözünün dağına çevriləcək bu kiçik qadjet bizi bir çox cərimələrdən qoruyacaq.
Söhbət bluetooth qarnituradan gedir. Amma bu öyrəşdiyimiz qarnituralar kimi qulağa yox, bir başa avtomobilin günəşdən qoruyucılarına taxılır. Əslində bu ən optimal variantdır. Çünki qulağa taxılan bu şua mənbəyi beynə heçdə yaxşı təsir etmir — şəxsən məndə həmən baş ağrıları başlayır.

Yeni Plantrocis K100-ün isə üstünlü tək bununla bitmir. Qadjet danışıq zamanı avtomatik olaraq kənar səsləri təmizləyir. Bu o deməkdir ki, məsələn maşında getdikdə xəttin digər tərəfindəki insan maşının motorunun deyil, sizin səsinizi eşidəcək. Qadjet vasitəsilə radio sevərlər FM kanallara da qulaq asa bilərlər. Qadjetin çəkisi 90 qram, qiyməti isə 80 USD-dir (64 AZN). Hələlik Azərbaycanda satışda yoxdur, amma net vasitəsilə bu saytdan sifariş verə bilərsiz.

Digər maraqlı yenilik — İntel-dən yeni Classmate PC netbuk-transformerdir. Çox ucuz qiymətə satılacaq bu netbuklar əsasən məktəblilər üçün nəzərdə tutulur. Transformer həmçinin xüsusi qoruyucu qata da malikdir ki, bu da onun təsadüfən (ya bilə-bilə) yerə düşməsindən zədələnməni sıfıra endirir. Hələ bu azmış kimi onun touch-pad displeyi 100 ml suyun tökülməsinə və hətta meyvə şirələrinə qarşı davamlıdır! Görünür İnteldəkilər uşaqların bütün şıltaqlıqlarını nəzərə alıblar. Azərbaycanda bu yeniliyin nə vaxt satışa buraxılacağı məlum deyil. Heyf, maraqlı gadjet idi. Yenə də sağ olsun eBay.




Əgər yenilik uğurlu alınsa İntel netbookların biznes versiyasınıda buraxılacaq.

Növbəti yenilik günəş enerjisilə qidalanan çimərlik zontlarıdı (çətirlər). Bu çətirlərin 2 məqsədi var — həm istirahət edənləri qızmar günəşdən qorumaq, həm onların qadjetlərini elektriklə təmin etmək. Məncə gələcəkdə bu tip zontlar çox yayılacaq. Əsasəndə bahalı istirahət mərkəzlərində. Necə bir vaxtlar Wi-Fi nəsə qeyri adi bir şey sayılırdı, indi isə adiləşib, bu zontlar da eyni taleyi yaşayacaqlar.

Və fikrimcə maraqlı olan sonuncu yenilik əslində texnika deyil, aksessuardı. Apple Air noutboklarının üçün xüsusi keys. Özüdə taxtadan. Məncə çox orijinal ideyadı. Bakıda hələlik satışda yoxdu və yəqin ki, qiymətinə görə heç olmayacaq da. Bu taxta gözəlin qiyməti 260 (!) Avrodu.


Mövzuya dair forumda müzakirələr ↓
Texnoloji yeniliklər

Microsoft-un işləri axır vaxtlar heçdə yaxşı getmir. Bir vaxtlar hər kəs Microsoft-a çatmağa can atırdısa, indi Microsoft-un özü can atanlardandı. Əsasən şirkətə həmlələr bildiyimiz Google və Apple-dan gəlir.
Amma Microsoft da asan təslim olmaq fikrində deyil. Mükəmməl və heçdə MAC OS-dən geri qalmayan, hətta deyərdim onu üstələyən Windows 7-i buraxdıqdan sonra, Microsoft yenidən öz yırtıcı nəzərini artıq uduzduğu smartfonlar və mobil aparatlar üçün əməliyyət sistemləri bazarına yönəldib. Artıq il yarımdır anons edilən və məhz mobil aparatlar üçün nəzərdə tutulan Windows Phone 7 əməliyyat sismi üzərində işlər bitməkdir. Deyəsən bu dəfə Microsoft əbəs yerə vaxtını itirməyib. Bizi həqiqətən fantastik bir şey gözləyir. Bunu deməyə bu günlərdə Engadget dərgisinin əldə etdiyi konfidensial video kadrlar əsas verir.
Kadrlarla sizlərlə bölüşürəm.


Mövzuya dair forumda müzakirələr ↓
Gələcək Microsoft-la gələcək?! Windows Phone 7

Apple`in artıq canlı əfsanəyə çevrilmiş sub-brendi iPhone4 çıxar-çıxmaz qara PR-la üzləşdi. Deyilənə görə yeni telefonlarda antenanın şəbəkəni yaxşı görmə problemi var. Amma məncə bu Apple tərəfində yaxşı düşünülmüş gedişdir. Niyə?! Gəlin birlikdə niyələri sadalayaq.

1. Əgər həqiqətəndə bu tip problem olsaydı, Stiv Cobs konfrans çağırmazdı (adətən bunu yeni texnoloji nailiyyətləri təqdim edəndə edir), sadəcə rəsmi saytda bu problemin mövcudluğu barədə yazılardı və onun həll edilmə yolları göstərilərdi. Konfrans çağırmaqla Apple guya təstiq etdi ki, onlar müştərilərə necə dəyər verir, hər bir mobil telefonda mövcud olan problemə belə həmən reaksiya verirlər.
2. iPhone4 üçün antena problemi satışa təsir edəcək problem deyil — irəliyə gedən 100 minlərlə sifarişlər var.

Bəs nəticədə Apple nə əldə etdi? Nəticədə Apple guya super “customer-care” mövcudluğunu göstərdi və növbəti dəfə rəqiblərini qaralamaq üçün şans əldə etdi. Necə Stiv hər yeni Apple laptoplarının təqdimatında Sony Vaio`nu alçaldır, bu dəfə Apple əlinin altına Samsung, Blackberry, HTC və Nokia düşdü.
Aşağıdakı videolara tamaşa edin:
Apple iPhone4

Samsug Omnia II

Nokia N97

HTC Droid Eris

Blackberry Bold 9700

Onuda qeyd edim ki, sırağagün iPhone4-ü şəxsən test etmişəm.  Azərbaycan mobil şəbəkəsində (Azercell şəbəkəsində test edilib) antena ilə heç bir problem yoxdur.
Problem — microsimcard söhbətindədi, onuda məcbur olub adi simkartı qayçı ilə kəsib doğramaq lazımdı (ölkəmizdə heç bir operator hələlik microsimcard`ların dəstəkləmir), birdə qiyməti — 1600 manat (hardasa 1920 USD).
Mövzuya dair forumda müzakirələr ↓
iPhone4-də antena və ya süni yaradımış qara PR