Bu gün Müsavat-ın 100 illik yubileyidir. Ölkənin ən qocaman siyasi qurumlarından olan Müsavatı, onu təmsil edən hər bir kimsəni təbrik edib, Azərbaycan xalqı, türkçülük ideyası naminə uğurlar arzu edirəm. Qoy ulu Rəsulzadənin bizə əmanət etdiyi üç rəngli bayraq hər zaman ölkəmizdə qürurla dalğalansın.
Azərbaycan İnternetini təmsil edən proqressiv gəncliyimizlə birgə tərtib etdiyimiz Azərbaycan və Ermənistanın tarixi xəritələrinə həsr olunmuş saytlara dair istifadəçilər arasında hələlik nisbi sakitlikdir. Əslində bu bizim milli xüsusiyyətimizdir — bir şey olmadıqda — istəmək, olduqda isə — boş vermək. Hal-hazırda barmaqla sayılası qədər saytlar bu saytların təbliğat kampaniyasına qoşulub (Azerifire qardaşımıza ilk olaraq bu işdə atdığı addımlara görə atəşin salamlar). Amma saytların Google reytinqində birinci olması üçün bütün Aznet təmsilçiləri səfərbər olmalıdır. Niyə axı “azerbaijan vector map” sorğusu verdikdə, Google ilk olaraq ermənilərin tərtib etdiyi və ölkə ərazimizi təhrif edilmiş formada göstərən bir sayt çıxarmalıdır?! Saytlara (www.maps-azerbaijan.com və www.maps-armenia.com) digər saytlarda yerləşdirmək üçün müvafiq kod da yerləşdirilib. Xahiş edirəm biganə qalmayın, bu sırf Azərbaycan naminə atılan addımdır, burada nə mənim biznes maraqlarım var, nə də ki hansısa bir gizli niyyət güdmürəm.

Bu xəritə layihəsi uğurlu alınarsa, növbəti layihə Azərbaycan xalq mahnıların bir sayta yığıb FREE olaraq paylaşımını təmin etmək olacaq. Çox sadə və userfriendly interfeysdə. İnşallah uğurlu alınar.
Uğurlu demişkən — dünyada ən nifrət etdiyim diktator olan təkəbbürlü Qəddafinin uğur quşu 42 il qəddarlıqdan sonra deyəsən onu tərk edib. Şərəfsiz artıq 300-ə yaxın cavanı qanına qəltan edib, amma getmək bilmir. Bu gün Euronews-da maraqlı bir xəbər yayımlandı — polis özbaşnalığından cana gəlmiş xalq onlara atəş açan iki polisi diri-diri yandıraraq asdı. Xalqla zarafatın axırı budur.
Bizim xalqı isə bu saat Facebook-da LİKE söhbəti maraqlandırır. Yeni milli dilənçilik növü peyda olub — indi də “like” dilənirlər. Day zəhləmimi töküblər — 2 dəqiqədən bir sən Allah filankəsin şəklidir, bunu “like” elə, lazımdır… və ya Qurban olum, bu şəkli birinci etmək lazımdır, bunu “like” elə. Lap elədik “like”, nə oldu? İnsanlara xoşbəxtlik üçün bir “like”-da yetərmiş. Əhsən.
Mövzuya dair forumda müzakirələr ↓
Son olaylar. Nələr baş verir?!

Düz iki həftədir ki, üzərində çalışdığımız və demək olar ki, mövcud bütün tarixi xəritələri araşdırmamızın məntiqi nəticəsinə gəlib çıxdıq. www.maps-azerbaijan.com və www.maps-armenia.com saytları artıq istifadə üçün hazırdır.
Qısaca olaraq layihə haqda — hazırladığımız bu iki sayt bu iki erməni saytlarına — www.map-azerbaijan.com və www.map-armenia.com, ermənilərin dövlət sərhədlərimizi, ərazimizi təhrif etməsinə cavab olaraq yaradılıb. Dövlət ərazimiz bir yana, bədnam qonşularımız dövlət gerbimizin də rənglərini səhv tərtib ediblər. Həmçinin bayrağımız da təcavüzə məruz qalıb — ay və ulduzun görünüşünə, mavi rəngin təhrif edilərək təsvir edilməsinə fikir verin. Nəsə. Buna cavab olaraq bizim yaratdığımız Azərbaycan xəritəsi 1920-ci ildə L. Qurniçin Azərbaycan Cumhuriyyətinin sifarişi ilə çəkdiyi xəritəni təkrarlayır. Həmçinin saytda müasir Azərbaycanın itirilmiş torpaqları, düzgün rənglər və proporsiya ilə təsvir edilmiş gerb və bayrağımız da yer alır.
Saytın Ermənistan üçün hazırlandığı versiyada Ermənistan 1920-ci il sərhədlərində göstərilib. Müasir Ermənistan xəritəsi isə işğal olunmuş Azərbaycan torpaqları qeyd olunmaqla təsvir edilib. Həmçinin erməniləri daha da qıcıqlandırmaq üçün (və xarici istifadəçilərdə sayta inam hissi oyatmaq üçün) 20-ci il erməni ərazisinin üzərində erməni bayrağı da təsvir olub. =) Bayraq və gerblərində bəzi elementlər (məsələn xaç — ay ulduzla) dəyişdirilib, rənglər daha solğun təsvir edilib.
İndi ağzı gül kosmopolitlər deyəcək ki, axı niyə?! Bunun nə mənası?! Cavabı — gün ərzində sayta N qədər bu konflikdən və ümumiyyətlə regiondan xəbəri olmayan insanlar daxil olub bu xəritələri öz sayt və nəşrlərində istifadə edə bilərlər. Məhz ermənilərin bu kimi layihələrinin köməkliyi ilə bir çox İnternet resurslar bizim ölkəni təhrif edilmiş formada təsvir edirlər. Ermənilər edirsə, biz niyə etməyək?! Axı tarixi torpaqlarımızdan niyə imtina etməliyik? Kimə görə?!
Məsələnin texniki tərəfi həqiqətən çox çətin oldu. Demək olar ki, dostlarımız və kömək çağırışına qatılan qardaş və bacılar tərəfindən yalnız şəkil formasında xəritələr təqdim edilirdi. Vektor formatında (kompüterdə işləmək üçün yararlı və keyfiyyətli) xəritələrimiz yox dərəcəsindədir. Dəhşət. O səbəbdən xəritələr bir-bir Adobe Illustrator proqramında yenidən yaradılıb. İnşallah, ümüd edirəm bu saytlar vasitəsiylə bu problemi qismən də olsa aradan qaldırmış olacağıq. Bütün xəritə, gerb və bayraq növlərin müxtəlif ən populyar və işlək formatlarda təqdim olunur — Adobe Illustrator (AI), EPS, Corel Draw (CDR), Adobe Acrobat (PDF), Adobe Flash (SWF), JPG, PNG.

Saytlarla bağlı fikir və iradlarınızı bilmək istərdim. Nəsə çatışmayan cəhət varsa, buyurun, birlikdə aradan qaldıraq.
Sonda — bu işin ərsəyə gəlməsində əməyi keçmiş bütün insanlara — Kərim Həsənov, İlqar Kəsəmənli, Pərviz Poluxzadə, Ramil Həsənov, Samir Quliyev, Rzalı Əkbərov, Orxan, Azad Bagirov, Malik Rəşidov, Sahil Novruz, Fariz Efendiyev, Ayaz Quliyev, Saleh Mirməmmədov, Atropat, Milashka, Karandash, Samsam, Regy adlı istifadəçilərə dərin minnətdarlığımı bildirirəm. Kimin adın unutdumsa, bağışlayın. Allah bizdən razı olsun!
Sizi bu saytları (www.maps-azerbaijan.com və www.maps-armenia.com) İnternetdə yaymağa dəvət edirəm — nə qədər çox yaysanız, o qədər Google axtarış nəticəsi olaraq bu saytları birinci göstərəcək (erməni saytlarına nisbətdə). Şəxsi qərəzlik və ambisiyalarınızı qoyun kənara, vətən daha vacibdir, kömək edin!

Çoxdan idi bloqda bir şey yazmırdım. Səbəbi havadır. İsti və eyni tipli dəyişməz hava bütün əsəblərimə işləyirdi. Amma bu gün gecikmiş də olsa, qış özünü göstərməyə başladı. Düzdür, qar yağmaq istədi — alınmadı, amma yenə də nəsə havada dəyişiklik hiss etdik. Sizi bilmirəm, amma hava mənim əhval-ruhiyyəmə əməlli başlı təsir edirmiş. Soyuqların gəlişi ilə pozitiv enerji yığıb, yenidən bloqu aktivləşdirəcəm. İnşallah 1-2 günə qar da yağsa, olacaq “fullun fullu”. Ayağımızın altındaki qarın xışıltısı üçün yaman darıxmışam.
Hava bu gün yaxşı olsa da, Euronews telekanalının xəbəri məni birazca məyus etdi. Əfsanəvi Steve Jobs Apple-dan müddətsiz xəstəlik məzuniyyəti götürərək gedib. Səbəb — Stivin kəskin xərçəng xəstəliyindən əziyyət çəkməsidir. Hətta bir neçə il öncəki Stivlə indiki Stiv arasında fərqi də göstərdilər — canlı əfsanə gözlə seziləcək dərəcədə əldən düşüb. Bununla da hesab edirəm ki, Apple tədricən zəifləyəcək. Əlbət ki, Apple korporasiyası bunu inkar edəcək, hətta əsaslar da gətirəcək ki, gəlirləri artıb və daha nələr… amma Microsoft-un timsalında baş verən hadisələr göstərir ki, şirkətin banisi, ona can yandıran lider getdikdən sonra şirkətin işləri elə də yaxşı getmir. Bill Gates Microsoft-dan getdikdən sonra şirkət bütün sferalarda öz pozisiyasın itirməkdədir. Eyni hadisə bir dəfə Apple-ın başına gəlib, Steve-in bu sayca ikinci gedişidir. Birinci gedişdən də sonra özünə arxalanan Apple çökməyə başladı və məhv Steve-in qayıdışından sonra şirkətə yeni nəfəs gəldi və yeni zirvələri fəth etdi. İndi Steve yenə gedir. Görünür bu dəfə o həmişəlik gedir. Əlvida Steve. Sən bizi tanımasan da, biz sənin işgüzarlığına, zəhmətə olan sevginə hər zaman yaxşı mənada həsəd aparmışıq. Allah köməyin olsun.

Deyirəm, bu Tunis hadisələrindən yazmayan adam qalmayıb. Artıq bütün sözlər deyilib, yazmağa bir şey yoxdur. Bəli, razıyam, diktator layiqli şəkildə ölkədən qovuldu. Bəli, razıyam, bunu xalq etdi. Amma kütlənin hərəkətə keçməsi üçün düşünülmüş şəkildə ssenari lazımdır. Çünki 20 ilin diktatorunun 3 gün ərzində ölkəni tərk etməyə məcbur edilməsi çox asan baş verdi. Maraqlıdır, ABŞ-ın bu hadisələrdə nə kimi aidiyyatı var? Yoxsa ABŞ narıncı inqilab idxalçıları “stavkanı” ediblər ərəb mənşəlli Afrika dövlətlərinə? Mütləq burada qərb dövlətlərinin əli olmalıdır. Niyə belə fikirləşirəm?! Bunun üçün elə eyni materikdə yerləşən digər ərəb dövləti Sudanın başına gətirilən hadisələrdir. Bu barədə növbəti yazılarımın birində yazacam, indi isə söz verdiyim pozitiv — şəhərin mərkəzində, Space telekanalının düz yanında (səhv etmirəmsə tədris müəssisəsinin adı “İncəsənət kolleci”-dir)  “analoqu olmayan” lövhəcik. Şəkildə abırlı düşüb, amma realda 2-ci sinif şagirdinin əl işindən başqa bir şey deyil.

Mövzuya dair forumda müzakirələr ↓
Son olaylar. Nələr baş verir?!

Bloq. Bloqda dəyişikliklər etdim, amma bu keçid dövrü üçün edilən dəyişikliklərdir. Tezliklə bloqun final dəyişikliyinə başlayacam. Amma işlər həddən artıq çoxdur. Maşallah olsun. Gecə saat 3-4-də yatıb, saat 9-da durmaq məcburiyyətindəyəm. Ona görə son vaxtlar çox yorğunam. Bloqda da yazılara ara vermişəm.
Bloqda hər gün yeni yazı görməyə alışan dostlar isə gündə zəng edib nə baş verdiyini öyrənirlər. Deyirəm yaxşı ki, bu İnternet var, yoxsa dost-tanışlar bizdən necə xəbər tutardılar?! 😆 Ümumiyyətlə, İnternetin insanların (içi mən olmaqla) həyatının ayrılmaz hissəsinə çevrilməsi danılmaz faktdır. Bir gün İnternetsiz qalanda, eləbil həyatımda boşluq əmələ gəlir. İnternetoqolik olub getmişik. Bu yaxşıdı, ya yox, zaman göstərəcək, amma hələlik  bütün olaylara rəğmən işlərimizlə məşğuluq.

Digər məsələ ki, Azərbaycan İnternetində önəmli bir şey baş vermir. Hər kəs biri-birindən oğurlayır, hər kəs biri-birini təkrarlamağa çalışır. İdeyalar tükənib. Kimisi dizaynda outlet fikirləşir, kimi növbəti kafe-restoran “Lounge” açır, kimisi isə bloqunun adını dəyişib edir — Hər şeydən birazca… Sonuncu iradın şahidi təsadüfən oldum — Google-da bir.az-a dair axtarış vermişdim, görəm digər bloqların yarıdan çoxu olub “hər şeydən biraz”. Pay atonan. Ay səni, ay bizim millət, sən nə olarmışsan. o:
Dünən maşınımı evakuator aparmışdı. Açığı gəlib maşını yerində görmədikdə, evakuatorların aparması versiyalardan biri idi. Axı onları məlum hadisədən sonra şəhərdə görmək mümkün deyildi. Nəsə. Maşını axtarmağa, yolda duran şahidlərdən soruşmağa başladım. Nəticəsiz. Xoşbəxtlikdən yaxında bir YPX təmsilçisini gördüm, yaxınlaşdım. “Xoş” xəbəri mənə çatdırdı — rəsmi “oğrular” yenidən aktivləşiblər. Nə qədər gülünc olsa da, amma bu aktivləşmə şəhərin əsasən yol hərəkətinin qismət intensiv olan yerlərində müşahidə olunur. Amma mərkəzdə, hərəkətin intensiv və tıxaclı olan hissəsində millət maşını 3-cü sırada belə saxlayır, gözün üstə qaşın var deyən yoxdur. Azərbaycan paradokslar ölkəsidir. Bu da növbəti paradoks.
Mövzuya dair forumda müzakirələr ↓
Son olaylar. Nələr baş verir?!

Görünür MySpace-in uğurlu rebrendinqi Facebook-un yaradıcısı və onun 26% səhmlərinin sahibi, yəhudi əsilli Mark Zuckerberg-ə rahat yatmağa imkan vermir. Belə olmasaydı, KİV vasitəsilə insanların hisslərinə təsir etmək üçün (ay camaat, baxın FB-u bağlasaq, görün sizin həyatınız necə dəyişəcək) şayiə buraxmazdı. İndiyə kimi Facebook-dan qeydiyyatdan keçməyən də, gedib qeydiyyatdan keçəcək ki, əşi görüm bu nə olan şeydir e, bu qədər hay-küy qoparıb.

Əslində Zuckerberg istəsədə şirkəti bağlamaq iqtidarında deyil. Çünki Facebook artıq böyük korporasiyadır və onun səhmləri ondan da böyük korporasiyalara (məsələn, Microsoft) məxsusdur. Məsələnin digər tərəfi — Facebookun hal-hazırki kapitalizasiyası 50 milyard dollar təşkil edir. Bu qədər kapitalı olan şirkətin öz-özünə qapadılması dünya iqtisadiyyatında nonsensdir. Maliyə sistemi isə elə qurulub ki, 50 milyard kapitalizasiya 50 milyard pul köpüyü (ifadə sabun köpüyündən götürülüb) deməkdir. Yəni Facebook-un real dəyəri daha azdır və bu 50 milyard birjalarda pay satışını artırmaq üçün süni olaraq şişirdilib. Şablon sistem belədir — məsələn, sizin 500 dollar pulunuz varsa, siz onu 500*100 düsturu ilə şişirdə bilərsiniz, nəticədə kapitalizasiya olacaq 50000$. Eynilə də Facebook (və digər korporasiyalar) fəaliyyət göstərir. 50 milyard köpüyü partladanda isə gərək bu 50 milyard nəğd pulu (!) səhmdarlara paylayasan. Amma nəzərə alsaq ki, Facebook köpükdür və real olaraq 50 millyardı yoxdu (50.000.000.000/100=500.000.000 real pulu var), o zaman səhmdarlara paylayası bir şey olmayacaq və Amerika iqisadiyyatında nəhəng bankrotlaşdırma prosedurunun şahidi olacağıq. ABŞ höküməti isə indiki həssas iqtisadi vəziyyətdə buna heç bir halda imkan verməz.
Deməli Facebook-un Mark Zuckerberg tərəfindən qapadılması səfeh bir fərziyədir.
Yuxarıda yazdığım birinci variant idi. İkinci variantda ondan ibarət ola bilər ki — bu şayəni Facebook-un rəqibləri ortaya atıb. Bu Google da ola bilər. Bildiyimiz kimi, Facebook öz şəxsi mail xidmətini buraxmaq istəyir, bu isə Google-un Gmaili üçün ölümcül zərbə ola bilər. Google bu şayəni buraxır, nəticədə Facebook-un stabil tərəfdaş və güvənilən sayt imicinə böyük zərbə dəyir. Axı kim səhər bağlanacaq saytda özünə mailbox açar?!
Mövzuya dair forumda müzakirələr ↓
Sosial şəbəkələr və biz

2010 bitdi. Hamı bu il haqda öz subyekt fikirləri ilə bölüşdü. Kimisi 2010-u söydü, kimisi təriflədi. Mənə görə 2010 ümumidə tanıtım ili oldu, insanları daha da yaxşı tanıdım, öyrəndim. İstirahət günləridir. Bu günlərdə yazmaq istəmirdim, amma Maşallah bloqun daimi oxucuları artıq zəng edib, SMS təbriklərində belə bloqu atmamağımı arzu edirlər. Bloq isə böyüyür. Gün ərzində istifadəçi sayı artıq 350 unikal İP-ni keçib. Bu hardasa 400-420 istifadəçi deməkdir. Oxucuların 96% Azərbaycandan girir. Azərbaycan reallıqlarını nəzərə alsaq, sırf bir insanın fikirlərindən ibarət və cəmi 5 ay fəaliyyət göstərən bir sayt üçün gözəl göstəricidir. Maşallah olsun. Nəsə. Bəsdi təriflədim, tərifləmək onsuz da mənə düşmür, odur ki, gəlin istirahət edək. 2010-cu ilin ən gözəl Youtube çarxlarını birgə seyr edək.
Birinci yeri bir Conter-Strike həvəskarı kimi əlbətki aşağıdakı çarxa verirəm. Super.

*****************************************
Bəs su damlasının bir neçə saniyəlik həyatının necə keçməsinin şahidi olmaq istəyirsiniz? Onda bu çarxa baxın:

*****************************************
Vizit kartları Ninja sayağı atmaq üzrə “analoqu olmayan” qaqaş. Əla.

*****************************************
Dünya pikseldə. Gözəl 3D işi.

*****************************************
Bu isə yuxarıdakı videonun daha real variantı. Uruqvaylı 3D mütəxəssisin yaradıcılığı.

*****************************************
Lego və kinomatoqrafiyanın ən qanlı filmi. 😆

*****************************************
2010-cu ilin ən kreativ klipi:

*****************************************
Doğrudan da analoqu olmayan avtomobil yarışları:

*****************************************
Uşaqlığımızın ayrılmaz hissəsi — roqatka. Müasir roqatkalar necə olur? Gəlin baxaq. Mırt video. =)

*****************************************
Və sonda… İnsan hər şeyə qadirdir (yaxşı mənada). Gəlin enerjimizi xeyirli və faydalı işlərə sərf edək, onun-bunun qeybətini qırıb, ayağının altını qazıb, işlərinə ziyan vurmayaq. Axı həyat gözəldir.

Mövzuya dair forumda müzakirələr ↓
Youtube

Bu günlərdə “Sosial Şəbəkə” filminə baxdım. Film Facebook şəbəkəsinin yaradıcısı Mark Zuckerberg-in həyatından (yarı düz, yarı gerçək), onun uğura doğru necə addımlamasından bəhs edir. Film özü-özlüyündə xoşuma gəldi, amma məni daha çox düşündürən başqa məsələ oldu — axı niyə bizdə böyük İnternet layihələrin buraxılması mümkünsüzdir?!
Əslində mən problemləri ötən yazılarımın birində sadalamışdım, amma bu film yaralarımızı təzələdi.
1. Fikrimcə, təhsil — böyük uğurların təməli, başlanğıcıdır. Filmə baxdıqda tələbələrin necə gözəl bir mühitdə oxuyub yaratdıqlarının şahidi olursan. Adam lap qibtə edir. Hər kəs nəsə bir layihə həyata keçirib, əməliylə öndə olmaq istəyir. Gözəl işgüzar mühit var. Rəqabət hökm sürür. İndi gəlin bizim reallıqlara nəzər yetirək — çürümüş təhsil sistemi. Rüşvətxor müəllimlərimizin sayəsində Universitetlərdə artıq oxuyan uşaqlar da oxumamağa məcbur edilir. Bizdə hər şeyi nəsə reallaşdırmaq deyil, papa uşaqlarının pulu həll edir. “Bilikli” müəllimlərin bilikləri isə 70-ci illərin səviyyəsindən artıq deyil. Bizim Universitetlərdə əməllə deyil, əmiylə seçilirlər. Hərf fərqi çox olmasa da, nəticəsi göz qabağındadır.
2. İnternet layihələrə investroların böyük maliyə yatırımları — bizdə isə İnternet layihəyə on mindən artıq pul qoymaq səfehlik sayılır, İnternet layihələr uşaq oynundan başqa bir şey hesab edilmir. Məsələn, Mark Azərbaycanda yaşasaydı, onun 18 minlik layihəsi istifadəçi sayı yüz mini keçdikdən sonra puç olardı. Niyə? Çünki istifadəçi sayı artıqda, saytın xərcləri də artır. Azərbaycanda isə İnternet layihələrə yatırımlar maksimum reklam bannerləri vasitəsilə edilir, belə olan halda da gərək Facebook Day.AZ-ın əvvəlki görkəmindən də (reklamla dolu olduğu vaxtlar) betər bir vəziyyətdə olaydı — daha çox banner asmağa məcbur idi, amma bu da xərclərin heç 10% demək deyil.
3. Faktiki olaraq 2004-ci ildən fəaliyyətə başlayan Facebook, yalnız 2009-cu ilin son aylarında gəlir gətirməyə başlayıb. Deməli 5 il bu layihə ziyana işləyib, amma böyük investorların milyonlarla sərmayələri sayəsində ayaq üstə qalıb. Mark 18 min ABŞ dollarını layihəyə yatırım edərkən, artıq bilirdi ki, onun layihəsinə yiyə çıxan olacaq və milyonlarla yatırımlar edəcək.
Bu sərmayələr bir növ sabun köpüyünə bənzəyir. Layihələrin birjaya çıxışını təmin etmək üçün dəyərlərini 100-1000 dəfə şişirdirlər, şişirdirlər və şişirdirlər… Ümumiyyətlə bütün Amerika iqtisadiyyatı bu prinsiplə qurulub — orada demək olar ki, istənilən layihəni beləcə şişirdib, məhşurlaşdırırlar. Bəs bizdə birja deyilən şey var? =) Var, amma neftdən başqa çətin orada bir şey satıla.
4. Əgər kimsə hesab edirsə, Mark bu imperiyanı tək başına yaradıb, yanılır. Görünmür, amma layihənin populyarlaşmasında dövlətin də böyük rolu var. Facebook faktiki ABŞ administrasiyasının maraqlarına xidmət edən bir layihədir. Artıq xüsusi orqanlar əziyyət çəkib insanların dosyelərini axtarmır, indi insanların özü hər şeyi Facebook-da yerləşdirir, şəkilləri, dostları, fikirləri ilə bölüşürlər (məsələn, terroristlər növbəti terrorları haqda və s.) və bütün bunlar 100% izlənilir. Rus demişkən, bolee togo Facebook-da profilin ləvğ edilməsi mümkün deyil — siz sadəcə hesabınızı deaktiv edə bilərsiniz, poza bilmərsiniz. Bu da Facebook-un istifadəçi bazasının digər məqsədlərlə istifadə olunduğuna daha bir sübutdur. Bura üstə gəl ölkənin birinci şəxsləri səviyyəsində saytın təbliği — alınır uğurlu və dövlət strategiyasına xidmət edən layihə.
Deməli İnternet layihələr üçün digər stimul verici faktor — dövlətin özəl şirkətlər vasitəsilə müxtəlif “ümüd verici” layihələrə pul yatırımları etməsidir. Bizdə bildiyim qədər bir Yumru layihəsinə sərmayə yatırılıb, o da (layihə) ki, axıda fake çıxdı.

Gördüyümüz kimi nə qədər ki, Universitetlərdə sağlam mühit yaradılmayacaq, nə qədər ki, böyük şirkətlərimiz İnternet layihələrə sərmayə qoymağa can atmayacaqlar, nə qədər ki, iqtisadiyyatımız neft və kənd təsərrüfatı, yeyinti məhsullarından ibarət olacaq, o qədər də biz böyük layihələr görməyəcik. Yəni heç vaxt. Təki yanılım.
Mövzuya dair forumda müzakirələr ↓
Azərbaycan İnternet məkanı (Anti-inkişaf faktorları) →

Hə… Liza Simpson da Azərbaycan haqqında danışdı. Özü də danışmağı dərd yarı, sən demə o bizi BMT-də təmsil edirmiş, bizim heç xəbərimiz də yoxdur.

Məşhur Simpsonlar çizgi serialının qəhramanlarından olan balaca Liza növbəti filmlərin birində Azərbaycanı təmsil edir. Cəsur Liza xanımın düyünün rüsumlarını qaldıracağı ilə bağlı Azərbaycan adından BMT üzvlərinə hətta hədə-qorxu gəlmək planları var. Ay səni, Liza… Neft olsaydı, yenə başa düşmək olardı, amma Azərbaycanın düyü ixracı… Deyəsən amerikallılar bizi induslarla səhv salıblar, Vallah. :hm:  Ümumiyyətlə, axır vaxtlar Amerika üçün Azərbaycan faktoru yaman aktuallaşıb. Allah axırını xeyir eləsin.

Ölmədik, bu günü də gördük — Günəşi rəsmi olaraq özəlləşdirdilər. Milliardlarla il azad ömür sürdükdən sonra indi Günəşin də yiyəsi var — bu İspaniyanın Galicia bölgəsinin sakini 49 yaşlı Angeles Duran adlı bir xanımdır.
Bu “fərasətli” qadın əməlinə belə açıqlama verib — “Mən bütün hüquqi məsələri gözəl bilirəm, elə ona görə də rəsmi orqanlara müraciət etdim və mənim sorğum təmin edildi. Ağılsız deyiləm ki, Günəşi kiməsə verim… ” Hə, “çox ağıllı” xanımın Günəşə dair Notariusda təsdiq edilmiş sənədi də var. İspaniyanın dövlət Notarius təsdiq edir ki, Angeles Duran həqiqətən G2 tipli spektral ulduz olan və Günəş sisteminin mərkəzində yerləşən Günəş adlı ulduzun qanuni sahibidir.
Günəşə dair gələcək planlarını açıqlayan fırıldaqçı qadın günəşi parça-parça satmağı planlaşdırdığını deyib. Əhsən.
Günəş demişkən. WikiLeaks saytının “günəşi” də bu saat ən parlaq anını yaşayır. Ötən yazımda qeyd etdiyim kimi, ABŞ-ın xarici siyasətinin yeni vuran “dubinkası” olan bu sayt dövlət departamentinə arxalanıb ABŞ-dan başqa demək olar ki, bütün dövlətlərin başçılarına, ölkələrin apardığı xarici və daxili siyasətə “ilişir”. Düzdür, hərdən lap ağ olmasın deyə, Amerikayada bir iki söz atır, amma yazılarının böyük əksəriyyəti digər ölkələri əhatə edir. Ən maraqlısı odur ki, bu dərgi indi də başlayıb ölkələrin birinci xanımlarına dair kompromatlar dərc etməyə. Məsələn, bu dəfə WikiLeaks Rusiyanın birinci xanımı Svetlana Medvedevaya dair “məxvi” sənədləri üzə çıxarıb, amma nədənsə özünü “müstəqil” adlandıran bu dərgi Amerikanın ilk qara dərili prezidentinin kameralar qarşısında aktyorluq edən və ağ evi xiyar-pomidor-balqabaq bostanına çevirən həyat yoldaşı haqqında bircə kəlmə də olsa söz açmır. Ucuz tamaşa. Amerika nə gündəsən?! 😀
Mövzuya dair forumda müzakirələr ↓
Son olaylar. Nələr baş verir?!

Gələcəyin texnikası necə olacaq? Maraqlıdı. Gələcəkdən xəbər tutmaq üçün mütləq konseptlərə nəzər yetirməyimiz lazımdır. Bu dəfə qarşılaşdığım maraqlı konsept və eksperimentlərlə bölüşürəm.
Bu günlərdə Thanva Tivawong adlı bir dizayner çox sadə, amma neçə illərdən bəri eyni formada görməyə alışdığımız işıqforların (svetofor) yeni dizaynını açıqlayıb. İdeya çox sadə olduğu kimi inqilabidir — işıqforu işıq diodlarından ibarət panel əvəzləyir. Paneldəki şəkil qum saatı formasında olacaq. Qum saatı həm rənglərin (qırmızı, sarı, yaşıl) dəyişməsini xəbər verəcək, həm də ki, digər rəngə keçidin vaxtını hesablayacaq. Fikrimcə Bakının bahalı fransız işıqforlarından bu qat-qat yaxşı və ucuz başa gələr. Bəyənilsin.


Digər maraqlı konsept — Android platformalı və yalnız Super Amoled displeydən ibarət bir telefondur. Bu tip telefonları Samsung çoxdandır ki, anons edib. Amma işgüzar koreyalılar daha irəli gedib konseptə daha bir maraqlı funksiya əlavə ediblər. Deməli batareykalarda enerji tükəndikdə telefon avtomatik olaraq rəngli rejimdən monoxrom rejimə keçid edir. Bu da koreyalıların sözünə görə enerji sərfiyyatını düz 3 dəfə azaldır. Başları Maşallah yaman işləyir. =)


Cib telefonu eşitmişdik, amma cib kinoteatrı?! Bəli. Bu da icad olundu. Özü də 3D formatının dəstəyi ilə. i3DG adlı bu aksessuar iPhone üçün nəzərdə tutulur. Cihaz mürəkkəb mexanizmə malikdir və 3D effektin alınması üçün çoxsaylı güzgülərdən ibarətdir. Maraqlı aksessuardı. Bir çatışmamazlığı var — o da yaradıcıların kütləvi istehsala başlamaq üçün kifayət qədər vəsaitlərinin olmamasıdır. Oğullar var, şərait yoxdu. Video-ya mütləq baxın, atalar məsəlinin şahidi olun.

Yenə Samsung, yenə onun super displeyləri. Bunlara sadəcə baxıb əhsən demək qalır.


Bu isə mırt bir eksperiment — Androd, Windows Phone 7 platformalı telefonlar və yenə də iPhone. Hansı tez bişəcək?! 😉 İzləyək.

Mövzuya dair forumda müzakirələr ↓
Texnoloji yeniliklər

Artıq növbəti bir ay da ötdü. Milli saytlarımızda olan dəyişikliklər barəsində yazmaq vaxtıdır, amma bu ay yeniliklər sarıdan çox zəif oldu. Səbəbini bilmirəm. Yəqin yenə də günahkar seçkilərdir — bu ay demək olar ki, bütün proqressiv gənclik Müntəzirin İTV-dən rip etdiyi deputatlığa namizədlərin traqikomik çıxışlarına baxmaqla məşğul idi.
Bəlkə ona görə də, ayın ən populyar saytları bloqlar oldu. İndi bloq yazıb, bloqer olmaq çox dəbdədir. Elə ona görə də bu dəfəki yazımı da bloqlara həsr edəcəm. Öncə qeyd etdiyim Müntəzirin bloqu haqda ötən yazılarımda fikirlərimi bildirmişəm. Amma son vaxtlar onun bloqunda nisbi sakitlikdir. Yəqin Həbib seçki sonrası yuxuya gedib.
Bu günlərdə maraqlı bir bloqa rast gəlmişəm — babayevz.com. Rüfət adlı bir gəncin bloqudur. Müəllif rus dilində yazır. Kifayət qədər aktual mövzulara toxunur. Savadlıdır. Amma bir qüsurunu qeyd etmək istəyirəm — fikirlərini söyüşlə ifadə edir. Niyəsini bilmirəm, amma yazı tərzini rusiyanın məhşur bloqer və dizayneri Artemiy Lebedevə oxşadıram.
Artıq bir aya yaxındır ki, daha bir maraqlı bloqu izləyirəm — parketinq.com. Aktiv gənclərimizdən olan İlqar Mirzənin şəxsi-tənqidi bloqudur. Aktual mövzulara toxunur, marketinq, dizayn prizmasından onları xırdalayır. Açığı İlqarın marketinq nəzəriyəsinə bu səviyyədə bələd olmasını bilmirdim (mən onu domen alverçisi Rəşad Əliyevin dostu və proqramçı kimi tanıyırdım). Bloqun çatışmamazlıqlarından — İlqarın tükənməyən və axır vaxtlar xroniki xəstəliyə çevrilən mobil operatorların “vıveskalarına” xüsusi məhəbbətini qeyd etmək istəyirəm. Hə, bir də ki, əsas çatışmamazlığı bloqun ayda cəmi bir dəfə yenilənməsidir.
Digər maraqlı bloq weboxu.com ünvanında yerləşir. Bu sadəcə bloq yox, bloq dərgisidir. Yəni istənilən şəxs bloqda iştirak edib, öz xəbərini yerləşdirə bilər. Bu tip bloqlardan rus dilində fəaliyyət göstərən qwe.az dərgisini də qeyd edə bilərəm. Weboxu-da yalnız texnikaya və texnologiyaya aid yazılar yer alır. Dərginin ən böyük çatışmamazlığı — Azərbaycan İnternetinə aid olan xəbərlərdən administrasiyanın yalnız öz “kruqlarına” yaxın olan layihələri işıqlandırmasıdır.
Daha bir bloq, Fox.AZ forumunun keçmiş fəalı, daha sonra Dalğa təşkilatının keçmiş sədri olmuş və hal-hazırda Türkiyədə yaşayan “radikal” müxalifətçi Vəfa Cəfərovanın bloqudur. Tanıdığımız mülayim xasiyyətli Vəfanı artıq tanımaq olmur — o öz “radikallığında” İsa bəyi də, Əli bəyi də çoxdan geridə qoyub. Nəsə, əgər könlünüz ekstrim-radikallığa meyl etsə Vəfa xanımın bloqu sizləri gözləyir. Bloqun əsas çatışmamazlığı — qeyd etdiyim kimi, ifrat radikallıq və təhqirlərə yol verilməsidir.
Qütbün digər tərəfini Rauf Ray adlı gənc “İrəli”-çi təmsil edir. Bloqunun əsas çatışmamazlığı — başqadan ayağa copy-paste-lərin olmasıdır.
Və sonda… Fikrimcə ən yaxşı bloq — forumdur. Məhz forum vasitəsiylə insanlar fikirləri ilə daha sərbəst şəkildə bölüşür, yeni dostlar qazanır. Odur ki, hər birinizi bizim foruma dəvət edirəm — forum.fox.az.